Alert! ਸਰਦੀਆਂ ''ਚ ਵਧ ਜਾਂਦੇ ਹਨ Heart Attack ਦੇ ਮਾਮਲੇ, ਇਨ੍ਹਾਂ ਲੱਛਣਾਂ ਨੂੰ ਨਾ ਕਰੋ Ignore

ਹੈਲਥ ਡੈਸਕ- ਸਰਦੀਆਂ ਦੇ ਮੌਸਮ 'ਚ ਹਾਰਟ ਅਟੈਕ ਅਤੇ ਕਾਰਡੀਅਕ ਐਮਰਜੈਂਸੀ ਦੇ ਮਾਮਲੇ ਤੇਜ਼ੀ ਨਾਲ ਵਧਦੇ ਦੇਖੇ ਜਾ ਰਹੇ ਹਨ। ਕਾਰਡੀਓਲੋਜਿਸਟਾਂ ਦੇ ਅਨੁਸਾਰ, ਠੰਢ ਦਾ ਸਿੱਧਾ ਅਸਰ ਸਰੀਰ ਅਤੇ ਦਿਲ ’ਤੇ ਪੈਂਦਾ ਹੈ। ਤਾਪਮਾਨ ਘਟਣ ਨਾਲ ਖੂਨ ਗਾੜ੍ਹਾ ਹੋ ਜਾਂਦਾ ਹੈ ਅਤੇ ਬਲੱਡ ਪ੍ਰੈਸ਼ਰ (BP) 'ਚ ਉਤਾਰ-ਚੜ੍ਹਾਅ ਆਉਂਦਾ ਹੈ, ਜਿਸ ਕਾਰਨ ਖ਼ਾਸ ਕਰਕੇ ਰਾਤ ਦੇ ਸਮੇਂ ਦਿਲ ਦੇ ਦੌਰੇ ਦੇ ਮਾਮਲੇ ਵਧ ਜਾਂਦੇ ਹਨ। ਹਾਲਾਂਕਿ ਸਹੀ ਸਾਵਧਾਨੀ, ਐਕਟਿਵ ਜੀਵਨਸ਼ੈਲੀ ਅਤੇ ਸਮੇਂ-ਸਿਰ ਜਾਂਚ ਨਾਲ ਇਸ ਖ਼ਤਰੇ ਨੂੰ ਕਾਫ਼ੀ ਹੱਦ ਤੱਕ ਘਟਾਇਆ ਜਾ ਸਕਦਾ ਹੈ।

ਸਰਦੀਆਂ ’ਚ ਹਾਰਟ ਅਟੈਕ ਦਾ ਖ਼ਤਰਾ ਕਿਉਂ ਵਧਦਾ ਹੈ?

ਠੰਢ ਪੈਂਦਿਆਂ ਹੀ ਖੂਨ ਦੀਆਂ ਨਾੜੀਆਂ (ਬਲੱਡ ਵੈਸਲਜ਼) ਸਿਕੁੜ ਜਾਂਦੀਆਂ ਹਨ, ਜਿਸ ਨਾਲ ਬਲੱਡ ਪ੍ਰੈਸ਼ਰ ਵਧਦਾ ਹੈ ਅਤੇ ਦਿਲ ’ਤੇ ਵੱਧ ਦਬਾਅ ਪੈਂਦਾ ਹੈ। ਸਰਦੀਆਂ 'ਚ ਪਸੀਨਾ ਘੱਟ ਨਿਕਲਦਾ ਹੈ ਅਤੇ ਲੋਕ ਪਾਣੀ ਵੀ ਘੱਟ ਪੀਂਦੇ ਹਨ, ਜਿਸ ਨਾਲ ਖੂਨ ਕੁਝ ਗਾੜ੍ਹਾ ਹੋ ਜਾਂਦਾ ਹੈ ਅਤੇ ਕਲਾਟ ਬਣਨ ਦਾ ਖ਼ਤਰਾ ਵਧ ਜਾਂਦਾ ਹੈ। ਇਸ ਮੌਸਮ 'ਚ BP ਕੁਦਰਤੀ ਤੌਰ ’ਤੇ ਉੱਚਾ ਰਹਿੰਦਾ ਹੈ, ਨਾਲ ਹੀ ਤਲੇ-ਭੁੰਨੇ ਅਤੇ ਮਿੱਠੇ ਪਦਾਰਥ ਵੱਧ ਖਾਣ ਕਾਰਨ ਕੋਲੈਸਟ੍ਰੋਲ ਲੈਵਲ ਵੀ ਵਧ ਸਕਦਾ ਹੈ। ਠੰਢ ਕਾਰਨ ਕਸਰਤ ਘੱਟ ਹੋ ਜਾਂਦੀ ਹੈ, ਜਿਸ ਨਾਲ ਵਜ਼ਨ, ਸ਼ੂਗਰ ਅਤੇ BP ਵਿਗੜ ਸਕਦੇ ਹਨ—ਇਹ ਸਾਰੇ ਦਿਲ ਲਈ ਖ਼ਤਰਨਾਕ ਹਨ।

