‘ਮੈਟਾ’ ਜੂਝ ਰਿਹਾ ਸੋਸ਼ਲ ਮੀਡੀਆ ਨਾਲ ਜੁੜੇ ਮੁਕੱਦਮਿਆਂ ਦੇ ਪਹਾੜ ਨਾਲ

ਮੈਟਾ ਪਲੇਟਫਾਰਮਸ ਆਪਣੇ 22 ਸਾਲਾਂ ਦੇ ਇਤਿਹਾਸ ’ਚ ਸਭ ਤੋਂ ਗੰਭੀਰ ਕਾਨੂੰਨੀ ਖ਼ਤਰਿਆਂ ’ਚੋਂ ਇਕ ਦਾ ਸਾਹਮਣਾ ਕਰ ਰਿਹਾ ਹੈ ਅਤੇ ਇਹ ਕੰਪਨੀ ਲਈ ਇਸ ਤੋਂ ਵੀ ਮਾੜੇ ਸਮੇਂ ’ਤੇ ਨਹੀਂ ਆ ਸਕਦਾ ਸੀ, ਕਿਉਂਕਿ ਇਹ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏ.ਆਈ.) ਦੇ ਯੁੱਗ ’ਚ ਇਕ ਮੁਸ਼ਕਲ ਅਤੇ ਖ਼ਰਚੀਲੇ ਬਦਲਾਅ ’ਚੋਂ ਲੰਘ ਰਹੀ ਹੈ।

ਮਾਰਚ ’ਚ, ਕੰਪਨੀ ਨੂੰ ਕੈਲੀਫੋਰਨੀਆ ਅਤੇ ਨਿਊ ਮੈਕਸੀਕੋ ਦੇ ਇਤਿਹਾਸਕ ਅਦਾਲਤੀ ਮੁਕੱਦਮਿਆਂ ’ਚ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਜਿਨ੍ਹਾਂ ’ਚ ਉਸ ’ਤੇ ਆਪਣੇ ਘੱਟ ਉਮਰ ਦੇ ਵਰਤੋਂਕਾਰਾਂ (ਨਾਬਾਲਗਾਂ) ਦੀ ਸੁਰੱਖਿਆ ਦੀ ਤੁਲਨਾ ’ਚ ‘ਗ੍ਰੋਥ’ ਨੂੰ ਪਹਿਲ ਦੇਣ ਦਾ ਦੋਸ਼ ਲਾਇਆ ਗਿਆ ਸੀ। ਵਿਅਕਤੀਆਂ, ਸਕੂਲ ਜ਼ਿਲਿਆਂ ਅਤੇ 40 ਤੋਂ ਵੱਧ ਰਾਜਾਂ ਦੇ ਅਟਾਰਨੀ ਜਨਰਲਾਂ ਵੱਲੋਂ ਦਾਇਰ ਕੀਤੇ ਗਏ ਹਜ਼ਾਰਾਂ ਹੋਰ ਮੁਕੱਦਮੇ ਰਾਜ ਅਤੇ ਸੰਘੀ ਅਦਾਲਤਾਂ ’ਚ ਪੈਂਡਿੰਗ ਹਨ। ਕੁੱਲ ਮਿਲਾ ਕੇ, ਉਹ ਕੰਪਨੀ ਨੂੰ ਅਰਬਾਂ ਡਾਲਰ ਦੇ ਨੁਕਸਾਨ ਦਾ ਭੁਗਤਾਨ ਕਰਨ ਲਈ ਜ਼ਿੰਮੇਵਾਰ ਠਹਿਰਾ ਸਕਦੇ ਹਨ ਅਤੇ ਉਨ੍ਹਾਂ ਸੰਘੀ ਸੁਰੱਖਿਆ ਉਪਾਵਾਂ ਨੂੰ ਕਮਜ਼ੋਰ ਕਰ ਸਕਦੇ ਹਨ, ਜਿਨ੍ਹਾਂ ਨੇ ਇਤਿਹਾਸਕ ਤੌਰ ’ਤੇ ਇਸ ਨੂੰ ਆਪਣੇ ਪਲੇਟਫਾਰਮ ’ਤੇ ਨੁਕਸਾਨਦੇਹ ਸਮੱਗਰੀ ਲਈ ਜਵਾਬਦੇਹੀ ਤੋਂ ਬਚਾਇਆ ਹੈ।

