ਪਾਕਿ : ਸ਼੍ਰੀਲੰਕਾਈ ਨਾਗਰਿਕ ਨੂੰ ਬਚਾਉਣ ਲਈ ''ਸਾਥੀ'' ਨੇ ਭੀੜ ਨਾਲ ਕੀਤਾ ਸੀ ਮੁਕਾਬਲਾ (ਵੀਡੀਓ)

ਇਸਲਾਮਾਬਾਦ (ਬਿਊਰੋ): ਪਾਕਿਸਤਾਨ ਦੇ ਸਿਆਲਕੋਟ 'ਚ ਸ਼ੁੱਕਰਵਾਰ ਨੂੰ 49 ਸਾਲਾ ਸ਼੍ਰੀਲੰਕਾਈ ਨਾਗਰਿਕ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ। ਉਸ ਨੂੰ ਈਸ਼ਨਿੰਦਾ ਦੇ ਦੋਸ਼ ਵਿਚ ਭੀੜ ਨੇ ਕੁੱਟ-ਕੁੱਟ ਕੇ ਮਾਰ ਦਿੱਤਾ ਅਤੇ ਫਿਰ ਉਸ ਦੀ ਲਾਸ਼ ਨੂੰ ਅੱਗ ਲਗਾ ਦਿੱਤੀ। ਪੁਲਸ ਇਸ ਮਾਮਲੇ ਵਿੱਚ ਹੁਣ ਤੱਕ ਕਈ ਗ੍ਰਿਫ਼ਤਾਰੀਆਂ ਕਰ ਚੁੱਕੀ ਹੈ। ਸ਼ਨੀਵਾਰ ਨੂੰ ਇੱਕ ਵੀਡੀਓ ਸਾਹਮਣੇ ਆਇਆ ਜਿਸ ਵਿੱਚ ਇੱਕ ਫੈਕਟਰੀ ਮੈਨੇਜਰ ਨੂੰ ਭੀੜ ਦੁਆਰਾ ਸ਼੍ਰੀਲੰਕਾਈ ਨਾਗਰਿਕ 'ਤੇ ਹਮਲਾ ਕਰਦੇ ਦੇਖਿਆ ਜਾ ਸਕਦਾ ਹੈ। ਵੀਡੀਓ ਵਿੱਚ ਨਾਗਰਿਕ ਦਾ ਇੱਕ ਸਾਥੀ ਦੋਸਤ ਭੀੜ ਦੇ ਵਿਚਕਾਰ ਉਸਨੂੰ ਬਚਾਉਣ ਦੀ ਕੋਸ਼ਿਸ਼ ਕਰਦਾ ਦਿਖਾਈ ਦੇ ਰਿਹਾ ਹੈ।

ਇਸ ਵੀਡੀਓ ਨੂੰ ਪਾਕਿਸਤਾਨੀ ਅਖ਼ਬਾਰ 'ਡਾਨ' ਨੇ ਆਪਣੇ ਫੇਸਬੁੱਕ ਪੇਜ 'ਤੇ ਸ਼ੇਅਰ ਕੀਤਾ ਹੈ। ਨਿਊਜ਼ ਏਜੰਸੀ ਏਐਫਪੀ ਮੁਤਾਬਕ ਪੰਜਾਬ ਦੇ ਆਈਜੀਪੀ ਰਾਓ ਸਰਦਾਰ ਅਲੀ ਖਾਨ ਨੇ ਆਪਣੀ ਸ਼ੁਰੂਆਤੀ ਰਿਪੋਰਟ ਵਿੱਚ ਕਿਹਾ ਹੈ ਕਿ ਸ਼੍ਰੀਲੰਕਾਈ ਨਾਗਰਿਕ ਦੀਆਵਦਾਨਾ ਨੇ ਵਜ਼ੀਰਾਬਾਦ ਰੋਡ ਸਥਿਤ ਰਾਜਕੋ ਇੰਡਸਟਰੀਜ਼ ਦੇ ਕਰਮਚਾਰੀਆਂ ਨੂੰ ਕਿਹਾ ਸੀ ਕਿ ਉਹ ਵਿਦੇਸ਼ੀ ਵਫ਼ਦ ਦੇ ਆਉਣ ਤੋਂ ਪਹਿਲਾਂ ਫੈਕਟਰੀ ਦੀਆਂ ਸਾਰੀਆਂ ਮਸ਼ੀਨਾਂ ਤੋਂ ਸਟਿੱਕਰ ਹਟਾ ਦੇਣ। ਫੈਕਟਰੀ ਕਰਮਚਾਰੀਆਂ ਨੇ ਉਸ 'ਤੇ ਈਸ਼ਨਿੰਦਾ ਦਾ ਦੋਸ਼ ਲਾਉਂਦੇ ਹੋਏ ਫੈਕਟਰੀ ਕੰਪਲੈਕਸ 'ਚ ਪ੍ਰਦਰਸ਼ਨ ਕਰਨਾ ਸ਼ੁਰੂ ਕਰ ਦਿੱਤਾ।