ਕਾਰਡੀਓਲੋਜਿਸਟਾਂ ਵੱਲੋਂ ਬਚਾਅ ਲਈ ਟਿਪਸ

ਸਰੀਰ ਗਰਮ ਰੱਖੋ: ਪਰਤਾਂ 'ਚ ਕੱਪੜੇ ਪਹਿਨੋ, ਸਿਰ, ਛਾਤੀ ਅਤੇ ਹੱਥ-ਪੈਰ ਢੱਕ ਕੇ ਰੱਖੋ।

ਪਾਣੀ ਪੀਣਾ ਨਾ ਭੁੱਲੋ: ਸਰਦੀਆਂ 'ਚ ਵੀ ਪੂਰਾ ਪਾਣੀ ਪੀਓ, ਕੋਸਾ ਪਾਣੀ ਵਧੀਆ ਰਹਿੰਦਾ ਹੈ।

ਸਵੇਰੇ ਅਚਾਨਕ ਭਾਰੀ ਕਸਰਤ ਨਾ ਕਰੋ: ਪਹਿਲਾਂ ਹਲਕੀ ਸਟ੍ਰੈਚਿੰਗ ਕਰੋ, ਫਿਰ ਦਿਨ ਚੜ੍ਹਨ ’ਤੇ ਵਾਕ ਜਾਂ ਯੋਗ ਕਰੋ।

BP ਅਤੇ ਸ਼ੂਗਰ ਦੀ ਨਿਯਮਿਤ ਜਾਂਚ: ਸਰਦੀਆਂ 'ਚ BP ਅਚਾਨਕ ਵਧ ਸਕਦਾ ਹੈ, ਦਵਾਈਆਂ ਡਾਕਟਰ ਦੀ ਸਲਾਹ ਨਾਲ ਹੀ ਲਓ।

ਹਾਰਟ-ਫ੍ਰੈਂਡਲੀ ਡਾਇਟ ਅਪਣਾਓ: ਘੱਟ ਲੂਣ, ਘੱਟ ਤਲਿਆ-ਭੁੰਨਿਆ, ਫਲ, ਸਬਜ਼ੀਆਂ ਅਤੇ ਓਮੇਗਾ-3 ਵਾਲੇ ਭੋਜਨ ਸ਼ਾਮਲ ਕਰੋ; ਵੱਧ ਘਿਓ, ਮੱਖਣ ਅਤੇ ਮਿਠਆਈ ਤੋਂ ਬਚੋ।

ਸਿਗਰਟ ਅਤੇ ਸ਼ਰਾਬ ਤੋਂ ਦੂਰ ਰਹੋ: ਠੰਢ 'ਚ ਇਹ ਦਿਲ ’ਤੇ ਹੋਰ ਵੀ ਮਾੜਾ ਅਸਰ ਪਾਉਂਦੀਆਂ ਹਨ।

ਹਾਰਟ ਅਟੈਕ ਦੇ ਚਿਤਾਵਨੀ ਸੰਕੇਤ (ਅਣਦੇਖਾ ਨਾ ਕਰੋ)

• ਛਾਤੀ 'ਚ ਦਰਦ ਜਾਂ ਦਬਾਅ
• ਖੱਬੀ ਬਾਂਹ, ਜਬੜੇ ਜਾਂ ਪਿੱਠ 'ਚ ਦਰਦ
• ਸਾਹ ਚੜ੍ਹਨਾ
• ਠੰਢਾ ਪਸੀਨਾ, ਚੱਕਰ ਜਾਂ ਉਲਝਣ

ਇਹ ਲੱਛਣ ਨਜ਼ਰ ਆਉਣ ’ਤੇ ਤੁਰੰਤ ਹਸਪਤਾਲ ਪਹੁੰਚੋ, ਦੇਰੀ ਜਾਨਲੇਵਾ ਸਾਬਤ ਹੋ ਸਕਦੀ ਹੈ।