ਰਿਲੀਜ਼ ਤੋਂ ਪਹਿਲਾਂ ਵਿਵਾਦ ''ਚ ਫਸੀ ਸ਼ਾਹਿਦ ਕਪੂਰ ਦੀ ''ਓ ਰੋਮੀਓ''! ਗੈਂਗਸਟਰ ਦੀ ਧੀ ਨੇ ਠੋਕਿਆ 1 ਕਰੋੜ ਦਾ ਦਾਅਵਾ

ਮੁੰਬਈ- ਬਾਲੀਵੁੱਡ ਸੁਪਰਸਟਾਰ ਸ਼ਾਹਿਦ ਕਪੂਰ ਦੀ ਆਉਣ ਵਾਲੀ ਫਿਲਮ 'ਓ ਰੋਮੀਓ' (O Romeo) ਰਿਲੀਜ਼ ਤੋਂ ਪਹਿਲਾਂ ਹੀ ਵੱਡੇ ਵਿਵਾਦਾਂ ਵਿੱਚ ਘਿਰ ਗਈ ਹੈ। ਗੈਂਗਸਟਰ ਹੁਸੈਨ ਉਸਤਾਰਾ ਦੀ ਬੇਟੀ ਸਨੋਬਰ ਸ਼ੇਖ ਨੇ ਫਿਲਮ ਨਿਰਮਾਤਾਵਾਂ ਦੇ ਖਿਲਾਫ ਬਿਨਾਂ ਇਜਾਜ਼ਤ ਆਪਣੇ ਪਿਤਾ ਦੀ ਕਹਾਣੀ ਦੀ ਵਰਤੋਂ ਕਰਨ ਦੇ ਦੋਸ਼ ਵਿੱਚ ਮੁੰਬਈ ਦੀ ਅਦਾਲਤ ਵਿੱਚ 1 ਕਰੋੜ ਰੁਪਏ ਦੇ ਹਰਜਾਨੇ ਦਾ ਮੁਕੱਦਮਾ ਦਾਇਰ ਕੀਤਾ ਹੈ।
ਬਿਨਾਂ ਇਜਾਜ਼ਤ ਕਹਾਣੀ ਦਿਖਾਉਣ ਦਾ ਇਲਜ਼ਾਮ
ਸਰੋਤਾਂ ਅਨੁਸਾਰ ਉਸਤਾਰਾ ਦੀ ਬੇਟੀ ਵੱਲੋਂ ਦਿੱਤੇ ਗਏ ਨੋਟਿਸ ਵਿੱਚ ਕਿਹਾ ਗਿਆ ਹੈ ਕਿ ਇਹ ਫਿਲਮ ਪ੍ਰਤੱਖ ਅਤੇ ਅਪ੍ਰਤੱਖ ਰੂਪ ਵਿੱਚ ਉਸਦੇ ਪਿਤਾ ਦੀ ਜ਼ਿੰਦਗੀ ਅਤੇ ਵਿਵਾਦਿਤ ਅਤੀਤ ਨਾਲ ਮਿਲਦੀ-ਜੁਲਦੀ ਹੈ। ਵਕੀਲ ਡੀ.ਵੀ. ਸਰੋਜ ਰਾਹੀਂ ਭੇਜੇ ਗਏ ਇਸ ਨੋਟਿਸ ਵਿੱਚ ਡਾਇਰੈਕਟਰ ਵਿਸ਼ਾਲ ਭਾਰਦਵਾਜ, ਰੋਹਨ ਨਰੂਲਾ (ਸਕ੍ਰੀਨ ਰਾਈਟਰ), ਨਾਡੀਆਡਵਾਲਾ ਗ੍ਰੈਂਡਸਨ ਐਂਟਰਟੇਨਮੈਂਟ ਅਤੇ ਸੈਂਟਰਲ ਬੋਰਡ ਆਫ ਫਿਲਮ ਸਰਟੀਫਿਕੇਸ਼ਨ (CBFC) ਨੂੰ ਪੱਖ ਬਣਾਇਆ ਗਿਆ ਹੈ।
ਪਰਿਵਾਰਕ ਮਾਣ-ਹਾਨੀ ਦਾ ਲਾਇਆ ਦੋਸ਼
