ਕੋਵਿਡ-19: ਮਜਬੂਰ ਧੀ ਨਾ ਹੋ ਸਕੀ ਪਿਤਾ ਦੀਆਂ ਅੰਤਿਮ ਰਸਮਾਂ 'ਚ ਸ਼ਾਮਲ, ਲਾਈਵ ਦੇਖਿਆ ਸਸਕਾਰ

ਦੁਬਈ/ਕੋਚੀ(ਆਈ.ਏ.ਐਨ.ਐਸ.)- ਕੋਰੋਨਾਵਾਇਰਸ ਨੇ ਜਿਥੇ ਪੂਰੀ ਦੁਨੀਆ ਵਿਚ ਦਹਿਸ਼ਤ ਮਚਾਈ ਹੋਈ ਹੈ ਉਥੇ ਹੀ ਕਈ ਲੋਕਾਂ ਨੂੰ ਆਪਣੇ ਪਰਿਵਾਰਾਂ ਤੋਂ ਵੀ ਦੂਰ ਕਰ ਦਿੱਤਾ ਹੈ ਤੇ ਕੁਝ ਤਾਂ ਇੰਨੇਂ ਮਜਬੂਰ ਹਨ ਕਿ ਉਹ ਆਪਣੇ ਪਿਆਰਿਆਂ ਦੀਆਂ ਅੰਤਿਮ ਰਸਮਾਂ ਤੱਕ 'ਤੇ ਪਹੁੰਚਣ ਵਿਚ ਅਸਮਰਥ ਹਨ। ਅਜਿਹਾ ਹੀ ਕੁਝ ਭਾਣਾ ਵਰਤਿਆ ਦੁਬਈ ਦੀ ਰਹਿਣ ਵਾਲੀ ਭਾਰਤੀ ਮੂਲ ਦੀ ਮਹਿਲਾ ਨਾਲ, ਜੋ ਭਾਰਤ ਵਿਚ ਹੁੰਦੇ ਹੋਏ ਵੀ ਆਪਣੇ ਪਿਤਾ ਦੀਆਂ ਅੰਤਿਮ ਰਸਮਾਂ ਵਿਚ ਸ਼ਾਮਲ ਨਾ ਹੋ ਸਕੀ ਤੇ ਉਸ ਨੇ ਫੇਸਬੁੱਕ ਲਾਈਵ 'ਤੇ ਹੀ ਆਪਣੇ ਪਿਤਾ ਦੇ ਅੰਤਿਮ ਦਰਸ਼ਨ ਕੀਤੇ।

ਗਲਫ ਨਿਊਜ਼ ਮੁਤਾਬਕ ਸ਼ਾਰਜਾਹ ਦੀ ਰਹਿਣ ਵਾਲੀ ਸੁਜ਼ਨ ਥਾਮਸ ਆਪਣੇ ਪਿਤਾ ਦੀ ਮੌਤ ਤੋਂ ਇਕ ਦਿਨ ਬਾਅਦ ਭਾਰਤ ਪਰਤੀ ਸੀ ਪਰ ਸਿਹਤ ਵਿਭਾਗ ਦੇ ਹੁਕਮਾਂ ਮੁਤਾਬਕ ਉਸ ਨੂੰ 14 ਦਿਨਾਂ ਲਈ ਕੁਆਰੰਟੀਨ ਰੱਖਿਆ ਜਾਣਾ ਸੀ, ਜਿਸ ਕਾਰਨ ਉਸ ਨੇ ਦਿਲ 'ਤੇ ਪੱਥਰ ਰੱਖ ਕੇ ਪਿਤਾ ਦੇ ਅੰਤਿਮ ਸੰਸਕਾਰ ਸ਼ਾਮਲ ਨਾ ਹੋਣ ਦੀ ਚੋਣ ਕੀਤੀ। ਸੁਜ਼ਨ ਥਾਮਸ ਨੂੰ ਉਸ ਦੀ ਬੇਟੀ ਤੇ ਪਤੀ ਸਣੇ ਉਸ ਦੇ ਸਹੁਰੇ ਘਰ ਵਿਚ ਹੀ ਕੁਆਰੰਟੀਨ ਕੀਤਾ ਗਿਆ ਸੀ। ਅਸਲ ਵਿਚ ਇਹ ਮਾਮਲਾ ਉਸ ਵੇਲੇ ਗੁੰਝਲਦਾਰ ਹੋ ਗਿਆ ਜਦੋਂ ਉਹਨਾਂ ਦੀ ਫਲਾਈਟ ਵਿਚ ਇਕ ਯਾਤਰੀ ਕੋਰੋਨਾਵਾਇਰਸ ਇਨਫੈਕਟਡ ਮਿਲਿਆ। ਇਸ ਕਾਰਨ ਬਾਕੀ ਯਾਤਰੀਆਂ 'ਤੇ ਵੀ ਇਸ ਦਾ ਜੋਖਿਮ ਵਧੇਰੇ ਸੀ। 

ਸੁਜ਼ਨ ਨੇ ਇਸ ਦੌਰਾਨ ਗਲਫ ਨਿਊਜ਼ ਨਾਲ ਗੱਲ ਕਰਦਿਆਂ ਦੱਸਿਆ ਕਿ ਮੈਂ ਆਪਣੇ ਪਿਤਾ ਜੀ ਦਾ ਅੰਤਿਮ ਸੰਸਕਾਰ ਫੇਸਬੁੱਕ ਲਾਈਵ 'ਤੇ ਵੇਖਿਆ। ਪਰ ਇਸ ਦੀ ਚੋਣ ਮੈਂ ਖੁਦ ਕੀਤੀ ਕਿਉਂਕਿ ਇਸ ਨਾਲ ਇਹ ਵਾਇਰਸ ਫੈਲ ਸਕਦਾ ਸੀ। ਮੈਂ ਦੁਬਈ ਤੋਂ ਕੋਚੀ ਦਾ ਸਫਰ ਕੀਤਾ ਸੀ ਤੇ ਅੰਤਿਮ ਸੰਸਕਾਰ 'ਤੇ ਬਹੁਤ ਸਾਰੇ ਬਜ਼ੁਰਗ ਸ਼ਾਮਲ ਸਨ। ਮੈਨੂੰ ਇਸ ਦੌਰਾਨ ਜ਼ਿੰਮੇਦਾਰ ਹੋਣਾ ਚਾਹੀਦਾ ਹੈ। ਥਾਮਸ, ਜੋ ਸ਼ਾਰਜਾਹ ਵਿਚ ਸਕੂਲ ਪ੍ਰਬੰਧਕੀ ਸਟਾਫ ਵਿਚ ਕੰਮ ਕਰਦੀ ਹੈ, ਨੇ ਕੋਰੋਨਾਵਾਇਰਸ ਮਹਾਂਮਾਰੀ ਨੂੰ ਮਨਹੂਸ ਦੱਸਿਆ। ਮੈਂ ਕਦੇ ਨਹੀਂ ਸੋਚਿਆ ਸੀ ਕਿ ਇਕੋ ਸ਼ਹਿਰ ਵਿਚ ਹੁੰਦਿਆਂ ਹੋਇਆ ਮੈਨੂੰ ਆਪਣੇ ਪਿਤਾ ਦਾ ਅੰਤਿਮ ਸੰਸਕਾਰ ਇਸ ਤਰ੍ਹਾਂ ਦੇਖਣਾ ਪਵੇਗਾ।