ਅਜੀਬ ਮੁਕਾਬਲਾ! ''ਟਾਇਲਟ ਪੇਪਰ'' ਨਾਲ ਬਣਾਈ ਗਈ ਵੈਡਿੰਗ ਡਰੈੱਸ
10/04/2019 1:01:46 PM
ਵਾਸ਼ਿੰਗਟਨ (ਬਿਊਰੋ)— ਵਰਤਮਾਨ ਸਮੇਂ ਵਿਚ ਕਈ ਤਰ੍ਹਾਂ ਦੇ ਮੁਕਾਬਲਿਆਂ ਦਾ ਆਯੋਜਨ ਕੀਤਾ ਜਾਂਦਾ ਹੈ। ਅੱਜ ਅਸੀਂ ਤੁਹਾਨੂੰ ਜਿਹੜੇ ਮੁਕਾਬਲੇ ਬਾਰੇ ਦੱਸ ਰਹੇ ਹਾਂ ਉਸ ਬਾਰੇ ਜਾਣ ਕੇ ਤੁਹਾਨੂੰ ਹੈਰਾਨੀ ਜ਼ਰੂਰ ਹੋਵੇਗੀ। ਅਸਲ ਵਿਚ ਅਮਰੀਕਾ ਦੇ ਸ਼ਹਿਰ ਨਿਊਯਾਰਕ ਵਿਚ 'ਟਾਇਲਟ ਪੇਪਰ' ਨਾਲ ਵੈਡਿੰਗ ਡਰੈੱਸ ਬਣਾਉਣ ਦਾ ਮੁਕਾਬਲਾ ਕਰਵਾਇਆ ਗਿਆ। ਸ਼ੁਰੂ ਵਿਚ 1500 ਭਾਗੀਦਾਰਾਂ ਨੇ ਇਸ ਵਿਚ ਆਪਣੀਆਂ ਐਂਟਰੀਜ਼ ਭੇਜੀਆਂ।
30 ਸਤੰਬਰ ਨੂੰ ਹੋਏ ਇਸ ਮੁਕਾਬਲੇ ਦੇ ਫਾਈਨਲ ਰਾਊਂਡ ਵਿਚ 15 ਭਾਗੀਦਾਰਾਂ ਦੀ ਚੋਣ ਹੋਈ। ਮੁਕਾਬਲੇ ਵਿਚ ਡਰੈੱਸ ਬਣਾਉਣ ਲਈ ਸਿਰਫ ਟਾਇਲਟ ਪੇਪਰ, ਟੇਪ, ਧਾਗੇ ਅਤੇ ਗਲੂ ਦੀ ਵਰਤੋਂ ਕੀਤੀ ਗਈ। ਸਾਊਥ ਕੈਰੋਲੀਨਾ ਦੀ ਮਿਤੋਜ਼ਾ ਹਾਸਕਾ ਦੀ ਪਹਿਨੀ ਡਰੈੱਸ ਨੂੰ ਸਭ ਤੋਂ ਸ਼ਾਨਦਾਰ ਐਲਾਨਿਆ ਗਿਆ। ਇਸ ਨੂੰ ਬਣਾਉਣ ਲਈ ਉਨ੍ਹਾਂ ਨੇ 48 ਰੋਲ ਟਾਇਲਟ ਪੇਪਰ ਵਰਤੇ।
ਇਸ ਡਰੈੱਸ ਨੂੰ ਬਣਾਉਣ ਵਿਚ 400 ਘੰਟੇ ਦਾ ਸਮਾਂ ਲੱਗਾ।ਮੁਕਾਬਲੇ ਵਿਚ ਜੇਤੂ ਰਹੀ ਮਿਤੋਜ਼ਾ ਹਾਸਕਾ ਨੂੰ 7 ਲੱਖ ਰੁਪਏ (10,000 ਡਾਲਰ) ਦੀ ਰਾਸ਼ੀ ਇਨਾਮ ਦੇ ਤੌਰ 'ਤੇ ਕੀਤੀ ਗਈ। ਮੁਕਾਬਲੇ ਦਾ ਪ੍ਰਸਾਰਣ ਅਮਰੀਕਾ ਦੇ ਨੈਸ਼ਨਲ ਟੀਵੀ 'ਤੇ ਕੀਤਾ ਗਿਆ।