ਮਹਿੰਗੇ ਸਮਾਰਟਫੋਨ ਵੱਲ ਵਧਿਆ ਰੁਝਾਨ, ਐਪਲ ਦੀ ਭਾਰਤ 'ਚ ਰਿਕਾਰਡ 28 ਫੀਸਦੀ ਮੁੱਲ ਹਿੱਸੇਦਾਰੀ

ਨਵੀਂ ਦਿੱਲੀ- ਪ੍ਰਮੁੱਖ ਤਕਨਾਲੋਜੀ ਕੰਪਨੀ ਐਪਲ (Apple) ਨੇ ਭਾਰਤੀ ਸਮਾਰਟਫੋਨ ਬਾਜ਼ਾਰ 'ਚ ਇਕ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। ਕਾਊਂਟਰਪੁਆਇੰਟ ਰਿਸਰਚ ਦੀ ਤਾਜ਼ਾ ਰਿਪੋਰਟ ਅਨੁਸਾਰ, ਐਪਲ ਨੇ ਭਾਰਤ 'ਚ 28 ਫੀਸਦੀ ਦੀ ਹੁਣ ਤੱਕ ਦੀ ਸਭ ਤੋਂ ਵੱਧ ਮੁੱਲ ਹਿੱਸੇਦਾਰੀ (Value Share) ਦਰਜ ਕੀਤੀ ਹੈ। ਇਹ ਉਪਲਬਧੀ ਭਾਰਤੀ ਖਪਤਕਾਰਾਂ 'ਚ ਮਹਿੰਗੇ ਅਤੇ ਪ੍ਰੀਮੀਅਮ ਡਿਵਾਈਸਾਂ ਦੇ ਵਧਦੇ ਰੁਝਾਨ ਕਾਰਨ ਸੰਭਵ ਹੋਈ ਹੈ।

ਆਈਫੋਨ 16 ਦੀ ਸਫਲਤਾ ਨੇ ਵਧਾਈ ਚਮਕ 

ਰਿਪੋਰਟ ਮੁਤਾਬਕ, ਸਾਲ 2024 'ਚ ਐਪਲ ਦੀ ਮੁੱਲ ਹਿੱਸੇਦਾਰੀ 23 ਫੀਸਦੀ ਸੀ, ਜੋ 2025 'ਚ ਵਧ ਕੇ 28 ਫੀਸਦੀ ਹੋ ਗਈ ਹੈ। ਆਈਫੋਨ 16 (iPhone 16) ਸੀਰੀਜ਼ ਦੀ ਭਾਰੀ ਸਫਲਤਾ, ਆਕਰਸ਼ਕ ਵਿੱਤੀ ਯੋਜਨਾਵਾਂ (EMI) ਅਤੇ 'ਐਕਸਚੇਂਜ ਆਫਰਾਂ' ਨੇ ਕੰਪਨੀ ਨੂੰ ਇਸ ਮੁਕਾਮ 'ਤੇ ਪਹੁੰਚਾਇਆ ਹੈ। ਖਾਸ ਗੱਲ ਇਹ ਹੈ ਕਿ ਸਾਲ 2025 'ਚ ਆਈਫੋਨ-16 ਭਾਰਤ 'ਚ ਸਭ ਤੋਂ ਵੱਧ ਆਯਾਤ (Import) ਕੀਤਾ ਜਾਣ ਵਾਲਾ ਮਾਡਲ ਰਿਹਾ ਹੈ।

