ਜਾਰਡਨ ਨੇ ਗਾਜ਼ਾ ਨੂੰ ਸਹਾਇਤਾ ਸਮੱਗਰੀ ਪਹੁੰਚਾਉਣ ਲਈ 16 ਹੈਲੀਕਾਪਟਰ ਭੇਜੇ

ਅੰਮਾਨ (ਏਜੰਸੀ)- ਇਜ਼ਰਾਈਲ ਅਤੇ ਹਮਾਸ ਵਿਚਕਾਰ ਜੰਗਬੰਦੀ ਅਤੇ ਬੰਧਕ ਰਿਹਾਈ ਸਮਝੌਤੇ ਤੋਂ ਬਾਅਦ ਗਾਜ਼ਾ ਨੂੰ ਸਹਾਇਤਾ ਭੇਜਣ ਦਾ ਸਿਲਸਿਲਾ ਜਾਰੀ ਹੈ। ਇਸੇ ਤਹਿਤ ਜਾਰਡਨ ਨੇ ਗਾਜ਼ਾ ਨੂੰ ਸਹਾਇਤਾ ਪਹੁੰਚਾਉਣ ਦੇ ਆਪਣੇ ਯਤਨਾਂ ਦੇ ਹਿੱਸੇ ਵਜੋਂ ਯੁੱਧ ਪ੍ਰਭਾਵਿਤ ਖੇਤਰ ਵਿੱਚ 16 ਸਹਾਇਤਾ ਹੈਲੀਕਾਪਟਰ ਭੇਜੇ ਹਨ। ਸਰਕਾਰੀ ਸੰਚਾਲਿਤ ਪੇਟਰਾ ਨਿਊਜ਼ ਏਜੰਸੀ ਦੇ ਹਵਾਲੇ ਨਾਲ ਰਿਪੋਰਟ ਦਿੱਤੀ ਗਈ ਹੈ ਕਿ ਹੈਲੀਕਾਪਟਰਾਂ ਵਿੱਚ 20 ਟਨ ਮਨੁੱਖੀ ਅਤੇ ਰਾਹਤ ਸਮੱਗਰੀ ਸੀ, ਜਿਸਨੂੰ ਜਾਰਡਨ ਹਾਸ਼ੇਮਾਈਟ ਚੈਰਿਟੀ ਆਰਗੇਨਾਈਜ਼ੇਸ਼ਨ ਅਤੇ ਕਈ ਹੋਰ ਦੇਸ਼ਾਂ ਦੇ ਸਹਿਯੋਗ ਨਾਲ ਭੇਜਿਆ ਗਿਆ ਹੈ।

ਜਾਰਡਨ ਨੇ ਗਾਜ਼ਾ ਨੂੰ ਸਹਾਇਤਾ ਪਹੁੰਚਾਉਣ ਦੇ ਤਰੀਕਿਆਂ ਵਿੱਚ ਲਗਾਤਾਰ ਵਿਭਿੰਨਤਾ ਲਿਆਂਦੀ ਹੈ, ਜਿਸ ਵਿੱਚ ਡਾਕਟਰੀ ਇਲਾਜ ਅਤੇ ਜ਼ਰੂਰੀ ਸਿਹਤ ਸੰਭਾਲ ਸਪਲਾਈ ਦੀ ਆਵਾਜਾਈ ਨੂੰ ਤੇਜ਼ ਕਰਨ ਲਈ ਫੌਜੀ ਹੈਲੀਕਾਪਟਰਾਂ ਦੀ ਵਰਤੋਂ ਸ਼ਾਮਲ ਹੈ। ਪੇਟਰਾ ਮੁਤਾਬਕ ਮਨੁੱਖੀ ਸਹਾਇਤਾ ਸਮੱਗਰੀ ਪਹੁੰਚਾਉਣ ਦਾ ਕੰਮ 8 ਦਿਨਾਂ ਤੱਕ ਜਾਰੀ ਰਹੇਗਾ, ਜਿਸ ਵਿੱਚ ਹਰ ਰੋਜ਼ 16 ਜਹਾਜ਼ ਉਡਾਣ ਭਰਣਗੇ।