ਚੀਨ ''ਚ ਇਕੱਠੇ ਦਿਖਾਈ ਦਿੱਤੇ 3 ਸੂਰਜ, ਤਸਵੀਰਾਂ ਵਾਇਰਲ

ਬੀਜਿੰਗ (ਬਿਊਰੋ): ਪੂਰੀ ਦੁਨੀਆ ਜਦੋਂ ਨਵੇਂ ਸਾਲ ਦੇ ਜਸ਼ਨ ਦੀ ਤਿਆਰੀ ਵਿਚ ਲੱਗੀ ਸੀ ਉਦੋਂ ਚੀਨ ਦੇ ਲੋਕ ਹੈਰਾਨ ਕਰ ਦੇਣ ਵਾਲੀ ਕੁਦਰਤੀ ਘਟਨਾ ਦੇਖ ਰਹੇ ਸਨ।ਚੀਨ ਦੇ ਉੱਤਰ ਪੂਰਬ ਸਥਿਤ ਜਿਲਿਨ ਸੂਬੇ ਦੇ ਫੂਯੁ ਸ਼ਹਿਰ ਵਿਚ 31 ਦਸੰਬਰ 2019 ਨੂੰ ਇਕੱਠੇ 3 ਸੂਰਜ ਦਿਖਾਈ ਦਿੱਤੇ ਸਨ। ਇਸ ਘਟਨਾ ਨੂੰ ਲੋਕ ਚਮਤਕਾਰ ਮੰਨ ਰਹੇ ਸਨ ਪਰ ਇਹ ਇਕ ਵਿਗਿਆਨਿਕ ਘਟਨਾ ਹੈ ਜੋ ਇਕ ਖਾਸ ਹਾਲਤ ਵਿਚ ਹੁੰਦੀ ਹੈ। ਅੱਜ ਅਸੀਂ ਤੁਹਾਨੂੰ 3 ਸੂਰਜ ਇਕੱਠੇ ਦਿਸਣ ਦੇ ਪਿੱਛੇ ਦੇ ਕਾਰਨ ਬਾਰੇ ਦੱਸ ਰਹੇ ਹਾਂ।

ਚੀਨ ਵਿਚ 31 ਦਸੰਬਰ, 2019 ਦੀ ਸਵੇਰ ਨੂੰ ਕੁਝ ਜ਼ਿਆਦਾ ਹੀ ਰੋਸ਼ਨੀ ਦਿਖਾਈ ਦੇ ਰਹੀ ਸੀ। ਜਦੋਂ ਲੋਕ ਘਰੋਂ ਬਾਹਰ ਨਿਕਲੇ ਤਾਂ ਉਹਨਾਂ ਨੂੰ ਆਸਮਾਨ ਵਿਚ 3 ਸੂਰਜ ਦਿਖਾਈ ਦਿੱਤੇ। ਇਸ ਦ੍ਰਿਸ਼ ਨੂੰ ਦੇਖਣ ਲਈ ਲੋਕ ਸੜਕਾਂ 'ਤੇ ਆ ਗਏ। ਕੁਝ ਲੋਕ ਇਸ ਸ਼ਾਨਦਾਰ ਦ੍ਰਿਸ਼ ਦੀਆਂ ਤਸਵੀਰਾਂ ਵੀ ਲੈ ਰਹੇ ਸਨ।

ਚੀਨ ਦੇ ਉੱਤਰ ਪੂਰਬ ਸਥਿਤ ਜਿਲਿਨ ਸੂਬੇ ਦੇ ਫੂਯੁ ਸ਼ਹਿਰ ਵਿਚ ਜਿਹੜੇ 3 ਸੂਰਜ ਇਕੱਠੇ ਦਿਖਾਈ ਦੇ ਰਹੇ ਸਨ ਉਹਨਾਂ ਵਿਚ 2 ਅੱਧੇ ਦਿਸ ਰਹੇ ਸਨ ਜਦਕਿ ਵਿਚਕਾਰ ਪੂਰਾ ਸੂਰਜ ਸੀ। ਵਿਚਕਾਰ ਵਾਲੇ ਸੂਰਜ ਦੇ ਚਾਰੇ ਪਾਸੀਂ ਬਾਕੀ ਦੇ ਦੋ ਅੱਧੇ ਸੂਰਜਾਂ ਕਾਰਨ ਉਲਟੀ ਸਤਰੰਗੀ ਪੀਂਘ ਬਣੀ ਦਿਸ ਰਹੀ ਸੀ।

ਮੁੱਖ ਸੂਰਜ ਨਾਲ ਦਿਸ ਰਹੇ ਬਾਕੀ ਦੇ ਦੋ ਅੱਧੇ ਸੂਰਜ ਕਰੀਬ 20 ਮਿੰਟ ਤੱਕ ਆਸਮਾਨ ਵਿਚ ਰਹੇ ਅਤੇ ਫਿਰ ਗਾਇਬ ਹੋ ਗਏ। ਇਸ ਦੇ ਨਾਲ ਹੀ ਮੁੱਖ ਸੂਰਜ ਦੇ ਉੱਪਰ ਬਣੀ ਉਲਟੀ ਸਤਰੰਗੀ ਪੀਂਘ ਵੀ ਗਾਇਬ ਹੋ ਗਈ। ਵਿਗਿਆਨਕ ਭਾਸ਼ਾ ਵਿਚ ਇਸ ਨੂੰ ਸਨਡਾਗ (Sundog) ਕਹਿੰਦੇ ਹਨ। 

ਜਾਣੋ ਸਨਡਾਗ ਦੇ ਬਾਰੇ ਵਿਚ
ਸੂਰਜ ਨਿਕਲਣ ਅਤੇ ਛਿਪਣ ਦੇ ਸਮੇਂ ਸਨਡਾਗ ਬਣਦਾ ਹੈ। ਇਹ ਘਟਨਾ ਉਦੋਂ ਵਾਪਰਦੀ ਹੈ ਜਦੋਂ ਸੂਰਜ ਆਸਮਾਨ ਵਿਚ ਬਹੁਤ ਹੇਠਾਂ ਵੱਲ ਦਿਖਾਈ ਦਿੰਦਾ ਹੈ ਜਾਂ ਫਿਰ ਜਦੋਂ ਆਸਮਾਨ ਵਿਚ ਬਹੁਤ ਜ਼ਿਆਦਾ ਬੱਦਲ ਹੋਣ ਜਾਂ ਬਰਫ ਦੇ ਕਣ ਤੈਰ ਰਹੇ ਹੋਣ। ਇਹਨਾਂ ਕਣਾਂ ਨਾਲ ਜਦੋਂ ਸੂਰਜ ਦੀ ਰੋਸ਼ਨੀ ਟਕਰਾਉਂਦੀ ਹੈ ਤਾਂ ਤੁਹਾਨੂੰ ਤਿੰਨ-ਤਿੰਨ ਸੂਰਜ ਦਿਸਦੇ ਹਨ। ਨਾਲ ਹੀ ਉਸ ਦੇ ਉੱਪਰ ਉਲਟੀ ਸਤਰੰਗੀ ਪੀਂਘ ਬਣਦੀ ਹੈ।