ਸ੍ਰੀਲੰਕਾ ''ਚ ''ਦਿਤਵਾ'' ਚੱਕਰਵਾਤ ਦੀ ਤਬਾਹੀ! 4 ਲੱਖ ਦੇ ਕਰੀਬ ਕਾਮਿਆਂ ਦੀ ਰੋਜ਼ੀ-ਰੋਟੀ ਖ਼ਤਰੇ ''ਚ, 640 ਤੋਂ ਵੱਧ ਮੌਤਾਂ

ਕੋਲੰਬੋ : ਸ੍ਰੀਲੰਕਾ 'ਚ ਨਵੰਬਰ ਦੇ ਅਖੀਰ 'ਚ ਆਏ ਭਿਆਨਕ ਚੱਕਰਵਾਤ 'ਦਿਤਵਾ' ਨੇ ਦੇਸ਼ ਦੀ ਆਰਥਿਕਤਾ ਅਤੇ ਆਮ ਜਨਜੀਵਨ ਨੂੰ ਬੁਰੀ ਤਰ੍ਹਾਂ ਝੰਜੋੜ ਕੇ ਰੱਖ ਦਿੱਤਾ ਹੈ। ਅੰਤਰਰਾਸ਼ਟਰੀ ਕਿਰਤ ਸੰਗਠਨ (ILO) ਵੱਲੋਂ ਜਾਰੀ ਕੀਤੀ ਗਈ ਇੱਕ ਤਾਜ਼ਾ ਰਿਪੋਰਟ ਅਨੁਸਾਰ, ਇਸ ਕੁਦਰਤੀ ਆਫ਼ਤ ਕਾਰਨ ਸ੍ਰੀਲੰਕਾ 'ਚ ਲਗਭਗ 4 ਲੱਖ ਕਾਮੇ ਸਿੱਧੇ ਤੌਰ 'ਤੇ ਪ੍ਰਭਾਵਿਤ ਹੋਏ ਹਨ।

640 ਤੋਂ ਵੱਧ ਲੋਕਾਂ ਦੀ ਗਈ ਜਾਨ
ਰਿਪੋਰਟ ਮੁਤਾਬਕ ਇਸ ਚੱਕਰਵਾਤ ਕਾਰਨ ਹੁਣ ਤੱਕ 640 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਚੱਕਰਵਾਤ ਨੇ ਫਸਲਾਂ, ਚਾਹ ਦੇ ਬਾਗਾਂ ਅਤੇ ਦੇਸ਼ ਦੇ ਮਹੱਤਵਪੂਰਨ ਆਵਾਜਾਈ ਢਾਂਚੇ ਜਿਵੇਂ ਕਿ ਸੜਕਾਂ ਅਤੇ ਪੁਲਾਂ ਨੂੰ ਭਾਰੀ ਨੁਕਸਾਨ ਪਹੁੰਚਾਇਆ ਹੈ। ਆਈ.ਐੱਲ.ਓ. ਅਨੁਸਾਰ, ਚੱਕਰਵਾਤ ਪ੍ਰਭਾਵਿਤ ਖੇਤਰਾਂ 'ਚ ਰਹਿਣ ਵਾਲੀ ਆਬਾਦੀ ਲਗਭਗ 17 ਲੱਖ ਹੈ, ਜੋ ਸ੍ਰੀਲੰਕਾ ਦੀ ਕੁੱਲ ਆਬਾਦੀ ਦਾ ਲਗਭਗ 7.5 ਫੀਸਦੀ ਬਣਦੀ ਹੈ।

