ਜਾਰਜੀਆ ''ਚ ਤੁਰਕੀ ਦਾ ਫੌਜੀ ਜਹਾਜ਼ ਕ੍ਰੈਸ਼! ਅਜ਼ਰਬਾਈਜਾਨ ਤੋਂ ਉਡਾਣ ਭਰਨ ਮਗਰੋਂ ਵਾਪਰਿਆ ਹਾਦਸਾ

ਅੰਕਾਰਾ : ਤੁਰਕੀ ਦੀ ਫੌਜ ਨੂੰ ਮੰਗਲਵਾਰ ਨੂੰ ਇੱਕ ਵੱਡਾ ਝਟਕਾ ਲੱਗਾ ਹੈ। ਤੁਰਕੀ ਦਾ ਇੱਕ C-130 ਫੌਜੀ ਮਾਲਵਾਹਕ ਜਹਾਜ਼ (military cargo plane) ਅਜ਼ਰਬਾਈਜਾਨ ਤੋਂ ਉਡਾਣ ਭਰਨ ਤੋਂ ਬਾਅਦ ਜਾਰਜੀਆ 'ਚ ਕਰੈਸ਼ ਹੋ ਗਿਆ ਹੈ। ਤੁਰਕੀ ਦੇ ਰੱਖਿਆ ਮੰਤਰਾਲੇ ਨੇ ਜਾਰਜੀਆ ਦੀ ਅਜ਼ਰਬਾਈਜਾਨ ਨਾਲ ਲੱਗਦੀ ਸਰਹੱਦ ਨੇੜੇ ਹੋਏ ਇਸ ਹਾਦਸੇ ਦੀ ਪੁਸ਼ਟੀ ਕੀਤੀ।

ਰਾਸ਼ਟਰਪਤੀ ਐਰਦੋਗਨ ਨੇ ਕੀਤਾ ਸੰਬੋਧਨ
ਇਸ ਦੁਖਦਾਈ ਖ਼ਬਰ ਬਾਰੇ ਜਾਣਕਾਰੀ ਤੁਰਕੀ ਦੇ ਰਾਸ਼ਟਰਪਤੀ ਤੈਯਪ ਐਰਦੋਗਨ ਨੂੰ ਉਦੋਂ ਦਿੱਤੀ ਗਈ ਜਦੋਂ ਉਹ ਅੰਕਾਰਾ ਵਿੱਚ ਇੱਕ ਭਾਸ਼ਣ ਖਤਮ ਕਰ ਰਹੇ ਸਨ। ਐਰਦੋਗਨ ਨੂੰ ਉਨ੍ਹਾਂ ਦੇ ਸਹਾਇਕਾਂ ਨੇ ਇੱਕ ਨੋਟ ਫੜਾਇਆ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਜਹਾਜ਼ ਦੇ ਹਾਦਸੇ ਬਾਰੇ ਸੁਣ ਕੇ ਦੁੱਖ ਪ੍ਰਗਟ ਕੀਤਾ। ਰਾਸ਼ਟਰਪਤੀ ਨੇ ਮ੍ਰਿਤਕਾਂ ਲਈ ਸੰਵੇਦਨਾਵਾਂ ਭੇਟ ਕਰਦੇ ਹੋਏ ਉਨ੍ਹਾਂ ਨੂੰ 'ਸਾਡੇ ਸ਼ਹੀਦ' (our martyrs) ਕਹਿ ਕੇ ਸੰਬੋਧਨ ਕੀਤਾ।

ਐਰਦੋਗਨ ਨੇ ਕਿਹਾ, "ਪਰਮਾਤਮਾ ਕਰੇ, ਅਸੀਂ ਘੱਟੋ-ਘੱਟ ਮੁਸ਼ਕਲਾਂ ਨਾਲ ਇਸ ਹਾਦਸੇ ਨੂੰ ਪਾਰ ਕਰੀਏ। ਪਰਮਾਤਮਾ ਸਾਡੇ ਸ਼ਹੀਦਾਂ ਦੀ ਆਤਮਾ ਨੂੰ ਸ਼ਾਂਤੀ ਬਖਸ਼ੇ, ਅਤੇ ਅਸੀਂ ਆਪਣੀਆਂ ਪ੍ਰਾਰਥਨਾਵਾਂ ਰਾਹੀਂ ਉਨ੍ਹਾਂ ਦੇ ਨਾਲ ਹਾਂ,"।

ਹਾਦਸੇ ਦੀ ਜਾਂਚ ਜਾਰੀ
ਤੁਰਕੀ ਦਾ ਰੱਖਿਆ ਮੰਤਰਾਲਾ ਹਾਦਸੇ ਵਾਲੀ ਥਾਂ 'ਤੇ ਪਹੁੰਚਣ ਲਈ ਜਾਰਜੀਆਈ ਅਧਿਕਾਰੀਆਂ ਨਾਲ ਤਾਲਮੇਲ ਕਰ ਰਿਹਾ ਹੈ, ਅਤੇ ਸਰਚ ਤੇ ਬਚਾਅ ਦਲ ਮੌਕੇ ਲਈ ਰਵਾਨਾ ਹੋ ਗਏ ਹਨ।
ਗ੍ਰਹਿ ਮੰਤਰੀ ਅਲੀ ਯੇਰਲੀਕਾਯਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਆਪਣੇ ਜਾਰਜੀਆਈ ਹਮਰੁਤਬਾ ਨਾਲ ਫ਼ੋਨ 'ਤੇ ਗੱਲ ਕੀਤੀ ਹੈ, ਜੋ ਕਿ ਹਾਦਸੇ ਵਾਲੀ ਥਾਂ ਵੱਲ ਜਾ ਰਹੇ ਹਨ।
ਹਾਲਾਂਕਿ, ਐਰਦੋਗਨ, ਉਨ੍ਹਾਂ ਦੇ ਦਫਤਰ ਜਾਂ ਮੰਤਰਾਲੇ ਨੇ ਤੁਰੰਤ ਇਹ ਨਹੀਂ ਦੱਸਿਆ ਕਿ ਹਾਦਸੇ ਦਾ ਕਾਰਨ ਕੀ ਸੀ, ਅਤੇ ਨਾ ਹੀ ਮ੍ਰਿਤਕਾਂ ਦੀ ਗਿਣਤੀ ਬਾਰੇ ਕੋਈ ਜਾਣਕਾਰੀ ਦਿੱਤੀ ਗਈ। ਸਥਾਨਕ ਮੀਡੀਆ ਨੇ ਦੱਸਿਆ ਕਿ ਜਹਾਜ਼ ਵਿੱਚ ਤੁਰਕੀ ਅਤੇ ਅਜ਼ਰਬਾਈਜਾਨ ਦੋਵਾਂ ਦਾ ਅਮਲਾ ਸਵਾਰ ਸੀ।