ਪ੍ਰੀਮੀਅਮ ਫੋਨਾਂ ਦਾ ਵਧਿਆ ਕ੍ਰੇਜ਼ 

ਭਾਰਤੀ ਬਾਜ਼ਾਰ 'ਚ ਇਕ ਵੱਡਾ ਬਦਲਾਅ ਦੇਖਣ ਨੂੰ ਮਿਲ ਰਿਹਾ ਹੈ। ਹਾਲਾਂਕਿ ਫੋਨਾਂ ਦੀ ਵਿਕਰੀ ਦੀ ਗਿਣਤੀ 'ਚ ਵਾਧਾ ਸਥਿਰ ਹੈ, ਪਰ ਬਾਜ਼ਾਰ ਦਾ ਕੁੱਲ ਵਿਕਰੀ ਮੁੱਲ ਤੇਜ਼ੀ ਨਾਲ ਵਧ ਰਿਹਾ ਹੈ ਕਿਉਂਕਿ ਲੋਕ ਹੁਣ ਮਹਿੰਗੇ ਮਾਡਲ ਖਰੀਦ ਰਹੇ ਹਨ। 30,000 ਰੁਪਏ ਤੋਂ ਉੱਪਰ ਦਾ ਪ੍ਰੀਮੀਅਮ ਸੈਗਮੈਂਟ ਸਾਲ 2025 'ਚ 11 ਫੀਸਦੀ ਦੀ ਸਾਲਾਨਾ ਦਰ ਨਾਲ ਸਭ ਤੋਂ ਤੇਜ਼ੀ ਨਾਲ ਵਧਣ ਵਾਲਾ ਹਿੱਸਾ ਰਿਹਾ ਹੈ।

ਕਿਸ਼ਤਾਂ (EMI) 'ਤੇ ਫੋਨ ਖਰੀਦਣ ਦਾ ਵਧਿਆ ਰੁਝਾਨ 

ਖੁਦਰਾ ਬਾਜ਼ਾਰ 'ਚ ਸਮਾਰਟਫੋਨ ਦੀ ਕੁੱਲ ਵਿਕਰੀ ਦਾ 40 ਫੀਸਦੀ ਹਿੱਸਾ ਫਾਈਨਾਂਸਿੰਗ (EMI) ਰਾਹੀਂ ਆਇਆ ਹੈ। ਪ੍ਰੀਮੀਅਮ ਸੈਗਮੈਂਟ 'ਚ ਤਾਂ ਹਾਲਤ ਇਹ ਹੈ ਕਿ ਲਗਭਗ ਦੋ-ਤਿਹਾਈ ਖਰੀਦਦਾਰੀ ਕਿਸ਼ਤਾਂ ਰਾਹੀਂ ਕੀਤੀ ਜਾ ਰਹੀ ਹੈ। ਦੱਖਣੀ ਕੋਰੀਆਈ ਕੰਪਨੀ ਸੈਮਸੰਗ ਦਾ ਫੋਲਡੇਬਲ ਸਮਾਰਟਫੋਨ ਸੈਗਮੈਂਟ 'ਚ ਦਬਦਬਾ ਕਾਇਮ ਹੈ, ਜਿੱਥੇ ਉਸ ਨੇ 88 ਫੀਸਦੀ ਹਿੱਸੇਦਾਰੀ ਹਾਸਲ ਕੀਤੀ ਹੈ। ਵਿਕਰੀ ਦੀ ਗਿਣਤੀ ਦੇ ਲਿਹਾਜ਼ ਨਾਲ ਮੋਟੋਰੋਲਾ ਸਭ ਤੋਂ ਤੇਜ਼ੀ ਨਾਲ ਵਧਣ ਵਾਲਾ ਬ੍ਰਾਂਡ ਬਣ ਕੇ ਉਭਰਿਆ ਹੈ। ਕਾਊਂਟਰਪੁਆਇੰਟ ਰਿਸਰਚ ਦੇ ਨਿਰਦੇਸ਼ਕ ਤਰੁਣ ਪਾਠਕ ਅਨੁਸਾਰ, ਭਾਰਤੀ ਬਾਜ਼ਾਰ ਮੁੱਲ (Value) ਦੇ ਮਾਮਲੇ 'ਚ 8 ਫੀਸਦੀ ਦੀ ਦਰ ਨਾਲ ਵਧਿਆ ਹੈ, ਜੋ ਦਰਸਾਉਂਦਾ ਹੈ ਕਿ ਭਾਰਤੀ ਗਾਹਕ ਹੁਣ ਬਿਹਤਰ ਤਕਨਾਲੋਜੀ ਲਈ ਵੱਧ ਪੈਸੇ ਖਰਚਣ ਨੂੰ ਤਿਆਰ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e