ਵੈੱਬ ਡੈਸਕ - ਅਕਸਰ ਲੋਕ ਸਨਸਕ੍ਰੀਨ ਦੀ ਵਰਤੋਂ ਸਿਰਫ਼ ਤੇਜ਼ ਧੁੱਪ ਜਾਂ ਬੀਚ 'ਤੇ ਜਾਣ ਸਮੇਂ ਹੀ ਕਰਦੇ ਹਨ ਪਰ ਮਾਹਿਰਾਂ ਅਨੁਸਾਰ ਇਹ ਇਕ ਬਹੁਤ ਵੱਡੀ ਗਲਤੀ ਹੈ। ਸਨਸਕ੍ਰੀਨ ਸਿਰਫ਼ ਧੁੱਪ ਤੋਂ ਬਚਾਅ ਹੀ ਨਹੀਂ ਕਰਦੀ, ਸਗੋਂ ਇਹ ਚਮੜੀ ਨੂੰ ਕਈ ਗੰਭੀਰ ਸਮੱਸਿਆਵਾਂ ਤੋਂ ਬਚਾਉਣ ਲਈ ਇਕ ਸੁਰੱਖਿਆ ਕਵਚ ਵਜੋਂ ਕੰਮ ਕਰਦੀ ਹੈ। ਚਾਹੇ ਧੁੱਪ ਹੋਵੇ ਜਾਂ ਬੱਦਲਵਾਈ, ਸਨਸਕ੍ਰੀਨ ਲਗਾਉਣਾ ਰੋਜ਼ਾਨਾ ਦੀ ਸਕਿਨ ਦੀ ਦੇਖਭਾਲ ਦਾ ਅਹਿਮ ਹਿੱਸਾ ਹੋਣਾ ਚਾਹੀਦਾ ਹੈ।

ਸਨਸਕ੍ਰੀਨ ਲਗਾਉਣੀ ਕਿਉਂ ਹੈ ਜ਼ਰੂਰੀ?

ਹਾਨੀਕਾਰਕ UV ਕਿਰਨਾਂ ਤੋਂ ਬਚਾਅ
- ਸੂਰਜ ਦੀਆਂ ਅਲਟਰਾਵਾਇਲਟ (UV) ਕਿਰਨਾਂ ਚਮੜੀ ਨੂੰ ਡੂੰਘਾਈ ਨਾਲ ਨੁਕਸਾਨ ਪਹੁੰਚਾਉਂਦੀਆਂ ਹਨ। ਸਨਸਕ੍ਰੀਨ ਇਨ੍ਹਾਂ ਕਿਰਨਾਂ ਨੂੰ ਸਕਿਨ 'ਚ ਦਾਖਲ ਹੋਣ ਤੋਂ ਰੋਕਦੀ ਹੈ।

ਸਮੇਂ ਤੋਂ ਪਹਿਲਾਂ ਬੁਢਾਪਾ 
- ਧੁੱਪ ਦੇ ਸੰਪਰਕ 'ਚ ਜ਼ਿਆਦਾ ਰਹਿਣ ਨਾਲ ਚਮੜੀ 'ਤੇ ਝੁਰੜੀਆਂ, ਫਾਈਨ ਲਾਈਨਾਂ ਅਤੇ ਕਾਲੇ ਧੱਬੇ ਜਲਦੀ ਪੈ ਜਾਂਦੇ ਹਨ। ਸਨਸਕ੍ਰੀਨ ਸਕਿਨ ਨੂੰ ਜਵਾਨ ਰੱਖਣ 'ਚ ਮਦਦ ਕਰਦੀ ਹੈ।

ਸਨਬਰਨ ਅਤੇ ਸਕਿਨ ਦਾ ਕੈਂਸਰ
- ਲੰਬੇ ਸਮੇਂ ਤੱਕ ਧੁੱਪ ਵਿੱਚ ਰਹਿਣ ਨਾਲ ਸਨਬਰਨ ਹੋ ਸਕਦਾ ਹੈ। ਇਸ ਤੋਂ ਇਲਾਵਾ, UV ਕਿਰਨਾਂ ਚਮੜੀ ਦੇ ਕੈਂਸਰ ਦਾ ਖਤਰਾ ਵੀ ਵਧਾਉਂਦੀਆਂ ਹਨ, ਜਿਸ ਤੋਂ ਬਚਾਅ ਲਈ ਸਨਸਕ੍ਰੀਨ ਬਹੁਤ ਜ਼ਰੂਰੀ ਹੈ।

ਚਮੜੀ ਦਾ ਰੰਗ ਇਕ ਸਮਾਨ ਰੱਖਣਾ
- ਧੁੱਪ ਕਾਰਨ ਚਮੜੀ ਕਾਲੀ ਪੈ ਜਾਂਦੀ ਹੈ ਅਤੇ ਕਈ ਵਾਰ ਚਿਹਰੇ 'ਤੇ ਅਸਮਾਨ ਰੰਗ ਹੋ ਜਾਂਦਾ ਹੈ। ਸਨਸਕ੍ਰੀਨ ਚਮੜੀ ਦੇ ਰੰਗ ਨੂੰ ਇੱਕ ਸਮਾਨ ਰੱਖਣ 'ਚ ਮਦਦ ਕਰਦੀ ਹੈ।

ਸਨਸਕ੍ਰੀਨ ਕਿਵੇਂ ਵਰਤੀਏ?
- ਘਰੋਂ ਬਾਹਰ ਨਿਕਲਣ ਤੋਂ 20 ਮਿੰਟ ਪਹਿਲਾਂ ਘੱਟੋ-ਘੱਟ SPF 30 ਵਾਲੀ ਸਨਸਕ੍ਰੀਨ ਲਗਾਓ ਅਤੇ ਜੇਕਰ ਤੁਸੀਂ ਜ਼ਿਆਦਾ ਸਮਾਂ ਬਾਹਰ ਬਿਤਾਉਂਦੇ ਹੋ, ਤਾਂ ਹਰ 2-3 ਘੰਟੇ ਬਾਅਦ ਇਸਨੂੰ ਦੁਬਾਰਾ ਲਗਾਓ।