ਗਾਇਕ ਜ਼ੂਬੀਨ ਗਰਗ ਦੀ ਮੌਤ ਦਾ ਮਾਮਲਾ: ਸਿੰਗਾਪੁਰ ਦੀ ਅਦਾਲਤ 14 ਜਨਵਰੀ ਤੋਂ ਸ਼ੁਰੂ ਕਰੇਗੀ ''ਕੋਰੋਨਰ ਇਨਕੁਆਰੀ''
Monday, Dec 29, 2025 - 04:16 PM (IST)
ਸਿੰਗਾਪੁਰ (ਏਜੰਸੀ)- ਆਸਾਮ ਦੇ ਹਰਮਨ ਪਿਆਰੇ ਭਾਰਤੀ ਗਾਇਕ ਅਤੇ ਗੀਤਕਾਰ ਜ਼ੂਬੀਨ ਗਰਗ ਦੀ ਮੌਤ ਦੇ ਕਾਰਨਾਂ ਦੀ ਜਾਂਚ ਲਈ ਸਿੰਗਾਪੁਰ ਦੀ ਅਦਾਲਤ ਵਿੱਚ 14 ਜਨਵਰੀ ਤੋਂ 'ਕੋਰੋਨਰ ਇਨਕੁਆਰੀ' (Coroner's Inquiry) ਸ਼ੁਰੂ ਹੋਣ ਜਾ ਰਹੀ ਹੈ। ਅਦਾਲਤੀ ਰਿਕਾਰਡਾਂ ਅਨੁਸਾਰ, ਇਹ ਸੁਣਵਾਈ ਸਟੇਟ ਕੋਰਟਾਂ ਵਿੱਚ ਹੋਵੇਗੀ ਅਤੇ ਪੁਲਸ ਆਪਣੀ ਜਾਂਚ ਦੇ ਨਤੀਜੇ ਸਟੇਟ ਕੋਰੋਨਰ ਐਡਮ ਨਖੋਦਾ ਨੂੰ ਸੌਂਪੇਗੀ।
ਕਿਵੇਂ ਹੋਈ ਸੀ ਮੌਤ?
52 ਸਾਲਾ ਜ਼ੂਬੀਨ ਗਰਗ ਦੀ ਮੌਤ ਇਸੇ ਸਾਲ 19 ਸਤੰਬਰ ਨੂੰ ਸਿੰਗਾਪੁਰ ਵਿੱਚ ਹੋਈ ਸੀ, ਜਿੱਥੇ ਉਹ ਇੱਕ ਸੱਭਿਆਚਾਰਕ ਮੇਲੇ ਵਿੱਚ ਪੇਸ਼ਕਾਰੀ ਦੇਣ ਲਈ ਗਏ ਹੋਏ ਸਨ। ਉਹ ਸਿੰਗਾਪੁਰ ਦੇ ਸੇਂਟ ਜਾਨਜ਼ ਆਈਲੈਂਡ (St John's Island) ਦੇ ਤੱਟ ਕੋਲ ਸਮੁੰਦਰ ਵਿੱਚ ਤੈਰਾਕੀ ਕਰ ਰਹੇ ਸਨ, ਜਦੋਂ ਉਨ੍ਹਾਂ ਨਾਲ ਇਹ ਹਾਦਸਾ ਵਾਪਰਿਆ। ਪੁਲਸ ਨੂੰ ਮਿਲੀ ਸੂਚਨਾ ਤੋਂ ਬਾਅਦ ਉਨ੍ਹਾਂ ਨੂੰ ਬੇਹੋਸ਼ੀ ਦੀ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ।
ਪੁਲਸ ਜਾਂਚ ਅਤੇ ਸਾਜ਼ਿਸ਼ ਦਾ ਖਦਸ਼ਾ
ਸਿੰਗਾਪੁਰ ਪੁਲਸ ਨੇ ਹੁਣ ਤੱਕ ਦੀ ਜਾਂਚ ਦੇ ਆਧਾਰ 'ਤੇ ਕਿਹਾ ਹੈ ਕਿ ਉਨ੍ਹਾਂ ਨੂੰ ਇਸ ਮੌਤ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਸਾਜ਼ਿਸ਼ ਦਾ ਸ਼ੱਕ ਨਹੀਂ ਹੈ। ਪੁਲਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਗਾਇਕ ਦੀ ਮੌਤ ਬਾਰੇ ਅੰਦਾਜ਼ੇ ਜਾਂ ਅਫਵਾਹਾਂ ਨਾ ਫੈਲਾਉਣ। ਇਹ ਕੋਰੋਨਰ ਜਾਂਚ ਪ੍ਰਕਿਰਿਆ ਜਨਵਰੀ ਅਤੇ ਫਰਵਰੀ 2026 ਦੌਰਾਨ ਚੱਲਣ ਦੀ ਸੰਭਾਵਨਾ ਹੈ।
ਕੀ ਹੁੰਦੀ ਹੈ ਕੋਰੋਨਰ ਇਨਕੁਆਰੀ?
ਇਹ ਇੱਕ ਅਜਿਹੀ ਪ੍ਰਕਿਰਿਆ ਹੈ ਜਿਸ ਦੀ ਅਗਵਾਈ ਇਕ ਕੋਰੋਨਰ ਕਰਦਾ ਹੈ, ਜੋ ਇਕ ਨਿਆਂਇਕ ਅਧਿਕਾਰੀ ਹੁੰਦਾ ਹੈ, ਇਹ ਪਤਾ ਲਗਾਉਂਦਾ ਹੈ ਕਿ ਕਿਸੇ ਵਿਅਕਤੀ ਦੀ ਮੌਤ ਕਿਵੇਂ, ਕਦੋਂ ਅਤੇ ਕਿੱਥੇ ਹੋਈ। ਕਾਨੂੰਨ ਮੁਤਾਬਕ, ਕੋਰੋਨਰ ਦਾ ਕੰਮ ਕਿਸੇ 'ਤੇ ਅਪਰਾਧਿਕ ਜ਼ਿੰਮੇਵਾਰੀ ਪਾਉਣਾ ਨਹੀਂ, ਸਗੋਂ ਮੌਤ ਦੇ ਹਾਲਾਤਾਂ ਦੇ ਤੱਥ ਇਕੱਠੇ ਕਰਨਾ ਹੁੰਦਾ ਹੈ। ਇਹ ਸੁਣਵਾਈਆਂ ਅਕਸਰ ਖੁੱਲ੍ਹੀ ਅਦਾਲਤ ਵਿੱਚ ਹੁੰਦੀਆਂ ਹਨ। ਸੂਤਰਾਂ ਅਨੁਸਾਰ, ਆਸਾਮ ਅਤੇ ਪੂਰੇ ਭਾਰਤ ਵਿੱਚ ਉਨ੍ਹਾਂ ਦੇ ਪ੍ਰਸ਼ੰਸਕ ਇਸ ਜਾਂਚ ਦੇ ਨਤੀਜਿਆਂ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ ਤਾਂ ਜੋ ਉਨ੍ਹਾਂ ਦੀ ਮੌਤ ਦੀ ਅਸਲ ਵਜ੍ਹਾ ਸਾਹਮਣੇ ਆ ਸਕੇ।
