‘ਬਾਰਡਰ 2’ ਨੂੰ ਰਿਲੀਜ਼ ਤੋਂ ਪਹਿਲਾਂ ਝਟਕਾ; ਗਲਫ ਦੇਸ਼ਾਂ ਨੇ ਲਗਾਈ ਪਾਬੰਦੀ

ਮੁੰਬਈ- ਬਾਲੀਵੁੱਡ ਦੇ ਦਿੱਗਜ ਅਦਾਕਾਰ ਸੰਨੀ ਦਿਓਲ ਦੀ ਸਭ ਤੋਂ ਵੱਧ ਉਡੀਕੀ ਜਾਣ ਵਾਲੀ ਫਿਲਮ ‘ਬਾਰਡਰ 2’ ਭਲਕੇ 23 ਜਨਵਰੀ ਨੂੰ ਗਣਤੰਤਰ ਦਿਵਸ ਦੇ ਮੌਕੇ ’ਤੇ ਰਿਲੀਜ਼ ਹੋਣ ਲਈ ਤਿਆਰ ਹੈ। ਪਰ ਰਿਲੀਜ਼ ਤੋਂ ਮਹਿਜ਼ ਕੁਝ ਘੰਟੇ ਪਹਿਲਾਂ ਫਿਲਮ ਨੂੰ ਲੈ ਕੇ ਇੱਕ ਮਾੜੀ ਖ਼ਬਰ ਸਾਹਮਣੇ ਆਈ ਹੈ। ਭਾਰਤ ਵਿੱਚ ਭਾਵੇਂ ਸੈਂਸਰ ਬੋਰਡ ਨੇ ਫਿਲਮ ਨੂੰ ਹਰੀ ਝੰਡੀ ਦੇ ਦਿੱਤੀ ਹੈ, ਪਰ ਗਲਫ ਦੇਸ਼ਾਂ ਵਿੱਚ ਇਸ ਦੀ ਰਿਲੀਜ਼ 'ਤੇ ਰੋਕ ਲਗਾ ਦਿੱਤੀ ਗਈ ਹੈ।
ਪਾਕਿਸਤਾਨ ਵਿਰੋਧੀ ਕੰਟੈਂਟ ਬਣਿਆ ਰੁਕਾਵਟ?
ਸਰੋਤਾਂ ਅਨੁਸਾਰ ‘ਬਾਰਡਰ 2’ ਵਿੱਚ ਦਿਖਾਏ ਗਏ 1971 ਦੀ ਜੰਗ ਦੇ ਦ੍ਰਿਸ਼ ਅਤੇ ਕੁਝ ਤਿੱਖੇ ਡਾਇਲਾਗਸ ਗਲਫ ਦੇਸ਼ਾਂ ਨੂੰ ਪਸੰਦ ਨਹੀਂ ਆਏ। ਫਿਲਮ ਦੇ ਟ੍ਰੇਲਰ ਵਿੱਚ ਸੰਨੀ ਦਿਓਲ ਦਾ ਇੱਕ ਡਾਇਲਾਗ ਹੈ- "ਆਵਾਜ਼ ਕਿੱਥੋਂ ਤੱਕ ਜਾਣੀ ਚਾਹੀਦੀ ਹੈ? ਲਾਹੌਰ ਤੱਕ", ਜਿਸ ਨੂੰ ਉੱਥੋਂ ਦੀਆਂ ਸੈਂਸਰਿੰਗ ਅਥਾਰਟੀਆਂ ਨੇ ਇਤਰਾਜ਼ਯੋਗ ਮੰਨਿਆ ਹੈ।
ਪਾਬੰਦੀਸ਼ੁਦਾ ਦੇਸ਼: ਬਹਿਰੀਨ, ਕੁਵੈਤ, ਓਮਾਨ, ਕਤਰ, ਸਾਊਦੀ ਅਰਬ ਅਤੇ ਯੂ.ਏ.ਈ. (UAE) ਵਰਗੇ ਦੇਸ਼ਾਂ ਵਿੱਚ ਫਿਲਮ ਨੂੰ ਫਿਲਹਾਲ ਕਲੀਅਰੈਂਸ ਨਹੀਂ ਮਿਲੀ।
