''ਆਪਰੇਸ਼ਨ ਸਾਗਰ ਬੰਧੂ'': ਸ਼੍ਰੀਲੰਕਾ ਨੂੰ ਮਦਦ ਪਹੁੰਚਾਉਣ ਲਈ ਹਵਾਈ ਫ਼ੌਜ ਨੇ ਤਾਇਨਾਤ ਕੀਤੇ ਜਹਾਜ਼
Saturday, Nov 29, 2025 - 05:27 PM (IST)
ਨੈਸ਼ਨਲ ਡੈਸਕ- ਭਾਰਤ ਨੇ 'ਆਪਰੇਸ਼ਨ ਸਾਗਰ ਬੰਧੂ' ਦੇ ਤਹਿਤ ਚੱਕਰਵਾਤ ‘ਡਿਤਵਾ’ ਨਾਲ ਪ੍ਰਭਾਵਿਤ ਸ਼੍ਰੀਲੰਕਾ ਨੂੰ ਵੱਡੀ ਸਹਾਇਤਾ ਭੇਜੀ ਹੈ। ਇਸ ਮੁਹਿੰਮ ਅੰਦਰ ਭਾਰਤੀ ਹਵਾਈ ਫ਼ੌਜ ਦੇ 2 ਟਰਾਂਸਪੋਰਟ ਜਹਾਜ਼—C-130 ਅਤੇ IL-76—ਰਾਹਤ ਸਮੱਗਰੀ ਅਤੇ ਅਰਧਸੈਨਿਕ ਦਸਤਿਆਂ ਦੇ ਜਵਾਨਾਂ ਨਾਲ ਸ਼੍ਰੀਲੰਕਾ ਲਈ ਰਵਾਨਾ ਕੀਤੇ ਗਏ।
ਇਹ ਵੀ ਪੜ੍ਹੋ : ਲਹਿੰਦੇ ਪੰਜਾਬ 'ਚ ਭਾਰਤੀ ਨੌਜਵਾਨ ਗ੍ਰਿਫ਼ਤਾਰ ! ਗਲ਼ਤੀ ਨਾਲ ਪਾਰ ਕੀਤਾ ਬਾਰਡਰ ਤੇ ਫ਼ਿਰ...
ਹਵਾਈ ਫ਼ੌਜ ਨੇ ਸ਼ਨੀਵਾਰ ਨੂੰ ‘ਐਕਸ’ ’ਤੇ ਲਿਖਿਆ ਕਿ ਚੱਕਰਵਾਤ ਕਾਰਨ ਹੋਈ ਤਬਾਹੀ ਦੇ ਬਾਅਦ ਭਾਰਤ ਨੇ ਤੁਰੰਤ ਇਹ ਮਿਸ਼ਨ ਸ਼ੁਰੂ ਕੀਤਾ। 28/29 ਨਵੰਬਰ ਦੀ ਰਾਤ ਨੂੰ ਹਿੰਡਨ ਏਅਰਬੇਸ ਤੋਂ ਉੱਡੇ C-130 ਅਤੇ IL-76 ਜਹਾਜ਼ 21 ਟਨ ਰਾਹਤ ਸਮੱਗਰੀ, 80 ਤੋਂ ਵੱਧ ਐੱਨ.ਡੀ.ਆਰ.ਐੱਫ. ਜਵਾਨ ਅਤੇ 8 ਟਨ ਉਪਕਰਣ ਲੈ ਕੇ ਕੋਲੰਬੋ ਪਹੁੰਚੇ। ਅਧਿਕਾਰੀਆਂ ਦੇ ਅਨੁਸਾਰ, ਪ੍ਰਭਾਵਿਤ ਲੋਕਾਂ ਲਈ ਜ਼ਰੂਰੀ ਰਾਸ਼ਨ ਅਤੇ ਹੋਰ ਅਹਿਮ ਸਮੱਗਰੀ ਸ਼੍ਰੀਲੰਕਾ ਤਕ ਪਹੁੰਚਾਈ ਗਈ ਹੈ। ਹਵਾਈ ਫ਼ੌਜ ਨੇ ਕਿਹਾ ਕਿ ਭਾਰਤ "ਗੁਆਂਢੀ ਪਹਿਲਾਂ" ਦੀ ਨੀਤੀ ਅਨੁਸਾਰ ਇਸ ਮੁਸ਼ਕਲ ਵੇਲੇ ਸ਼੍ਰੀਲੰਕਾ ਦੇ ਨਾਲ ਖੜ੍ਹਾ ਹੈ।
ਵਿਦੇਸ਼ ਮੰਤਰੀ ਐੱਸ. ਜੈਸ਼ੰਕਰ ਨੇ ਵੀ ਤਾਜ਼ਾ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਹਵਾਈ ਫ਼ੌਜ ਦਾ ਇਕ ਹੋਰ IL-76 9 ਟਨ ਰਾਹਤ ਸਮੱਗਰੀ ਅਤੇ 80 ਐੱਨ.ਡੀ.ਆਰ.ਐੱਫ. ਜਵਾਨਾਂ ਦੀਆਂ 2 ਟੀਮਾਂ ਨੂੰ ਸ਼੍ਰੀਲੰਕਾ ਲੈ ਕੇ ਪਹੁੰਚਿਆ ਹੈ। ਉਨ੍ਹਾਂ ਦੇ ਅਨੁਸਾਰ, ਹੁਣ ਤੱਕ ਹਵਾਈ ਅਤੇ ਸਮੁੰਦਰੀ ਰਾਹੀਂ 27 ਟਨ ਤੋਂ ਵੱਧ ਰਾਹਤ ਸਮੱਗਰੀ ਭੇਜੀ ਜਾ ਚੁੱਕੀ ਹੈ ਅਤੇ ਹੋਰ ਸਹਾਇਤਾ ਰਸਤੇ ’ਚ ਹੈ।
ਪਹਿਲੀ ਖੇਪ ਨੇਵੀ ਰਾਹੀਂ
ਆਪਰੇਸ਼ਨ ਸਾਗਰ ਬੰਧੂ ਦੀ ਪਹਿਲੀ ਖੇਪ INS ਵਿਕਰਾਂਤ ਅਤੇ INS ਉਦਯਗਿਰੀ ਰਾਹੀਂ ਸ਼੍ਰੀਲੰਕਾ ਭੇਜੀ ਗਈ ਸੀ। ਸ਼੍ਰੀਲੰਕਾ ਦੇ ਅਧਿਕਾਰੀਆਂ ਮੁਤਾਬਕ, ਚੱਕਰਵਾਤ ਕਾਰਨ ਹੜ੍ਹ ਅਤੇ ਜ਼ਮੀਨ ਖਿਸਕਣ ਨਾਲ 50 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਕੁੱਲ 12,313 ਪਰਿਵਾਰਾਂ ਦੇ ਲਗਭਗ 43,900 ਲੋਕ ਖਰਾਬ ਮੌਸਮ ਕਾਰਨ ਪ੍ਰਭਾਵਿਤ ਹੋਏ ਹਨ।
