ਕੋਈ ਪੜ੍ਹ ਰਿਹੈ ਤੁਹਾਡੀ WhatsApp ਨਿੱਜੀ ਚੈਟ? ਜਾਨਣ ਦਾ ਇਹ ਹੈ ਸਭ ਤੋਂ ਆਸਾਨ ਤਰੀਕਾ

ਨਵੀਂ ਦਿੱਲੀ : ਅੱਜ ਦੇ ਦੌਰ 'ਚ ਵ੍ਹਟਸਐਪ (WhatsApp) ਸਾਡੀ ਰੋਜ਼ਾਨਾ ਦੀ ਜ਼ਿੰਦਗੀ ਦਾ ਇੱਕ ਅਹਿਮ ਹਿੱਸਾ ਬਣ ਚੁੱਕਾ ਹੈ, ਜਿੱਥੇ ਨਿੱਜੀ ਗੱਲਬਾਤ ਤੋਂ ਲੈ ਕੇ ਕੰਮ ਦਾ ਜ਼ਰੂਰੀ ਡੇਟਾ ਤੇ ਓ.ਟੀ.ਪੀ. (OTP) ਵੀ ਆਉਂਦੇ ਹਨ। ਪਰ ਇੱਕ ਵੱਡਾ ਸਵਾਲ ਇਹ ਹੈ ਕਿ ਕੀ ਤੁਹਾਡੇ ਮੈਸੇਜ ਤੁਹਾਡੇ ਤੋਂ ਇਲਾਵਾ ਕੋਈ ਹੋਰ ਵੀ ਪੜ੍ਹ ਰਿਹਾ ਹੈ?

ਸਾਈਬਰ ਮਾਹਿਰਾਂ ਅਨੁਸਾਰ, ਲੋਕਾਂ ਵੱਲੋਂ ਵਰਤੀ ਜਾਂਦੀ ਮਾਮੂਲੀ ਢਿੱਲ ਕਾਰਨ ਤੁਹਾਡੇ ਵ੍ਹਟਸਐਪ ਦਾ ਐਕਸੈੱਸ ਕਿਸੇ ਹੋਰ ਨੂੰ ਵੀ ਮਿਲ ਸਕਦਾ ਹੈ। ਹਾਲਾਂਕਿ ਬਹੁਤ ਸਾਰੇ ਲੋਕ ਇਸ ਗੱਲ ਨੂੰ ਹਲਕੇ ਵਿੱਚ ਲੈਂਦੇ ਹਨ, ਪਰ ਸੱਚਾਈ ਇਹ ਹੈ ਕਿ ਵ੍ਹਟਸਐਪ ਸੈਟਿੰਗਜ਼ ਵਿੱਚ ਥੋੜ੍ਹੀ ਜਿਹੀ ਗਲਤੀ ਵੀ ਤੁਹਾਡੀਆਂ ਚੈਟਸ ਤੱਕ ਕਿਸੇ ਹੋਰ ਦੀ ਪਹੁੰਚ ਬਣਾ ਸਕਦੀ ਹੈ।

ਕੌਣ ਪੜ੍ਹ ਰਿਹਾ ਤੁਹਾਡੀਆਂ ਚੈਟਸ
ਵ੍ਹਟਸਐਪ 'ਤੇ ਜਾਸੂਸੀ (spying) ਦਾ ਸਭ ਤੋਂ ਆਮ ਅਤੇ ਖ਼ਤਰਨਾਕ ਤਰੀਕਾ 'ਲਿੰਕਡ ਡਿਵਾਈਸਿਜ਼' ਫੀਚਰ ਰਾਹੀਂ ਹੁੰਦਾ ਹੈ। ਇਹ ਜਾਣਨ ਲਈ ਕਿ ਕੋਈ ਤੁਹਾਡੀਆਂ ਚੈਟਸ ਪੜ੍ਹ ਰਿਹਾ ਹੈ ਜਾਂ ਨਹੀਂ, ਤੁਹਾਨੂੰ ਵ੍ਹਟਸਐਪ ਦੀਆਂ ਸੈਟਿੰਗਜ਼ (Settings) ਓਪਨ ਕਰਕੇ 'ਲਿੰਕਡ ਡਿਵਾਈਸਿਜ਼' (Linked Devices) ਵਿਕਲਪ ਵਿੱਚ ਜਾਣਾ ਪਵੇਗਾ। ਜੇਕਰ ਤੁਹਾਨੂੰ ਉੱਥੇ ਕੋਈ ਅਜਿਹਾ ਡਿਵਾਈਸ ਦਿਖਾਈ ਦਿੰਦਾ ਹੈ ਜਿਸ ਨੂੰ ਤੁਸੀਂ ਖੁਦ ਨਹੀਂ ਵਰਤਿਆ ਹੈ, ਤਾਂ ਇਸਦਾ ਮਤਲਬ ਹੈ ਕਿ ਤੁਹਾਡੀ ਚੈਟ ਕੋਈ ਹੋਰ ਪੜ੍ਹ ਰਿਹਾ ਹੈ। ਆਮ ਤੌਰ 'ਤੇ ਲੋਕ ਇਸ ਸੈਟਿੰਗ ਨੂੰ ਨਿਯਮਤ ਤੌਰ 'ਤੇ ਚੈੱਕ ਨਹੀਂ ਕਰਦੇ, ਜਿਸ ਕਾਰਨ ਲੰਬੇ ਸਮੇਂ ਤੱਕ ਕਿਸੇ ਹੋਰ ਵੱਲੋਂ ਵ੍ਹਟਸਐਪ ਚੈਟਸ ਪੜ੍ਹੀਆਂ ਜਾਂਦੀਆਂ ਹਨ।