ਮੈਟਾ ਫਿਲਹਾਲ ਟੇਨੇਸੀ ਦੇ ਅਟਾਰਨੀ ਜਨਰਲ ਵੱਲੋਂ ਕੀਤੇ ਗਏ ਦਾਅਵਿਆਂ ’ਤੇ ਮੁਕੱਦਮੇ ਦੇ ਵਿਚਕਾਰ ਹੈ। ਇਸ ਤੋਂ ਇਲਾਵਾ ਕਈ ਸੂਬਿਅਾਂ ਦਾ ਕਹਿਣਾ ਹੈ ਕਿ ਕੰਪਨੀ ਨੇ ਆਪਣੇ ਪਲੇਟਫਾਰਮ ਦੀ ਸੁਰੱਖਿਆ ਬਾਰੇ ਵਰਤੋਂਕਾਰਾਂ ਨੂੰ ਗੁੰਮਰਾਹ ਕੀਤਾ ਹੈ। ਅਗਸਤ ’ਚ, ਮੈਟਾ ਓਕਲੈਂਡ ਦੀ ਇਕ ਫ਼ੈਡਰਲ ਅਦਾਲਤ ’ਚ 4 ਅਟਾਰਨੀ ਜਨਰਲਾਂ ਦੇ ਦਾਅਵਿਆਂ ’ਤੇ ਮੁਕੱਦਮੇ ਦਾ ਸਾਹਮਣਾ ਕਰੇਗੀ। ਉਸ ਮੁਕੱਦਮੇਬਾਜ਼ੀ ’ਚ, ਰਾਜਾਂ ਨੇ 1.4 ਟ੍ਰਿਲੀਅਨ ਡਾਲਰ ਤੱਕ ਦੇ ਨੁਕਸਾਨ ਦੀ ਮੰਗ ਕੀਤੀ ਹੈ; ਇਹ ਰਾਸ਼ੀ ਮੈਟਾ ਦੀ 1.5 ਟ੍ਰਿਲੀਅਨ ਡਾਲਰ ਦੀ ਮਾਰਕੀਟ ਕੈਪੀਟਲਾਈਜ਼ੇਸ਼ਨ ਦੇ ਲੱਗਭਗ ਬਰਾਬਰ ਹੈ। ਮੁਕੱਦਮਿਆਂ ਦੇ ਇਸ ਸਮੂਹ ਦਾ ਇਕ ਹੋਰ ਮੁਕੱਦਮਾ ਆਗਾਮੀ ਫਰਵਰੀ ਲਈ ਨਿਰਧਾਰਤ ਹੈ।

ਹਾਲ ਹੀ ਦੇ ਮੁਕੱਦਮਿਆਂ ਦੇ ਮਿਲੇ-ਜੁਲੇ ਨਤੀਜੇ ਸਾਹਮਣੇ ਆਏ ਹਨ। ਮਈ ’ਚ, ਮੈਟਾ ਨੇ ਲਾਸ ਏਂਜਲਸ ’ਚ ਯੋਜਨਾਬੱਧ ਮੁਕੱਦਮੇ ਤੋਂ ਪਹਿਲਾਂ ਕੇਂਟਕੀ ਦੇ ਇਕ ਸਕੂਲ ਜ਼ਿਲੇ ਨਾਲ ਸਮਝੌਤਾ ਕਰ ਲਿਆ। ਇਸ ਮਹੀਨੇ ਉਸ ਨੇ ਇਕ ਜਿੱਤ ਦਰਜ ਕੀਤੀ, ਜਦੋਂ ਇਕ ਹੋਰ ਮਾਮਲੇ ’ਚ ਇਕ ਕਿਸ਼ੋਰ ਵਾਦੀ (ਸ਼ਿਕਾਇਤਕਰਤਾ) ਨੇ ਬਿਨਾਂ ਕਿਸੇ ਭੁਗਤਾਨ ਦੇ ਆਪਣਾ ਮੁਕੱਦਮਾ ਵਾਪਸ ਲੈ ਲਿਆ। ਮੈਟਾ ਨੇ ਸਹਿ-ਪ੍ਰਤੀਵਾਦੀਆਂ ਯੂ-ਟਿਊਬ, ਸਨੈਪ ਅਤੇ ਟਿੱਕਟਾਕ ਨਾਲ ਸਮਝੌਤਾ ਕਰਨ ਤੋਂ ਬਾਅਦ ਮੁਕੱਦਮਾ ਵਾਪਸ ਲਿਆ ਸੀ। ਮੈਟਾ ਨੇ ਕਿਹਾ ਕਿ ਉਹ ‘ਬੇਬੁਨਿਆਦ’ ਮੁਕੱਦਮਿਆਂ ਨਾਲ ਲੜਨਾ ਜਾਰੀ ਰੱਖੇਗਾ।

