ਭਾਜਪਾ ਨੇ 2024 ਦੀਆਂ ਲੋਕ ਸਭਾ ਚੋਣਾਂ ’ਚ ਖਰਚੇ 1,737.68 ਕਰੋੜ ਰੁਪਏ
Friday, Jan 31, 2025 - 07:35 PM (IST)
ਨਵੀਂ ਦਿੱਲੀ (ਏਜੰਸੀ)- ਭਾਜਪਾ ਨੇ 2024 ਦੀਆਂ ਲੋਕ ਸਭਾ ਚੋਣਾਂ ਵਿਚ 1,737.68 ਕਰੋੜ ਰੁਪਏ ਖਰਚ ਕੀਤੇ। ਭਾਜਪਾ ਵੱਲੋਂ ਚੋਣ ਕਮਿਸ਼ਨ ਨੂੰ ਸੌਂਪੀ ਗਈ ਖਰਚ ਰਿਪੋਰਟ ਵਿਚ ਇਹ ਜਾਣਕਾਰੀ ਦਿੱਤੀ ਗਈ ਹੈ। ਰਿਪੋਰਟ ਮੁਤਾਬਕ, ਕੁੱਲ ਰਕਮ ਵਿਚੋਂ 884.45 ਕਰੋੜ ਰੁਪਏ ਆਮ ਪਾਰਟੀ ਪ੍ਰਚਾਰ ’ਤੇ ਖਰਚ ਕੀਤੇ ਗਏ, ਜਦੋਂ ਕਿ 853.23 ਕਰੋੜ ਰੁਪਏ ਉਮੀਦਵਾਰਾਂ ਨਾਲ ਸਬੰਧਤ ਖਰਚਿਆਂ ਲਈ ਅਲਾਟ ਕੀਤੇ ਗਏ।
ਮੀਡੀਆ ਇਸ਼ਤਿਹਾਰਾਂ ’ਤੇ ਲੱਗਭਗ 611.50 ਕਰੋੜ ਰੁਪਏ ਖਰਚ ਕੀਤੇ ਗਏ, ਜਿਸ ਵਿਚ ਪ੍ਰਿੰਟ ਅਤੇ ਇਲੈਕਟ੍ਰਾਨਿਕ ਮੀਡੀਆ ਵਿਚ ਇਸ਼ਤਿਹਾਰ, ਬਲਕ ਐੱਸ. ਐੱਮ. ਐੱਸ. ਮੁਹਿੰਮਾਂ ਅਤੇ ਕੇਬਲ, ਵੈੱਬਸਾਈਟਾਂ ਅਤੇ ਟੀ. ਵੀ. ਚੈਨਲਾਂ ’ਤੇ ਪ੍ਰਚਾਰ ਸਮੱਗਰੀ ਸ਼ਾਮਲ ਸੀ। ਪਾਰਟੀ ਨੇ ਚੋਣ ਪ੍ਰਚਾਰ ਲਈ ਪੋਸਟਰਾਂ, ਬੈਨਰਾਂ, ਹੋਰਡਿੰਗਾਂ ਅਤੇ ਝੰਡਿਆਂ ’ਤੇ 55.75 ਕਰੋੜ ਰੁਪਏ ਖਰਚ ਕੀਤੇ।
ਇਸ ਤੋਂ ਇਲਾਵਾ ਜਨਤਕ ਮੀਟਿੰਗਾਂ, ਜਲੂਸਾਂ ਅਤੇ ਜਨਤਕ ਮੀਟਿੰਗਾਂ ’ਤੇ ਭਾਜਪਾ ਦਾ ਖਰਚ 19.84 ਕਰੋੜ ਰੁਪਏ ਰਿਹਾ। ਇਨ੍ਹਾਂ ਵਿਚ ਸਟੇਜ, ਆਡੀਓ ਸੈੱਟਅੱਪ, ਬੈਰੀਕੇਡਸ ਅਤੇ ਵਾਹਨਾਂ ਦੇ ਪ੍ਰਬੰਧ ਸ਼ਾਮਲ ਹਨ। ਮੁਹਿੰਮ ਨਾਲ ਸਬੰਧਤ ਯਾਤਰਾ ਖਰਚਿਆਂ ’ਚ ਪਾਰਟੀ ਦੇ ਬਜਟ ਦਾ ਇਕ ਅਹਿਮ ਹਿੱਸਾ ਖਰਚ ਕੀਤਾ ਗਿਆ। ਪਾਰਟੀ ਦੇ ਕੇਂਦਰੀ ਹੈੱਡਕੁਆਰਟਰ ਵੱਲੋਂ ਅਧਿਕਾਰਤ ਸਟਾਰ ਪ੍ਰਚਾਰਕਾਂ ਦਾ ਯਾਤਰਾ ਖਰਚ 168.92 ਕਰੋੜ ਰੁਪਏ ਸੀ, ਜਦੋਂ ਕਿ ਹੋਰ ਪਾਰਟੀ ਨੇਤਾਵਾਂ ਦੀ ਯਾਤਰਾ ’ਤੇ 2.53 ਕਰੋੜ ਰੁਪਏ ਖਰਚ ਕੀਤੇ ਗਏ।