ਕਰੋੜਾਂ ਦਾ ਨੁਕਸਾਨ: ਇਸ ਪਾਬੰਦੀ ਕਾਰਨ ਫਿਲਮ ਦੀ ਕਮਾਈ 'ਤੇ ਵੱਡਾ ਅਸਰ ਪੈ ਸਕਦਾ ਹੈ। ਪਿਛਲੇ ਮਹੀਨੇ ਰਿਲੀਜ਼ ਹੋਈ ਫਿਲਮ ‘ਧੁਰੰਧਰ’ 'ਤੇ ਵੀ ਗਲਫ ਦੇਸ਼ਾਂ ਵਿੱਚ ਰੋਕ ਲੱਗੀ ਸੀ, ਜਿਸ ਕਾਰਨ ਉਸ ਨੂੰ ਲਗਭਗ 1 ਕਰੋੜ ਡਾਲਰ (84 ਕਰੋੜ ਰੁਪਏ) ਦਾ ਨੁਕਸਾਨ ਹੋਇਆ ਸੀ।
ਭਾਰਤ ਵਿੱਚ ਬਿਨਾਂ ਕਿਸੇ ‘ਕੱਟ’ ਦੇ ਪਾਸ
ਭਾਰਤੀ ਸੈਂਸਰ ਬੋਰਡ (CBFC) ਨੇ ਫਿਲਮ ਨੂੰ U/A 13+ ਸਰਟੀਫਿਕੇਟ ਨਾਲ ਪਾਸ ਕਰ ਦਿੱਤਾ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਬੋਰਡ ਨੇ ਫਿਲਮ ਦੇ ਕਿਸੇ ਵੀ ਸੀਨ ਜਾਂ ਡਾਇਲਾਗ 'ਤੇ ਕੋਈ ਕੱਟ ਨਹੀਂ ਲਗਾਇਆ। ਹਾਲਾਂਕਿ ਕੁਝ ਛੋਟੇ ਬਦਲਾਅ ਜ਼ਰੂਰ ਸੁਝਾਏ ਗਏ ਹਨ:
ਲੜਾਕੂ ਜਹਾਜ਼ਾਂ ਤੋਂ ਭਾਰਤੀ ਤਿਰੰਗਾ ਹਟਾਉਣ ਲਈ ਕਿਹਾ ਗਿਆ ਹੈ।
ਇੱਕ ਜੰਗੀ ਬੇੜੇ ਦਾ ਨਾਮ ਬਦਲ ਕੇ ‘ਕਵਚ’ ਕਰ ਦਿੱਤਾ ਗਿਆ ਹੈ।
ਫਿਲਮ ਵਿੱਚ ਸੰਨੀ ਦਿਓਲ ਦੇ ਕਿਰਦਾਰ ਦਾ ਅਸਲੀ ਨਾਮ ‘ਫਤੇਹ ਸਿੰਘ’ ਕ੍ਰੈਡਿਟਸ ਵਿੱਚ ਜੋੜਿਆ ਗਿਆ ਹੈ।
3 ਘੰਟੇ 19 ਮਿੰਟ ਦਾ ਐਕਸ਼ਨ ਧਮਾਕਾ
ਅਨੁਰਾਗ ਸਿੰਘ ਦੇ ਨਿਰਦੇਸ਼ਨ ਹੇਠ ਬਣੀ ਇਹ ਫਿਲਮ 1971 ਦੇ ਭਾਰਤ-ਪਾਕਿਸਤਾਨ ਯੁੱਧ ਦੀ ਅਸਲੀ ਕਹਾਣੀ 'ਤੇ ਆਧਾਰਿਤ ਹੈ। ਫਿਲਮ ਵਿੱਚ ਸੰਨੀ ਦਿਓਲ, ਵਰੁਣ ਧਵਨ ਅਤੇ ਦਿਲਜੀਤ ਦੋਸਾਂਝ ਮੁੱਖ ਭੂਮਿਕਾਵਾਂ ਵਿੱਚ ਹਨ। ਵਰੁਣ ਧਵਨ ਇਸ ਫਿਲਮ ਵਿੱਚ ਮੇਜਰ ਹੋਸ਼ਿਆਰ ਸਿੰਘ ਦਹੀਆ ਦਾ ਕਿਰਦਾਰ ਨਿਭਾ ਰਹੇ ਹਨ। ਫਿਲਮ ਦੀ ਕੁੱਲ ਲੰਬਾਈ 3 ਘੰਟੇ 19 ਮਿੰਟ 7 ਸੈਕਿੰਡ ਤੈਅ ਕੀਤੀ ਗਈ ਹੈ।