ਕਾਮਿਆਂ ਅਤੇ ਆਮਦਨ 'ਤੇ ਡੂੰਘਾ ਅਸਰ
ਪ੍ਰਭਾਵਿਤ ਖੇਤਰਾਂ 'ਚ ਲਗਭਗ 3.74 ਲੱਖ ਕਾਮੇ ਰਹਿੰਦੇ ਹਨ, ਜਿਨ੍ਹਾਂ ਦੀ ਰੋਜ਼ੀ-ਰੋਟੀ ਤੇ ਘਰੇਲੂ ਆਮਦਨ 'ਤੇ ਡੂੰਘਾ ਅਸਰ ਪਿਆ ਹੈ। ਪ੍ਰਭਾਵਿਤ ਕਾਮਿਆਂ ਦੇ ਅੰਕੜਿਆਂ ਦਾ ਵੇਰਵਾ ਹੇਠ ਲਿਖੇ ਅਨੁਸਾਰ ਹੈ।
• ਪੁਰਸ਼ ਕਾਮੇ: 2.44 ਲੱਖ
• ਮਹਿਲਾ ਕਾਮੇ: 1.30 ਲੱਖ

ਵੱਖ-ਵੱਖ ਖੇਤਰਾਂ 'ਚ ਨੁਕਸਾਨ
• ਸੇਵਾ ਖੇਤਰ: 1.64 ਲੱਖ ਰੁਜ਼ਗਾਰ ਪ੍ਰਭਾਵਿਤ
• ਉਦਯੋਗਿਕ ਖੇਤਰ: 1.25 ਲੱਖ ਰੁਜ਼ਗਾਰ ਪ੍ਰਭਾਵਿਤ
• ਖੇਤੀਬਾੜੀ ਖੇਤਰ: 85,000 ਨੌਕਰੀਆਂ ਪ੍ਰਭਾਵਿਤ

16 ਅਰਬ ਡਾਲਰ ਦਾ ਆਰਥਿਕ ਜੋਖਮ
ਚੱਕਰਵਾਤ ਤੋਂ ਬਾਅਦ ਆਏ ਹੜ੍ਹਾਂ ਅਤੇ ਜ਼ਮੀਨ ਖਿਸਕਣ ਕਾਰਨ ਦੇਸ਼ ਦੇ ਕੁੱਲ ਘਰੇਲੂ ਉਤਪਾਦ (GDP) ਦਾ ਲਗਭਗ 16 ਫੀਸਦੀ ਹਿੱਸਾ ਜੋਖਮ ਵਿੱਚ ਪੈ ਗਿਆ ਹੈ, ਜਿਸਦੀ ਕੀਮਤ ਕਰੀਬ 16 ਅਰਬ ਅਮਰੀਕੀ ਡਾਲਰ ਦੱਸੀ ਜਾ ਰਹੀ ਹੈ।

ਭਵਿੱਖ ਦੀ ਚੁਣੌਤੀ
ਆਈ.ਐੱਲ.ਓ. ਨੇ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਇਸ ਸਮੱਸਿਆ ਦਾ ਸਮੇਂ ਸਿਰ ਹੱਲ ਨਾ ਕੀਤਾ ਗਿਆ ਤਾਂ ਸਥਾਨਕ ਪੱਧਰ 'ਤੇ ਲੰਬੇ ਸਮੇਂ ਤੱਕ ਆਰਥਿਕ ਸੰਕਟ ਬਣਿਆ ਰਹਿ ਸਕਦਾ ਹੈ। ਇਹ ਸੰਕਟ ਅਜਿਹੇ ਸਮੇਂ ਆਇਆ ਹੈ ਜਦੋਂ ਸ੍ਰੀਲੰਕਾ ਪਹਿਲਾਂ ਹੀ ਕੋਵਿਡ-19, ਨਿਰਯਾਤ ਵਿੱਚ ਮੰਦੀ ਅਤੇ ਹੋਰ ਕਈ ਕਿਰਤ ਬਾਜ਼ਾਰ ਦੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰ ਰਿਹਾ ਹੈ। ਇਸ ਨਾਲ ਨਾ ਸਿਰਫ਼ ਰੁਜ਼ਗਾਰ ਖ਼ਤਰੇ ਵਿੱਚ ਪਿਆ ਹੈ, ਸਗੋਂ ਲੋਕਾਂ ਦੀ ਖੁਰਾਕ ਸੁਰੱਖਿਆ ਵੀ ਕਮਜ਼ੋਰ ਹੋਈ ਹੈ।