ਕਿਰਨ ਸ਼ਾਂਤਾਰਾਮ ਨੇ ਆਪਣੇ ਪਿਤਾ ਵੀ. ਸ਼ਾਂਤਾਰਾਮ ਦੀ ਬਾਇਓਪਿਕ ਲਈ ਸਿਧਾਂਤ ਚਤੁਰਵੇਦੀ ਨੂੰ ਦੱਸਿਆ  ''ਪਰਫੈਕਟ ਚੁਆਇਸ''

ਮੁੰਬਈ (ਏਜੰਸੀ) : ਭਾਰਤੀ ਸਿਨੇਮਾ ਦੇ ਦਿੱਗਜ ਫਿਲਮਕਾਰ ਸਵਰਗੀ ਵੀ. ਸ਼ਾਂਤਾਰਾਮ ਦੀ ਜ਼ਿੰਦਗੀ ਹੁਣ ਰੂਪੇਰੀ ਪਰਦੇ 'ਤੇ ਨਜ਼ਰ ਆਉਣ ਵਾਲੀ ਹੈ। ਇਸ ਬਾਇਓਪਿਕ ਨੂੰ ਲੈ ਕੇ ਸਭ ਤੋਂ ਵੱਡੀ ਖ਼ਬਰ ਇਹ ਹੈ ਕਿ ਫਿਲਮ ਵਿੱਚ ਵੀ. ਸ਼ਾਂਤਾਰਾਮ ਦਾ ਕਿਰਦਾਰ ਨਿਭਾਉਣ ਲਈ ਅਦਾਕਾਰ ਸਿਧਾਂਤ ਚਤੁਰਵੇਦੀ ਦੀ ਚੋਣ ਕੀਤੀ ਗਈ ਹੈ। ਵੀ. ਸ਼ਾਂਤਾਰਾਮ ਦੇ ਪੁੱਤਰ ਕਿਰਨ ਸ਼ਾਂਤਾਰਾਮ ਨੇ ਖੁਦ ਸਿਧਾਂਤ ਨੂੰ ਇਸ ਭੂਮਿਕਾ ਲਈ 'ਪਰਫੈਕਟ ਚੁਆਇਸ' ਦੱਸਿਆ ਹੈ।

ਖ਼ਾਸ ਮੌਕੇ 'ਤੇ ਕੀਤਾ ਸਨਮਾਨਿਤ

ਭਾਰਤੀ ਸਿਨੇਮਾ ਦੀ ਵਿਰਾਸਤ ਨੂੰ ਸਮਰਪਿਤ ਇੱਕ ਵਿਸ਼ੇਸ਼ ਪ੍ਰੋਗਰਾਮ ਦੌਰਾਨ ਕਿਰਨ ਸ਼ਾਂਤਾਰਾਮ ਨੇ ਸਿਧਾਂਤ ਚਤੁਰਵੇਦੀ ਨੂੰ ਸਨਮਾਨਿਤ ਕੀਤਾ। ਇਸ ਮੌਕੇ ਉਨ੍ਹਾਂ ਭਰੋਸਾ ਜਤਾਇਆ ਕਿ ਸਿਧਾਂਤ ਵਰਗਾ ਮਾਰੂ ਅਦਾਕਾਰ ਉਨ੍ਹਾਂ ਦੇ ਪਿਤਾ ਦੀ ਜੀਵਨੀ ਨਾਲ ਪੂਰਾ ਇਨਸਾਫ਼ ਕਰੇਗਾ।

125ਵੀਂ ਜਯੰਤੀ 'ਤੇ ਹੋਵੇਗੀ ਰਿਲੀਜ਼

ਕਿਰਨ ਸ਼ਾਂਤਾਰਾਮ ਨੇ ਫਿਲਮ ਦੀ ਰਿਲੀਜ਼ ਡੇਟ ਬਾਰੇ ਅਹਿਮ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਇਹ ਫਿਲਮ ਵੀ. ਸ਼ਾਂਤਾਰਾਮ ਦੀ 125ਵੀਂ ਜਯੰਤੀ ਦੇ ਮੌਕੇ 'ਤੇ 18 ਨਵੰਬਰ 2026 ਨੂੰ ਰਿਲੀਜ਼ ਕੀਤੀ ਜਾਵੇਗੀ। ਫਿਲਮ ਦਾ ਮਕਸਦ ਉਨ੍ਹਾਂ ਦੀ ਮਹਾਨ ਸਿਨੇਮਾਈ ਵਿਰਾਸਤ ਨੂੰ ਸ਼ਰਧਾਂਜਲੀ ਦੇਣਾ ਹੈ। ਦੱਸਣਯੋਗ ਹੈ ਕਿ ਵੀ. ਸ਼ਾਂਤਾਰਾਮ ਉਨ੍ਹਾਂ ਪਾਇਨੀਅਰ ਫਿਲਮਕਾਰਾਂ ਵਿੱਚੋਂ ਇੱਕ ਸਨ, ਜਿਨ੍ਹਾਂ ਨੇ ਭਾਰਤੀ ਸਿਨੇਮਾ ਨੂੰ ਮੂਕ ਫਿਲਮਾਂ ਦੇ ਦੌਰ ਤੋਂ ਲੈ ਕੇ ਬੋਲਦੀਆਂ (ਸਾਊਂਡ) ਅਤੇ ਰੰਗੀਨ ਫਿਲਮਾਂ ਦੇ ਯੁੱਗ ਤੱਕ ਇੱਕ ਨਵੀਂ ਦਿਸ਼ਾ ਦਿੱਤੀ। ਕਿਰਨ ਸ਼ਾਂਤਾਰਾਮ ਨੇ ਕਿਹਾ ਕਿ ਉਨ੍ਹਾਂ ਨੂੰ ਖੁਸ਼ੀ ਹੈ ਕਿ ਅੱਜ ਦੀ ਪੀੜ੍ਹੀ ਦੇ ਪ੍ਰਤਿਭਾਸ਼ਾਲੀ ਅਦਾਕਾਰ ਉਨ੍ਹਾਂ ਦੇ ਪਿਤਾ ਦੇ ਯੋਗਦਾਨ ਨੂੰ ਪਰਦੇ 'ਤੇ ਜੀਵੰਤ ਕਰਨਗੇ।