ਪੰਜਾਬ ''ਚ ਅੱਤਵਾਦ ਫੈਲਾਉਣ ਪਿੱਛੇ ਕਾਂਗਰਸ ਦਾ ਹੱਥ : ਬਾਦਲ

ਮਲੋਟ,(ਗੋਇਲ/ਜੁਨੇਜਾ): ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਪਿੰਡ ਫਤੂਹੀ ਖੇੜਾ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ 'ਕਾਂਗਰਸ' ਪੰਜਾਬ 'ਚ ਅੱਤਵਾਦ ਦੀ ਜਨਮਦਾਤਾ ਰਹੀ ਹੈ। ਪੰਜਾਬ 'ਚ ਅੱਤਵਾਦ ਫੈਲਾਉਣ ਪਿੱਛੇ ਕਾਂਗਰਸ ਦਾ ਹੱਥ ਸੀ। ਹੁਣ ਵੀ ਕਾਂਗਰਸ ਸ਼੍ਰੋਮਣੀ ਅਕਾਲੀ ਦਲ ਨੂੰ ਨੁਕਸਾਨ ਪਹੁੰਚਾਉਣ ਲਈ ਗਰਮਦਲੀਆਂ ਨੂੰ ਸਮਰਥਨ ਦੇ ਰਹੀ ਹੈ ਤੇ ਪੰਜਾਬ ਦੇ ਹਾਲਾਤ ਖਰਾਬ ਕਰਨ 'ਤੇ ਤੁਲੀ ਹੋਈ ਹੈ।
ਪ੍ਰਕਾਸ਼ ਸਿੰਘ ਬਾਦਲ ਪੱਤਰਕਾਰਾਂ ਦੇ ਉਸ ਸਵਾਲ ਦਾ ਜਵਾਬ ਦੇ ਰਹੇ ਸਨ। ਜਿਸ 'ਚ ਧਿਆਨ ਸਿੰਘ ਮੰਡ ਵੱਲੋਂ ਐੱਸ. ਆਈ. ਟੀ. ਮੈਂਬਰ ਕੁੰਵਰ ਵਿਜੇ ਪ੍ਰਤਾਪ ਸਿੰਘ ਦੀ ਚੋਣ ਕਮਿਸ਼ਨ ਤੋਂ ਬਹਾਲੀ ਸਬੰਧੀ ਧਰਨਾ ਲਾਉਣ ਦੇ ਸਬੰਧ 'ਚ ਪ੍ਰਤੀਕਰਮ ਜਾਣ ਰਹੇ ਸਨ। ਇਸ ਸਮੇਂ ਬਾਦਲ ਨੇ ਨਵਜੋਤ ਸਿੰਘ ਸਿੱਧੂ ਤੇ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਜਗਮੀਤ ਸਿੰਘ ਬਰਾੜ ਦੇ ਮੌਕਾਪ੍ਰਸਤ ਕਹੇ ਜਾਣ ਉੱਪਰ ਕਿਹਾ ਕਿ ਨਵਜੋਤ ਸਿੰਘ ਸਿੱਧੂ ਖੁਦ ਭਾਜਪਾ ਛੱਡ ਕੇ ਕਾਂਗਰਸ 'ਚ ਗਿਆ ਹੈ ਤੇ ਕੈਪਟਨ ਅਮਰਿੰਦਰ ਸਿੰਘ ਵੀ ਅਕਾਲੀ ਦਲ ਤੋਂ ਟਿਕਟ ਨਾ ਮਿਲਣ 'ਤੇ ਅਕਾਲੀ ਦਲ ਨੂੰ ਛੱਡ ਕੇ ਕਾਂਗਰਸ 'ਚ ਗਿਆ ਸੀ। ਅਮਰਿੰਦਰ ਸਿੰਘ ਨੇ ਜੋ ਜਗਮੀਤ ਸਿੰਘ ਬਰਾੜ ਦੀ ਵਟਸਐਪ ਚੈਟ ਜਨਤਕ ਕੀਤੀ ਹੈ, ਉਹ ਗਲਤ ਹੈ। ਇਸ ਗੱਲ ਨੂੰ ਜਨਤਕ ਕਰਨਾ ਇਕ ਧੋਖਾ ਹੈ।