ਭੀੜ ਵਿਚ ਸ਼ਾਮਲ ਹੋਏ ਸਥਾਨਕ ਲੋਕ
ਉਹਨਾਂ ਨੇ ਟ੍ਰੈਫਿਕ ਰੋਕ ਦਿੱਤੀ ਅਤੇ ਫੈਕਟਰੀ ਦੇ ਹੋਰ ਮਜ਼ਦੂਰ ਅਤੇ ਵੱਡੀ ਗਿਣਤੀ ਵਿੱਚ ਸਥਾਨਕ ਲੋਕ ਵੀ ਪ੍ਰਦਰਸ਼ਨ ਵਿੱਚ ਸ਼ਾਮਲ ਹੋਏ। ਜਲਦੀ ਹੀ ਦਰਜਨਾਂ ਦੀ ਭੀੜ ਸੈਂਕੜਿਆਂ ਵਿੱਚ ਬਦਲ ਗਈ ਅਤੇ ਦਿਆਵਦਾਨਾ 'ਤੇ ਹਮਲਾ ਕਰ ਦਿੱਤਾ। ਲਿੰਚਿੰਗ ਤੋਂ ਪਹਿਲਾਂ ਦੀ ਵੀਡੀਓ 'ਚ ਦੇਖਿਆ ਜਾ ਸਕਦਾ ਹੈ ਕਿ ਦਿਆਵਦਾਨਾ ਦਾ ਇਕ ਸਾਥੀ ਫੈਕਟਰੀ ਦੀ ਛੱਤ 'ਤੇ ਭੀੜ ਤੋਂ ਉਸ ਨੂੰ ਬਚਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਅਤੇ ਦਰਜਨਾਂ ਲੋਕ ਆਲੇ-ਦੁਆਲੇ ਉਸ ਨੂੰ ਮਾਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ।

ਪੜ੍ਹੋ ਇਹ ਅਹਿਮ ਖਬਰ- ਮੱਧ ਮਾਲੀ 'ਚ ਨਾਗਰਿਕਾਂ 'ਤੇ ਹਮਲਾ, 31 ਲੋਕਾਂ ਦੀ ਮੌਤ ਤੇ ਦਰਜਨਾਂ ਜ਼ਖਮੀ

ਵੀਡੀਓ ਵਿਚ ਕਈ ਲੋਕਾਂ ਨੂੰ ਉੱਚੀ ਬੋਲਦੇ ਹੋਏ ਸੁਣਿਆ ਜਾ ਸਕਦਾ ਹੈ ਕਿ ਅੱਜ ਇਹ ਭੱਜ ਨਹੀਂ ਸਕੇਗਾ। ਸਾਥੀ ਨੇ ਦਿਆਵਦਾਨਾ ਨੂੰ ਬਚਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ ਪਰ ਅੰਤ ਵਿੱਚ ਉਹ ਅਸਫਲ ਰਿਹਾ। ਭੀੜ ਨੇ ਉਸ ਨੂੰ ਸੜਕ 'ਤੇ ਘੜੀਸਿਆ ਅਤੇ ਪੱਥਰਾਂ, ਲੋਹੇ ਦੀਆਂ ਰਾਡਾਂ ਅਤੇ ਲੱਤਾਂ ਨਾਲ ਕੁੱਟ-ਕੁੱਟ ਕੇ ਮਾਰ ਦਿੱਤਾ। ਇਸ ਮਗਰੋਂ ਭੀੜ ਨੇ ਲਾਸ਼ ਨੂੰ ਅੱਗ ਲਗਾ ਦਿੱਤੀ। ਸ਼੍ਰੀਲੰਕਾ ਦੇ ਕ੍ਰਿਸ਼ਚੀਅਨ ਪ੍ਰਿਅੰਤਾ ਕੁਮਾਰਾ ਦਿਆਵਦਾਨਾ ਰਾਜਕੋ ਇੰਡਸਟਰੀਜ਼ ਵਿੱਚ 10 ਸਾਲਾਂ ਤੋਂ ਕੰਮ ਕਰ ਰਿਹਾ ਸੀ। ਪਾਕਿਸਤਾਨ ਅਤੇ ਸ੍ਰੀਲੰਕਾ ਸਰਕਾਰ ਅਤੇ ਮਨੁੱਖੀ ਅਧਿਕਾਰ ਸੰਗਠਨਾਂ ਵੱਲੋਂ ਇਸ ਕਤਲ ਦੀ ਸਖ਼ਤ ਨਿੰਦਾ ਕੀਤੀ ਗਈ ਹੈ।