ਮੂਵੀ ਖਰੀਦਣ ਲਈ ਤਿਆਰ ਨਹੀਂ ਸੀ ਇਕ ਵੀ ਡਿਸਟ੍ਰੀਬਿਊਟਰ, ਇਕ ਮੌਤ ਨੇ ਫ਼ਿਲਮ ਨੂੰ ਬਣਾ ਦਿੱਤਾ ''ਬਲਾਕਬਸਟਰ''

ਐਂਟਰਟੇਨਮੈਂਟ ਡੈਸਕ- ਅੱਜ ਬਾਲੀਵੁੱਡ ਦੀ 'ਟ੍ਰੈਜੇਡੀ ਕਵੀਨ' ਮੀਨਾ ਕੁਮਾਰੀ ਦੀ ਬਰਸੀ ਹੈ। 31 ਮਾਰਚ 1972 ਨੂੰ ਜਦੋਂ ਉਹ ਇਸ ਦੁਨੀਆ ਤੋਂ ਰੁਖ਼ਸਤ ਹੋਈ, ਤਾਂ ਉਹ ਆਪਣੇ ਪਿੱਛੇ ਇਕ ਅਜਿਹੀ ਵਿਰਾਸਤ ਛੱਡ ਗਈ ਜਿਸ ਦੀ ਬਰਾਬਰੀ ਕੋਈ ਹੋਰ ਕਲਾਕਾਰ ਨਹੀਂ ਕਰ ਸਕਦਾ। ਅੱਜ ਵੀ ਫਿਲਮੀ ਦੁਨੀਆ 'ਚ ਉਨ੍ਹਾਂ ਦੀ ਸ਼ਾਹਕਾਰ ਫਿਲਮ 'ਪਾਕੀਜ਼ਾ' ਦਾ ਜ਼ਿਕਰ ਹੁੰਦਾ ਹੈ, ਜਿਸ ਨੂੰ ਬਣਾਉਣ 'ਚ ਡਾਇਰੈਕਟਰ ਕਮਾਲ ਅਮਰੋਹੀ ਨੂੰ 14 ਸਾਲ ਲੱਗੇ ਸਨ।

14 ਸਾਲਾਂ ਦਾ ਸੰਘਰਸ਼ ਅਤੇ ਨਿੱਜੀ ਦਰਦ 

ਕਮਾਲ ਅਮਰੋਹੀ ਨੇ 1950 ਦੇ ਦਹਾਕੇ ਦੇ ਅੰਤ 'ਚ 'ਪਾਕੀਜ਼ਾ' ਦਾ ਸੁਪਨਾ ਦੇਖਿਆ ਸੀ, ਜੋ ਉਹ ਆਪਣੀ ਪਤਨੀ ਮੀਨਾ ਕੁਮਾਰੀ ਲਈ ਇਕ ਯਾਦਗਾਰ ਤੋਹਫ਼ੇ ਵਜੋਂ ਬਣਾਉਣਾ ਚਾਹੁੰਦੇ ਸਨ। ਫਿਲਮ ਦੀ ਸ਼ੂਟਿੰਗ 1958 'ਚ ਬਲੈਕ ਐਂਡ ਵ੍ਹਾਈਟ 'ਚ ਸ਼ੁਰੂ ਹੋਈ ਸੀ, ਪਰ ਤਕਨਾਲੋਜੀ ਬਦਲਣ ਕਾਰਨ ਇਸ ਨੂੰ ਦੁਬਾਰਾ ਰੰਗੀਨ (ਕਲਰ) 'ਚ ਸ਼ੂਟ ਕੀਤਾ ਗਿਆ। ਇਸ ਲੰਬੇ ਸਫ਼ਰ ਦੌਰਾਨ ਮੀਨਾ ਕੁਮਾਰੀ ਅਤੇ ਕਮਾਲ ਅਮਰੋਹੀ ਦੇ ਨਿੱਜੀ ਰਿਸ਼ਤੇ ਖਰਾਬ ਹੋ ਗਏ ਅਤੇ ਫਿਲਮ ਦਾ ਕੰਮ ਕਈ ਸਾਲਾਂ ਤੱਕ ਰੁਕਿਆ ਰਿਹਾ।

ਬੀਮਾਰੀ ਦੇ ਬਾਵਜੂਦ ਕੰਮ ਪ੍ਰਤੀ ਜਨੂੰਨ 

ਸਾਲ 1968 'ਚ ਸੁਨੀਲ ਦੱਤ ਅਤੇ ਨਰਗਿਸ ਦੇ ਜ਼ੋਰ ਪਾਉਣ 'ਤੇ ਫਿਲਮ ਦੀ ਸ਼ੂਟਿੰਗ ਦੁਬਾਰਾ ਸ਼ੁਰੂ ਹੋਈ। ਉਸ ਸਮੇਂ ਤੱਕ ਮੀਨਾ ਕੁਮਾਰੀ ਲਿਵਰ ਸਿਰੋਸਿਸ ਵਰਗੀ ਗੰਭੀਰ ਬੀਮਾਰੀ ਨਾਲ ਜੂਝ ਰਹੀ ਸੀ ਅਤੇ ਉਸ ਦੀ ਹਾਲਤ ਇੰਨੀ ਨਾਜ਼ੁਕ ਸੀ ਕਿ ਉਹ ਜ਼ਿਆਦਾ ਦੇਰ ਖੜ੍ਹੀ ਵੀ ਨਹੀਂ ਹੋ ਸਕਦੀ ਸੀ। ਫਿਲਮ ਦੇ ਮਸ਼ਹੂਰ ਗੀਤਾਂ, ਖਾਸ ਕਰਕੇ 'ਠਾੜੇ ਰਹੀਓ' ਲਈ ਮੀਨਾ ਕੁਮਾਰੀ ਦੇ ਸਿਰਫ ਚਿਹਰੇ ਦੇ ਕਲੋਜ਼-ਅੱਪ ਲਏ ਗਏ, ਜਦਕਿ ਡਾਂਸ ਸਟੈਪਸ ਲਈ ਬਾਡੀ ਡਬਲ (ਪਦਮਾ ਖੰਨਾ) ਦੀ ਵਰਤੋਂ ਕਰਨੀ ਪਈ।

