ਲੁਟੀਅਨਜ਼ ਦਿੱਲੀ ਕਲੱਬਾਂ ’ਤੇ ਬੇਯਕੀਨੀ ਦੇ ਬੱਦਲ ਮੰਡਰਾਏ

ਨੈਸ਼ਨਲ ਡੈਸਕ- 27.3 ਏਕੜ ’ਚ ਫੈਲੇ ਦਿੱਲੀ ਜਿਮਖਾਨਾ ਕਲੱਬ ਨੂੰ ਵਾਪਸ ਲੈਣ ਦੇ ਕੇਂਦਰ ਦੇ ਫੈਸਲੇ ਤੋਂ ਕੁਝ ਸਮੇਂ ਲਈ ਭਾਵੇਂ ਰਾਹਤ ਮਿਲ ਗਈ ਹੋਵੇ ਪਰ ਇਸ ਨਾਲ ਲੁਟੀਅਨਜ਼ ਦਿੱਲੀ ਦੇ ਬਿਲਕੁਲ ਵਿਚਾਲੇ ਬਣੇ ਦੂਜੇ ਅਜਿਹੇ ਕਲੱਬਾਂ ’ਤੇ ਅਸਰ ਪਿਆ ਹੈ। ਸਰਕਾਰ ਆਪਣੀਆਂ ਵੱਡੀਆਂ ਮੁੜ-ਵਿਕਾਸ ਯੋਜਨਾਵਾਂ ਨੂੰ ਤੇਜ਼ੀ ਨਾਲ ਅੱਗੇ ਵਧਾ ਰਹੀ ਹੈ, ਇਸ ਲਈ ਉਸ ਨੇ ਦਿੱਲੀ ਰੇਸ ਕੋਰਸ ਗਰਾਊਂਡ ਨੂੰ ਤੇਜ਼ੀ ਨਾਲ ਆਪਣੇ ਕਬਜ਼ੇ ’ਚ ਲੈ ਲਿਆ।

ਹੁਣ ਧਿਆਨ ਉਨ੍ਹਾਂ ਦੂਜੇ ਕਲੱਬਾਂ ਵੱਲ ਗਿਆ ਹੈ ਜੋ ਕੀਮਤੀ ਪਬਲਿਕ ਜ਼ਮੀਨ ’ਤੇ ਕਬਜ਼ਾ ਕਰੀ ਬੈਠੇ ਹਨ। ਜਿਨ੍ਹਾਂ ’ਤੇ ਨਜ਼ਰ ਹੈ, ਉਨ੍ਹਾਂ ਵਿਚ ਦਿੱਲੀ ਗੋਲਫ਼ ਕਲੱਬ, ਪ੍ਰੈੱਸ ਕਲੱਬ ਆਫ਼ ਇੰਡੀਆ, ਇੰਡੀਅਨ ਵੂਮੈਨਜ਼ ਪ੍ਰੈੱਸ ਕਾਰਪਸ ਅਤੇ ਰਾਇਸੀਨਾ ਰੋਡ ’ਤੇ ਸਥਿਤ ਚੈਮਸਫ਼ੋਰਡ ਕਲੱਬ ਸ਼ਾਮਲ ਹਨ। ਪ੍ਰੈੱਸ ਕਲੱਬ ਆਫ਼ ਇੰਡੀਆ ਅਤੇ ਇੰਡੀਅਨ ਵੂਮੈਨਜ਼ ਪ੍ਰੈੱਸ ਕਾਰਪਸ, ਦੋਵਾਂ ਨੂੰ ਪਹਿਲਾਂ ਵੀ ਸਰਕਾਰ ਵੱਲੋਂ ਦਿੱਤੀ ਗਈ ਜਗ੍ਹਾ ਨੂੰ ਖਾਲੀ ਕਰਨ ਦੇ ਨੋਟਿਸ ਮਿਲੇ ਹਨ, ਪਰ ਕਾਨੂੰਨੀ ਦਖ਼ਲਅੰਦਾਜ਼ੀ, ਪ੍ਰਬੰਧਕੀ ਦੇਰੀ ਅਤੇ ਸੰਸਥਾਗਤ ਦਬਾਅ ਕਾਰਨ ਉਨ੍ਹਾਂ ਨੂੰ ਹੁਣ ਤੱਕ ਕਬਜ਼ਾ ਬਣਾਈ ਰੱਖਣ ਵਿਚ ਮਦਦ ਮਿਲੀ ਹੈ।

ਕੇਂਦਰ ਦੀਆਂ ਲੰਮੇ ਸਮੇਂ ਤੋਂ ਰੁਕੀਆਂ ਹੋਈਆਂ ਸ਼ਹਿਰੀ ਮੁੜ-ਵਿਕਾਸ ਯੋਜਨਾਵਾਂ ’ਤੇ ਮਜ਼ਬੂਤੀ ਨਾਲ ਅੱਗੇ ਵਧਣ ਕਾਰਨ ਚਿੰਤਾਵਾਂ ਫਿਰ ਤੋਂ ਸਾਹਮਣੇ ਆ ਰਹੀਆਂ ਹਨ। ਸੈਂਟਰਲ ਵਿਸਟਾ ਕੰਸਟਰੱਕਸ਼ਨ ਪਲਾਨ ਦਾ ਮੁੜ-ਵਿਕਾਸ ਪੂਰੇ ਜ਼ੋਰਾਂ ’ਤੇ ਹੈ, ਜਿਸ ਵਿਚ ਨਵੀਂ ਪਾਰਲੀਮੈਂਟ ਬਿਲਡਿੰਗ ਬਣ ਰਹੀ ਹੈ ਅਤੇ ਕਰਤੱਵ ਪਥ ਨੂੰ ਨਵਾਂ ਰੂਪ ਦਿੱਤਾ ਜਾ ਰਿਹਾ ਹੈ।

ਦਿੱਲੀ ਜਿਮਖਾਨਾ ਕਲੱਬ ਦੇ ਖ਼ਿਲਾਫ਼ ਤਾਜ਼ਾ ਕਦਮ ਕੋਈ ਵੱਖਰੀ ਕਾਰਵਾਈ ਨਹੀਂ ਹੈ, ਸਗੋਂ ਰਾਜਧਾਨੀ ਵਿਚ ਨਵੇਂ ਪਾਵਰ ਸਪੇਸ ਨੂੰ ਬਦਲਣ ਦੀ ਇਕ ਬਹੁਤ ਵੱਡੀ ਕੋਸ਼ਿਸ਼ ਦਾ ਹਿੱਸਾ ਹੈ। ਲੁਟੀਅਨਜ਼ ਦਿੱਲੀ ਦੇ ਕਈ ਐਲੀਟ ਕਲੱਬਾਂ ਲਈ, ਇਹ ਸੁਨੇਹਾ ਸਾਫ਼ ਹੈ : ਪੁਰਾਣੇ ਵਿਸ਼ੇਸ਼ ਅਧਿਕਾਰ ਹੁਣ ਸ਼ਾਇਦ ਅਛੂਤੇ ਨਾ ਰਹਿਣ।