Health Tips: ਸਵੇਰ ਦੇ ਨਾਸ਼ਤੇ 'ਚ ਜ਼ਰੂਰ ਸ਼ਾਮਲ ਕਰੋ ਇਹ ਚੀਜ਼ਾਂ, ਸਰੀਰ ਰਹੇਗਾ ਹਮੇਸ਼ਾ ਫਿੱਟ ਤੇ ਸਿਹਤਮੰਦ
05/08/2023 4:57:55 PM
ਜਲੰਧਰ (ਬਿਊਰੋ) - ਸਾਡੀ ਸਿਹਤ ਦੇ ਲਈ ਸਵੇਰ ਦਾ ਨਾਸ਼ਤਾ ਬੇਹੱਦ ਜ਼ਰੂਰੀ ਹੈ। ਇਹ ਸਾਡੀ ਦਿਨ ਦੀ ਪਹਿਲੀ ਖ਼ੁਰਾਕ ਹੈ। ਸਾਰਾ ਦਿਨ ਕੰਮ ਕਰਨ ਲਈ ਸਾਡੇ ਸਰੀਰ ਨੂੰ ਊਰਜਾ ਦੀ ਲੋੜ ਹੁੰਦੀ ਹੈ, ਜੋ ਪੌਸ਼ਟਿਕ ਸਿਹਤਮੰਦ ਨਾਸ਼ਤੇ ਤੋਂ ਮਿਲਦੀ ਹੈ। ਅੱਜ ਦੇ ਸਮੇਂ 'ਚ ਲੋਕ ਭੱਜ-ਦੌੜ ਕਾਰਨ ਨਾਸ਼ਤਾ ਨਹੀਂ ਕਰਦੇ, ਜਿਸ ਨਾਲ ਕਈ ਬੀਮਾਰੀਆਂ ਲੱਗ ਜਾਂਦੀਆਂ ਹਨ। ਨਾਸ਼ਤਾ ਉਹ ਚੀਜ਼ ਹੈ, ਜਿਸ ਨੂੰ ਤੁਸੀਂ ਸਵੇਰੇ ਖਾ ਕੇ ਆਪਣੇ ਦਿਨ ਦੀ ਸ਼ੁਰੂਆਤ ਕਰ ਸਕਦੇ ਹੋ। ਨਾਸ਼ਤਾ ਕਰਨ ਨਾਲ ਮੋਟਾਪਾ, ਕਾਰਡੀਓਵੈਸਕੁਲਰ ਰੋਗ, ਟਾਈਪ-2 ਸ਼ੂਗਰ ਦਾ ਖ਼ਤਰਾ ਘੱਟ ਜਾਂਦਾ ਹੈ। ਇਸ ਤੋਂ ਇਲਾਵਾ ਬੱਚਿਆਂ ਦੀ ਯਾਦਦਾਸ਼ਤ ਨੂੰ ਤੇਜ਼ ਅਤੇ ਸਕੂਲ 'ਚ ਊਰਜਾਵਾਨ ਦਿਨ ਦੀ ਸ਼ੁਰੂਆਤ ਕਰਨ ਲਈ ਨਾਸ਼ਤਾ ਬਹੁਤ ਜ਼ਰੂਰੀ ਹੈ।
ਕਿਹੋ ਜਿਹਾ ਹੋਣਾ ਚਾਹੀਦਾ ਹੈ ਸਵੇਰ ਦਾ ਨਾਸ਼ਤਾ
ਯੂ.ਐੱਸ. ਖੁਰਾਕ ਮਾਹਿਰਾਂ ਅਨੁਸਾਰ ਨਾਸ਼ਤਾ ਹਮੇਸ਼ਾ 20 ਗ੍ਰਾਮ ਪ੍ਰੋਟੀਨ, 10 ਗ੍ਰਾਮ ਫਾਈਬਰ ਅਤੇ 10-15 ਗ੍ਰਾਮ ਅਸੰਤ੍ਰਿਪਤ ਚਰਬੀ ਵਾਲਾ ਹੋਣਾ ਚਾਹੀਦਾ ਹੈ। ਨਾਸ਼ਤੇ 'ਚ ਕਰੀਬ 300-350 ਕੈਲੋਰੀ ਜ਼ਰੂਰ ਖਾਓ। ਨਾਸ਼ਤੇ 'ਚ ਇਸ ਤੋਂ ਜ਼ਿਆਦਾ ਚੀਜ਼ਾਂ ਖਾਣ ਨਾਲ ਨੁਕਸਾਨ ਹੋ ਸਕਦਾ ਹੈ। ਨਾਸ਼ਤੇ 'ਚ ਤੁਸੀਂ ਕਿੰਨਾ ਨਿਊਟ੍ਰੀਸ਼ੰਸ ਲੈਣਾ ਹੈ, ਇਹ ਤੁਹਾਡੀ ਉਮਰ, ਲਿੰਗ, ਭਾਰ ਅਤੇ ਗਤੀਵਿਧੀ ਦੇ ਪੱਧਰ 'ਤੇ ਨਿਰਭਰ ਕਰਦਾ ਹੈ। ਕਿਹੜੀਆਂ ਚੀਜ਼ਾਂ ਤੁਹਾਡੇ ਸਰੀਰ ਨੂੰ ਊਰਜਾ ਦਿੰਦੀਆਂ ਹਨ ਅਤੇ ਕਿਹੜੀਆਂ ਚੀਜ਼ਾਂ ਖਾਣ ਨਾਲ ਤੁਸੀਂ ਆਨੰਦ ਲੈਂਦੇ ਹੋ, ਇਸ ਨਾਲ ਤੁਹਾਡੀ ਸਿਹਤ ਬਹੁਤ ਪ੍ਰਭਾਵਿਤ ਹੋਵੇਗੀ।
ਪ੍ਰੋਟੀਨ
ਤੁਸੀਂ ਨਾਸ਼ਤੇ ਵਿਚ ਕਿੰਨਾ ਪ੍ਰੋਟੀਨ ਖਾਂਦੇ ਹੋ, ਇਹ ਤੁਹਾਡੀ ਸਿਹਤ 'ਤੇ ਨਿਰਭਰ ਕਰਦਾ ਹੈ। ਕੁਝ ਲੋਕਾਂ ਦੀ ਆਦਤ ਹੁੰਦੀ ਹੈ ਕਿ ਉਹ ਦਿਨ ਭਰ ਪ੍ਰੋਟੀਨ ਖਾਂਦੇ ਹਨ ਪਰ ਨਾਸ਼ਤੇ 'ਚ ਪ੍ਰੋਟੀਨ ਬਿਲਕੁਲ ਨਹੀਂ ਖਾਂਦੇ। ਸਰੀਰ ਦੀਆਂ ਮਾਸਪੇਸ਼ੀਆਂ ਨੂੰ ਮਜ਼ਬੂਤ ਬਣਾਉਣ ਲਈ ਪ੍ਰੋਟੀਨ ਬਹੁਤ ਜ਼ਰੂਰੀ ਹੈ। ਆਪਣੇ ਭੋਜਨ ਵਿੱਚ ਘੱਟੋ-ਘੱਟ 25-35 ਗ੍ਰਾਮ ਪ੍ਰੋਟੀਨ ਜ਼ਰੂਰੀ ਲਓ। ਜੇਕਰ ਤੁਸੀਂ ਜ਼ਿਆਦਾ ਪ੍ਰੋਟੀਨ ਦਾ ਸੇਵਨ ਕਰਦੇ ਹੋ, ਤਾਂ ਤੁਹਾਡਾ ਸਰੀਰ ਇਸ ਨੂੰ ਚਰਬੀ ਦੇ ਰੂਪ ਵਿੱਚ ਸਟੋਰ ਕਰਦਾ ਹੈ।
ਪੌਸ਼ਟਿਕ ਤੱਤ
ਨਾਸ਼ਤੇ 'ਚ ਕੈਲਸ਼ੀਅਮ, ਵਿਟਾਮਿਨ-ਡੀ, ਪੋਟਾਸ਼ੀਅਮ, ਫਾਈਬਰ ਵਰਗੇ ਪੌਸ਼ਟਿਕ ਤੱਤ ਹੋਣੇ ਬਹੁਤ ਜ਼ਰੂਰੀ ਹਨ। ਬਹੁਤ ਸਾਰੇ ਲੋਕ ਨਾਸ਼ਤੇ ਵਿੱਚ ਇਹ ਸਾਰੀਆਂ ਚੀਜ਼ਾਂ ਛੱਡ ਦਿੰਦੇ ਹਨ, ਜਿਸ ਨਾਲ ਹੋਰ ਸਿਹਤ ਸਮੱਸਿਆਵਾਂ ਪੈਦਾ ਹੋ ਸਕਦੀਆਂ ਹਨ। ਇਨ੍ਹਾਂ ਸਾਰੇ ਪੋਸ਼ਕ ਤੱਤਾਂ ਦੀ ਘਾਟ ਕਾਰਨ ਹੱਡੀਆਂ ਕਮਜ਼ੋਰ ਹੋ ਜਾਂਦੀਆਂ ਹਨ। ਪਾਚਨ ਕਿਰਿਆ ਠੀਕ ਨਹੀਂ ਰਹਿੰਦੀ ਅਤੇ ਬਲੱਡ ਪ੍ਰੈਸ਼ਰ ਹਾਈ ਹੋ ਜਾਂਦਾ ਹੈ। ਇਸੇ ਲਈ ਨਾਸ਼ਤੇ ਵਿਚ ਕੈਲਸ਼ੀਅਮ, ਵਿਟਾਮਿਨ-ਡੀ, ਪੋਟਾਸ਼ੀਅਮ ਵਰਗੀਆਂ ਚੀਜ਼ਾਂ ਜ਼ਰੂਰ ਸ਼ਾਮਲ ਕਰੋ। ਵਿਟਾਮਿਨ-ਡੀ ਅਨਾਜ ਵਿੱਚ ਪਾਇਆ ਜਾਂਦਾ ਹੈ, ਜਦੋਂ ਕਿ ਕੇਲੇ ਅਤੇ ਖੱਟੇ ਫਲਾਂ ਵਿੱਚ ਪੋਟਾਸ਼ੀਅਮ ਚੰਗੀ ਮਾਤਰਾ ਵਿੱਚ ਪਾਇਆ ਜਾਂਦਾ ਹੈ।
ਸਾਧਾਰਨ ਹੋਵੇ ਨਾਸ਼ਤਾ
ਬਹੁਤ ਸਾਰੇ ਲੋਕ ਨਾਸ਼ਤਾ ਇਸ ਲਈ ਵੀ ਛੱਡ ਦਿੰਦੇ ਹਨ ਕਿਉਂਕਿ ਉਨ੍ਹਾਂ ਕੋਲ ਨਾਸ਼ਤਾ ਕਰਨ ਦਾ ਸਮਾਂ ਨਹੀਂ ਹੁੰਦਾ ਹੈ, ਪਰ ਡਾਈਟੀਸ਼ੀਅਨ ਦੇ ਅਨੁਸਾਰ, ਤੁਹਾਨੂੰ ਨਾਸ਼ਤੇ ਵਿੱਚ ਉਹੀ ਚੀਜ਼ਾਂ ਖਾਣੀਆਂ ਚਾਹੀਦੀਆਂ ਹਨ ਜੋ ਤੁਹਾਨੂੰ ਦਿਨ ਭਰ ਊਰਜਾਵਾਨ ਰੱਖਣਗੀਆਂ। ਇਸ ਤੋਂ ਇਲਾਵਾ, ਤੁਸੀਂ ਰਾਤ ਤੋਂ ਬਚੀ ਹੋਈ ਸਬਜ਼ੀਆਂ ਨੂੰ ਗ੍ਰਿਲ ਕਰਕੇ ਅਤੇ ਰੋਲ ਵਿਚ ਲਪੇਟ ਕੇ ਵੀ ਲੈ ਸਕਦੇ ਹੋ। ਸਿਹਤਮੰਦ ਨਾਸ਼ਤਾ ਕਰਨ ਤੋਂ ਇਲਾਵਾ, ਜੇਕਰ ਤੁਸੀਂ ਸਵੇਰੇ ਜਲਦੀ ਉੱਠਦੇ ਹੋ, ਕਸਰਤ ਕਰੋ, ਬਾਹਰ ਜਾਣ ਤੋਂ ਪਹਿਲਾਂ ਕੁਝ ਖਾਓ। ਇਸ ਤੋਂ ਇਲਾਵਾ ਆਪਣੇ ਭੋਜਨ ਦਾ ਆਨੰਦ ਲਓ ਅਤੇ ਭੁੱਖ ਲੱਗਣ 'ਤੇ ਭੋਜਨ ਖਾਓ ਅਤੇ ਪੇਟ ਭਰਿਆ ਹੋਣ 'ਤੇ ਖਾਣਾ ਬਿਲਕੁਲ ਨਾ ਖਾਓ। ਇਸ ਤਰ੍ਹਾਂ ਤੁਸੀਂ ਇੱਕ ਸਿਹਤਮੰਦ ਰੁਟੀਨ ਦੀ ਪਾਲਣਾ ਕਰ ਸਕਦੇ ਹੋ।
