ਤਾਈਵਾਨ ਸੀਮਾ ''ਚ ਫਿਰ ਵੜੇ ਚੀਨ ਦੇ 10 PLA ਜਹਾਜ਼ ਤੇ 6 ਜੰਗੀ ਬੇੜੇ, ਜਾਪਾਨ ਨੇ ਦਿੱਤੀ ਚਿਤਾਵਨੀ
Wednesday, Dec 03, 2025 - 06:51 PM (IST)
ਤਾਈਪੇ/ਟੋਕੀਓ : ਚੀਨ ਅਤੇ ਤਾਈਵਾਨ ਵਿਚਕਾਰ ਫੌਜੀ ਤਣਾਅ ਲਗਾਤਾਰ ਵਧ ਰਿਹਾ ਹੈ। ਤਾਈਵਾਨ ਦੇ ਰੱਖਿਆ ਮੰਤਰਾਲੇ ਨੇ ਬੁੱਧਵਾਰ (03 ਦਸੰਬਰ 2025) ਸਵੇਰੇ ਆਪਣੇ ਆਸ-ਪਾਸ ਚੀਨੀ ਫੌਜੀ ਗਤੀਵਿਧੀਆਂ ਵਿੱਚ ਤੇਜ਼ੀ ਦਰਜ ਕੀਤੀ ਹੈ।
ਮੰਤਰਾਲੇ ਅਨੁਸਾਰ, ਸਵੇਰੇ 6 ਵਜੇ (ਸਥਾਨਕ ਸਮੇਂ) ਤੱਕ ਤਾਈਵਾਨ ਦੇ ਨੇੜੇ 10 PLA ਲੜਾਕੂ ਜਹਾਜ਼ (ਪੀਪਲਜ਼ ਲਿਬਰੇਸ਼ਨ ਆਰਮੀ), 6 PLAN ਜਲ ਸੈਨਾ ਦੇ ਜਹਾਜ਼ ਅਤੇ 2 ਸਰਕਾਰੀ ਜਹਾਜ਼ ਦੇਖੇ ਗਏ। ਇਨ੍ਹਾਂ ਵਿੱਚੋਂ 4 ਚੀਨੀ ਜਹਾਜ਼ਾਂ ਨੇ ਮੱਧ ਰੇਖਾ (Median Line) ਪਾਰ ਕਰਕੇ ਤਾਈਵਾਨ ਦੇ ਉੱਤਰੀ ADIZ (ਏਅਰ ਡਿਫੈਂਸ ਆਈਡੈਂਟੀਫਿਕੇਸ਼ਨ ਜ਼ੋਨ) ਵਿੱਚ ਪ੍ਰਵੇਸ਼ ਕੀਤਾ। ਤਾਈਵਾਨ ਨੇ ਸਥਿਤੀ ਦੀ ਨਿਗਰਾਨੀ ਕਰਕੇ ਜ਼ਰੂਰੀ ਪ੍ਰਤੀਕਿਰਿਆ ਦਿੱਤੀ ਹੈ।
ਇਸ ਤੋਂ ਇੱਕ ਦਿਨ ਪਹਿਲਾਂ ਮੰਗਲਵਾਰ ਨੂੰ ਵੀ ਤਾਈਵਾਨ ਨੇ 9 ਚੀਨੀ ਜਹਾਜ਼ਾਂ, 8 ਜਲ ਸੈਨਾ ਦੇ ਜਹਾਜ਼ਾਂ ਅਤੇ 2 ਸਰਕਾਰੀ ਜਹਾਜ਼ਾਂ ਦੀ ਗਤੀਵਿਧੀ ਦਰਜ ਕੀਤੀ ਸੀ।
ਜਾਪਾਨ ਦੀ ਚੇਤਾਵਨੀ
ਇਸੇ ਦੌਰਾਨ, ਜਾਪਾਨ ਨੇ ਇਸ ਖੇਤਰ ਵਿੱਚ ਆਪਣਾ ਸਖ਼ਤ ਰੁਖ ਜਾਰੀ ਰੱਖਿਆ ਹੈ। ਜਾਪਾਨ ਦੀ ਪ੍ਰਧਾਨ ਮੰਤਰੀ ਸਾਨੇ ਤਾਕਾਈਚੀ ਨੇ 7 ਨਵੰਬਰ ਨੂੰ ਸੰਸਦ ਵਿੱਚ ਕਿਹਾ ਸੀ ਕਿ ਚੀਨ ਦਾ ਤਾਈਵਾਨ 'ਤੇ ਹਮਲਾ ਜਾਪਾਨ ਦੀ "ਜੀਵਿਤ ਰਹਿਣ ਦੀ ਸਥਿਤੀ 'ਤੇ ਖਤਰਾ" ਪੈਦਾ ਕਰੇਗਾ, ਜਿਸ ਨਾਲ ਜਾਪਾਨ ਦਾ ਫੌਜੀ ਦਖਲ ਸੰਭਵ ਹੋ ਜਾਵੇਗਾ। ਇਸ ਬਿਆਨ 'ਤੇ ਚੀਨ ਭੜਕ ਗਿਆ ਸੀ ਅਤੇ ਟੋਕੀਓ 'ਤੇ ‘ਲਾਲ ਰੇਖਾ’ ਪਾਰ ਕਰਨ ਦਾ ਦੋਸ਼ ਲਗਾਉਂਦਿਆਂ ਆਰਥਿਕ ਕਦਮ ਚੁੱਕੇ ਹਨ, ਜਿਵੇਂ ਕਿ ਯਾਤਰਾ/ਸਿੱਖਿਆ ਚਿਤਾਵਨੀਆਂ ਅਤੇ ਜਾਪਾਨੀ ਸਮੁੰਦਰੀ ਭੋਜਨ ਆਯਾਤ 'ਤੇ ਰੋਕ।