ਸਨੋਬਰ ਸ਼ੇਖ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਪਿਤਾ ਦੀ ਵਿਰਾਸਤ ਅਤੇ ਕਹਾਣੀ 'ਤੇ ਸਿਰਫ਼ ਉਨ੍ਹਾਂ ਦਾ ਕਾਨੂੰਨੀ ਹੱਕ ਹੈ। ਬਿਨਾਂ ਸਹਿਮਤੀ ਦੇ ਕਿਸੇ ਵਿਅਕਤੀ ਦੇ ਅਪਰਾਧਿਕ ਵਿਹਾਰ ਨੂੰ ਵਧਾ-ਚੜ੍ਹਾ ਕੇ ਪੇਸ਼ ਕਰਨਾ ਮ੍ਰਿਤਕ ਦੀ ਮਾਣ-ਮਰਿਆਦਾ ਅਤੇ ਉਨ੍ਹਾਂ ਦੇ ਪਰਿਵਾਰ ਦੀ ਸਮਾਜਿਕ ਸਥਿਤੀ ਨੂੰ ਠੇਸ ਪਹੁੰਚਾਉਣਾ ਹੈ। ਉਨ੍ਹਾਂ ਨੇ ਮੰਗ ਕੀਤੀ ਹੈ ਕਿ ਫਿਲਮ ਦੀ ਪ੍ਰੋਡਕਸ਼ਨ, ਪ੍ਰਮੋਸ਼ਨ ਅਤੇ 13 ਫਰਵਰੀ ਨੂੰ ਹੋਣ ਵਾਲੀ ਰਿਲੀਜ਼ 'ਤੇ ਤੁਰੰਤ ਰੋਕ ਲਗਾਈ ਜਾਵੇ।
ਨਿਰਮਾਤਾਵਾਂ ਦੀ ਸਫਾਈ
ਦੂਜੇ ਪਾਸੇ ਫਿਲਮ ਨਿਰਮਾਤਾਵਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਫਿਲਮ ਦੇ ਅੰਤ ਵਿੱਚ ਇੱਕ 'ਡਿਸਕਲੇਮਰ' ਦਿੱਤਾ ਹੈ, ਜਿਸ ਵਿੱਚ ਸਪੱਸ਼ਟ ਕੀਤਾ ਗਿਆ ਹੈ ਕਿ ਕਿਸੇ ਵੀ ਪਾਤਰ ਜਾਂ ਇਤਿਹਾਸ ਨਾਲ ਸਮਾਨਤਾ ਸਿਰਫ਼ ਇੱਕ ਇਤਫ਼ਾਕ ਹੈ। ਮੇਕਰਸ ਦਾ ਦਾਅਵਾ ਹੈ ਕਿ ਮਾਫੀਆ ਜਾਂ ਗੈਂਗਸਟਰਾਂ ਨੂੰ ਦਿਖਾਉਣ ਲਈ ਅਜਿਹੇ ਨਾਮ ਵਰਤਣਾ ਆਮ ਗੱਲ ਹੈ।
ਵਿਸ਼ਾਲ ਭਾਰਦਵਾਜ ਤੇ ਸ਼ਾਹਿਦ ਦੀ ਚੌਥੀ ਫਿਲਮ
ਜ਼ਿਕਰਯੋਗ ਹੈ ਕਿ ਸ਼ਾਹਿਦ ਕਪੂਰ ਅਤੇ ਵਿਸ਼ਾਲ ਭਾਰਦਵਾਜ ਦੀ ਜੋੜੀ ਇਸ ਤੋਂ ਪਹਿਲਾਂ 'ਕਮੀਨੇ' (2009), 'ਹੈਦਰ' (2014) ਅਤੇ 'ਰੰਗੂਨ' (2017) ਵਰਗੀਆਂ ਹਿੱਟ ਫਿਲਮਾਂ ਦੇ ਚੁੱਕੀ ਹੈ। 'ਓ ਰੋਮੀਓ' ਵਿੱਚ ਸ਼ਾਹਿਦ ਦੇ ਨਾਲ ਤ੍ਰਿਪਤੀ ਡਿਮਰੀ, ਵਿਕ੍ਰਾਂਤ ਮੈਸੀ, ਨਾਨਾ ਪਾਟੇਕਰ, ਤਮੰਨਾ ਭਾਟਿਆ ਅਤੇ ਦਿਸ਼ਾ ਪਾਟਨੀ ਵਰਗੇ ਦਿੱਗਜ ਕਲਾਕਾਰ ਅਹਿਮ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੇ।