"ਉੜਨੇ ਕੀ ਆਸ਼ਾ" ''ਚ ਆਵੇਗਾ 7 ਸਾਲ ਦਾ ਲੀਪ, ਨਵੇਂ ਲੁੱਕ ਵਿੱਚ ਨਜ਼ਰ ਆਉਣਗੇ ਕੰਵਰ ਢਿੱਲੋਂ

ਮੁੰਬਈ (ਏਜੰਸੀ)- ਸਟਾਰ ਪਲੱਸ ਦਾ ਪ੍ਰਸਿੱਧ ਸੋਪ ਓਪੇਰਾ "ਉੜਨੇ ਕੀ ਆਸ਼ਾ" 7 ਸਾਲ ਦੇ ਲੀਪ ਲਈ ਤਿਆਰ ਹੈ, ਜਿਸ ਨਾਲ ਕਹਾਣੀ ਇੱਕ ਨਵੇਂ ਅਤੇ ਭਾਵਨਾਤਮਕ ਮੋੜ 'ਤੇ ਪਹੁੰਚ ਜਾਵੇਗੀ। ਇਸ ਲੀਪ ਨਾਲ ਅਦਾਕਾਰ ਕੰਵਰ ਢਿੱਲੋਂ ਵੀ ਇੱਕ ਨਵੇਂ ਲੁੱਕ ਵਿੱਚ ਨਜ਼ਰ ਆਉਣਗੇ। ਉਨ੍ਹਾਂ ਨੇ ਆਪਣੇ ਕਿਰਦਾਰ ਲਈ ਢਾਈ ਸਾਲ ਬਾਅਦ ਪਹਿਲੀ ਵਾਰ ਆਪਣੇ ਵਾਲ ਕਟਵਾਏ ਹਨ। ਲੀਪ ਤੋਂ ਬਾਅਦ ਦੀ ਕਹਾਣੀ ਵਿੱਚ, ਸਚਿਨ ਅਤੇ ਸਾਇਲੀ ਦੀ ਜ਼ਿੰਦਗੀ 7 ਸਾਲ ਅੱਗੇ ਵੱਧ ਚੁੱਕੀ ਹੈ। ਆਪਣੇ ਪੁੱਤਰ ਦੇ ਜ਼ਿੰਦਾ ਬਚੇ ਹੋਣ ਤੋਂ ਅਣਜਾਣ ਦੋਵੇਂ ਆਪਣੀ ਧੀ ਪੂਰਨਾ ਨਾਲ ਇੱਕ ਨਵੀਂ ਜ਼ਿੰਦਗੀ ਸ਼ੁਰੂ ਕਰਦੇ ਹਨ।

ਹਾਲਾਂਕਿ, ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਆਪਣੇ ਪੁੱਤਰ ਨੂੰ ਗੁਆਉਣ ਦਾ ਦਰਦ ਅਜੇ ਵੀ ਬਣਿਆ ਹੋਇਆ ਹੈ। ਸਚਿਨ ਦੀ ਭੂਮਿਕਾ ਨਿਭਾਉਣ ਵਾਲੇ ਕੰਵਰ ਢਿੱਲੋਂ ਨੇ ਕਿਹਾ ਕਿ ਪਿਛਲੇ ਢਾਈ ਸਾਲਾਂ ਵਿੱਚ, ਦਰਸ਼ਕਾਂ ਨੇ ਸਚਿਨ ਅਤੇ ਸਾਇਲੀ ਦੇ ਸਫ਼ਰ ਨੂੰ ਨੇੜਿਓਂ ਦੇਖਿਆ ਹੈ ਅਤੇ ਇਹ ਜਾਣਨ ਲਈ ਉਤਸੁਕ ਹਨ ਕਿ ਅੱਗੇ ਕੀ ਹੈ। ਉਨ੍ਹਾਂ ਕਿਹਾ ਕਿ ਲੀਪ ਤੋਂ ਬਾਅਦ ਦੀ ਕਹਾਣੀ ਭਾਵਨਾਵਾਂ ਅਤੇ ਦਿਲ ਨੂੰ ਛੂਹ ਲੈਣ ਵਾਲੇ ਪਲਾਂ ਨਾਲ ਭਰੀ ਹੋਈ ਹੈ। ਕੰਵਰ ਨੇ ਖੁਲਾਸਾ ਕੀਤਾ ਕਿ ਉਨ੍ਹਾਂ ਨੇ ਇਸ ਨਵੇਂ ਪੜਾਅ ਲਈ ਆਪਣਾ ਲੁੱਕ ਵੀ ਬਦਲਿਆ ਹੈ। ਉਨ੍ਹਾ ਕਿਹਾ, "ਢਾਈ ਸਾਲਾਂ ਬਾਅਦ, ਮੈਂ ਆਖਰਕਾਰ ਇਸ ਕਿਰਦਾਰ ਲਈ ਆਪਣੇ ਵਾਲ ਕਟਵਾ ਲਏ ਹਨ।"