ਡਿਸਟ੍ਰੀਬਿਊਟਰਾਂ ਨੇ ਨਕਾਰਿਆ, ਪਰ ਦਰਸ਼ਕਾਂ ਨੇ ਸਿਰ ਅੱਖਾਂ 'ਤੇ ਬਿਠਾਇਆ 

ਜਦੋਂ 1971 ਦੇ ਅਖੀਰ 'ਚ ਫਿਲਮ ਪੂਰੀ ਹੋਈ, ਤਾਂ ਕੋਈ ਵੀ ਡਿਸਟ੍ਰੀਬਿਊਟਰ ਇਸ ਨੂੰ ਖਰੀਦਣ ਲਈ ਤਿਆਰ ਨਹੀਂ ਸੀ ਕਿਉਂਕਿ ਉਨ੍ਹਾਂ ਨੂੰ ਲੱਗਦਾ ਸੀ ਕਿ 14 ਸਾਲ ਪੁਰਾਣੀ ਇਹ ਕਹਾਣੀ ਹੁਣ ਪੁਰਾਣੀ ਹੋ ਚੁੱਕੀ ਹੈ। ਕੋਈ ਵੀ ਸਿਨੇਮਾ ਮਾਲਕ ਇਸ ਨੂੰ ਪ੍ਰਾਈਮ ਟਾਈਮ ਸਲਾਟ ਦੇਣ ਲਈ ਤਿਆਰ ਨਹੀਂ ਸੀ, ਜਿਸ ਤੋਂ ਬਾਅਦ ਕਮਾਲ ਅਮਰੋਹੀ ਨੇ ਖੁਦ ਇਸ ਨੂੰ ਰਿਲੀਜ਼ ਕਰਨ ਦਾ ਜ਼ੋਖਮ ਲਿਆ।

ਮੌਤ ਤੋਂ ਬਾਅਦ ਮਿਲੀ ਇਤਿਹਾਸਕ ਸਫਲਤਾ 

'ਪਾਕੀਜ਼ਾ' 4 ਫਰਵਰੀ 1972 ਨੂੰ ਰਿਲੀਜ਼ ਹੋਈ, ਪਰ ਸ਼ੁਰੂਆਤ 'ਚ ਇਸ ਨੂੰ ਠੰਡਾ ਹੁੰਗਾਰਾ ਮਿਲਿਆ। ਪਰ ਜਿਵੇਂ ਹੀ 31 ਮਾਰਚ 1972 ਨੂੰ ਮੀਨਾ ਕੁਮਾਰੀ ਦੀ ਮੌਤ ਦੀ ਖਬਰ ਫੈਲੀ, ਪੂਰੇ ਦੇਸ਼ 'ਚ ਸਿਨੇਮਾ ਹਾਲ ਦਰਸ਼ਕਾਂ ਨਾਲ ਭਰ ਗਏ। ਲੋਕ ਆਪਣੀ ਮਨਪਸੰਦ ਅਦਾਕਾਰਾ ਨੂੰ ਆਖਰੀ ਵਾਰ ਪਰਦੇ 'ਤੇ ਦੇਖਣ ਲਈ ਉਮੜ ਪਏ। ਫਿਲਮ ਨੇ ਮੁੰਬਈ ਦੇ ਮਿਨਰਵਾ ਟਾਕੀਜ਼ 'ਚ ਸਿਲਵਰ ਜੁਬਲੀ ਮਨਾਈ ਅਤੇ ਭੀੜ ਨੂੰ ਕਾਬੂ ਕਰਨ ਲਈ ਪੁਲਸ ਨੂੰ ਲਾਠੀਚਾਰਜ ਤੱਕ ਕਰਨਾ ਪਿਆ। ਗੁਲਾਮ ਮੁਹੰਮਦ ਦਾ ਸੰਗੀਤ ਅਤੇ ਨੌਸ਼ਾਦ ਦਾ ਬੈਕਗ੍ਰਾਊਂਡ ਸਕੋਰ ਅੱਜ ਵੀ ਲੋਕਾਂ ਦੇ ਦਿਲਾਂ 'ਚ ਵਸਿਆ ਹੋਇਆ ਹੈ। ਮੀਨਾ ਕੁਮਾਰੀ ਦੀਆਂ ਉਦਾਸ ਅੱਖਾਂ ਅਤੇ ਉਨ੍ਹਾਂ ਦੀ ਗੱਲਬਾਤ ਦੀ ਗਹਿਰਾਈ ਨੇ 'ਪਾਕੀਜ਼ਾ' ਨੂੰ ਸਿਰਫ ਇਕ ਫਿਲਮ ਨਹੀਂ, ਸਗੋਂ ਇਕ ਅਹਿਸਾਸ ਬਣਾ ਦਿੱਤਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e