ਜਾਸੂਸੀ ਦੇ ਹੋਰ ਖਤਰਨਾਕ ਤਰੀਕੇ
1. WhatsApp Web ਅਤੇ Linked Devices: ਜਦੋਂ ਕੋਈ ਤੁਹਾਡਾ ਫੋਨ ਸਿਰਫ਼ ਇੱਕ ਮਿੰਟ ਲਈ ਵੀ ਫੜ ਲੈਂਦਾ ਹੈ, ਤਾਂ ਉਹ ਤੁਹਾਡਾ ਪੂਰਾ ਵ੍ਹਟਸਐਪ ਕਿਤੇ ਵੀ ਲਾਗਇਨ ਕਰ ਸਕਦਾ ਹੈ। 'ਲਿੰਕਡ ਡਿਵਾਈਸਿਜ਼' ਫੀਚਰ ਕਾਰਨ, ਨਾ ਸਿਰਫ਼ ਵ੍ਹਟਸਐਪ ਵੈੱਬ 'ਤੇ, ਸਗੋਂ ਕੋਈ ਦੂਜਾ ਵਿਅਕਤੀ ਤੁਹਾਡੇ ਵ੍ਹਟਸਐਪ ਨੂੰ ਆਪਣੇ ਮੋਬਾਈਲ 'ਤੇ ਵੀ ਐਕਸੈੱਸ ਕਰ ਸਕਦਾ ਹੈ।

2. ਸਪਾਈਵੇਅਰ ਦਾ ਖ਼ਤਰਾ: ਕਈ ਸਮਾਰਟਫ਼ੋਨਾਂ ਦੇ ਬੈਕਗਰਾਊਂਡ 'ਚ ਸਪਾਈਵੇਅਰ (Spyware) ਚੱਲਦੇ ਰਹਿੰਦੇ ਹਨ, ਜੋ ਤੁਹਾਡੀਆਂ ਵ੍ਹਟਸਐਪ ਚੈਟਸ, ਕਾਲ ਲੌਗ, ਲੋਕੇਸ਼ਨ, ਫੋਟੋਆਂ ਅਤੇ ਮਾਈਕ੍ਰੋਫੋਨ ਤੱਕ ਦਾ ਐਕਸੈੱਸ ਲੈ ਲੈਂਦੇ ਹਨ। ਇਸ ਨਾਲ ਤੁਹਾਡੀਆਂ ਨਿੱਜੀ ਜਾਣਕਾਰੀਆਂ ਖ਼ਤਰੇ ਵਿੱਚ ਪੈ ਜਾਂਦੀਆਂ ਹਨ।

3. ਕਲਾਊਡ ਬੈਕਅੱਪ ਰਾਹੀਂ: ਜੇਕਰ ਕਿਸੇ ਕੋਲ ਤੁਹਾਡੇ ਗੂਗਲ ਡਰਾਈਵ (Google Drive) ਜਾਂ ਆਈ.ਕਲਾਊਡ (iCloud) ਦਾ ਪਾਸਵਰਡ ਹੈ, ਤਾਂ ਉਹ ਤੁਹਾਡੀਆਂ ਚੈਟ ਹਿਸਟਰੀ ਨੂੰ ਡਾਊਨਲੋਡ ਕਰਕੇ ਤੁਹਾਡੇ ਮੈਸੇਜ ਪੜ੍ਹ ਸਕਦਾ ਹੈ, ਕਿਉਂਕਿ ਵ੍ਹਟਸਐਪ ਚੈਟਸ ਦਾ ਬੈਕਅੱਪ ਕਲਾਊਡ ਵਿੱਚ ਰਹਿੰਦਾ ਹੈ।

4. ਨੋਟੀਫਿਕੇਸ਼ਨ ਮਿਰਰਿੰਗ ਐਪਸ: ਕੁਝ ਫੋਨਾਂ ਵਿੱਚ ਅਜਿਹੀਆਂ ਸੈਟਿੰਗਾਂ ਜਾਂ ਥਰਡ-ਪਾਰਟੀ ਐਪਸ ਹੁੰਦੀਆਂ ਹਨ ਜੋ ਤੁਹਾਡੇ ਨੋਟੀਫਿਕੇਸ਼ਨਾਂ ਨੂੰ ਕਿਸੇ ਹੋਰ ਨੰਬਰ 'ਤੇ ਮਿਰਰ ਕਰ ਦਿੰਦੀਆਂ ਹਨ। ਐਂਡਰਾਇਡ ਫੋਨਾਂ ਵਿੱਚ ਇਹ ਪ੍ਰਣਾਲੀ ਕਾਫੀ ਆਮ ਹੈ।

ਇਸ ਲਈ, ਸੁਰੱਖਿਅਤ ਰਹਿਣ ਲਈ, ਵ੍ਹਟਸਐਪ ਯੂਜ਼ਰਜ਼ ਨੂੰ ਨਿਯਮਤ ਤੌਰ 'ਤੇ 'ਲਿੰਕਡ ਡਿਵਾਈਸਿਜ਼' ਸੈਕਸ਼ਨ ਚੈੱਕ ਕਰਦੇ ਰਹਿਣਾ ਚਾਹੀਦਾ ਹੈ।