ਮੁਕੱਦਮੇ, ਜਿਨ੍ਹਾਂ ’ਚ ਤਰਕ ਦਿੱਤਾ ਗਿਆ ਹੈ ਕਿ ਸੋਸ਼ਲ ਮੀਡੀਆ ਸੇਵਾਵਾਂ ਇਸ ਤਰ੍ਹਾਂ ਡਿਜ਼ਾਈਨ ਕੀਤੀਆਂ ਗਈਆਂ ਹਨ ਕਿ ਉਹ ਯੂਥ ’ਚ ਮਾਨਸਿਕ ਸਿਹਤ ਸਮੱਸਿਆਵਾਂ ਪੈਦਾ ਕਰਦੀਆਂ ਹਨ, ਆਖ਼ਰਕਾਰ ਸਾਲਾਂ ਤੱਕ ਅਦਾਲਤਾਂ ’ਚ ਰਹਿਣ ਅਤੇ ਕੰਪਨੀ ਵੱਲੋਂ ਉਨ੍ਹਾਂ ਨੂੰ ਖਾਰਿਜ ਕਰਵਾਉਣ ਦੇ ਯਤਨਾਂ ਨੂੰ ਪਾਰ ਕਰਨ ਤੋਂ ਬਾਅਦ ਜਿਊਰੀ ਦੇ ਸਾਹਮਣੇ ਪਹੁੰਚ ਰਹੇ ਹਨ।

ਜਦੋਂ ਕਿ ਵਿਅਕਤੀਗਤ-ਸੱਟ ਦੇ ਮੁਕੱਦਮੇ ਸਿਰਫ ਮੁਆਵਜ਼ੇ ਦੀ ਮੰਗ ਕਰਦੇ ਹਨ, ਰਾਜ ਅਤੇ ਸਕੂਲ ਜ਼ਿਲੇ ਦੇ ਮਾਮਲੇ ਅੱਗੇ ਵਧਦੇ ਹਨ ਅਤੇ ਅਦਾਲਤਾਂ ਤੋਂ ਮੈਟਾ ਨੂੰ ਉਨ੍ਹਾਂ ਕੁਝ ਸੁਵਿਧਾਵਾਂ ਅਤੇ ਪ੍ਰਕਿਰਿਆਵਾਂ ਨੂੰ ਬਦਲਣ ਦਾ ਹੁਕਮ ਦੇਣ ਲਈ ਕਹਿੰਦੇ ਹਨ, ਜਿਨ੍ਹਾਂ ਨੇ ਇਸ ਦੇ ਪ੍ਰੋਡਕਟਾਂ ਨੂੰ 3.5 ਅਰਬ ਵਰਤੋਂਕਾਰਾਂ ਨੂੰ ਆਕਰਸ਼ਿਤ ਕਰਨ ਲਈ ਪੂਰੀ ਤਰ੍ਹਾਂ ਆਦੀ ਬਣਾਇਆ ਹੈ। ਐਪਸ ਦੇ ਇਸ ਦੇ ਪਰਿਵਾਰ ’ਚ ਵਰਤੋਂਕਾਰਾਂ ਦਾ ਵਾਧਾ ਪਹਿਲਾਂ ਹੀ ਹੌਲੀ ਹੋ ਗਿਆ ਹੈ, ਅਜਿਹੇ ’ਚ ਉਲਟ ਬਦਲਾਅ ਕੰਪਨੀ ਦੇ ਮੁੱਖ ਕਾਰੋਬਾਰ ਲਈ ਨੁਕਸਾਨਦੇਹ ਹੋ ਸਕਦੇ ਹਨ।

ਮੈਟਾ ਨੇ ਇਹ ਕਹਿੰਦੇ ਹੋਏ ਰਾਜਾਂ ਅਤੇ ਸਕੂਲਾਂ ਨਾਲ ਕੰਮ ਕਰਨ ਦੀ ਇੱਛਾ ਪ੍ਰਗਟਾਈ ਹੈ ਕਿ ਉਹ ਆਪਣੇ ਪ੍ਰੋਡਕਟਾਂ ਨੂੰ ਸੁਰੱਖਿਅਤ ਬਣਾਉਣਾ ਜਾਰੀ ਰੱਖੇਗਾ, ਜਦਕਿ 1 ਟ੍ਰਿਲੀਅਨ ਡਾਲਰ ਤੋਂ ਵੱਧ ਦੇ ਨੁਕਸਾਨ ਦੇ ਅਨੁਮਾਨ ਨੂੰ ਬੇਤੁਕਾ ਦੱਸਿਆ ਹੈ।

ਮੁਕੱਦਮਿਆਂ ਦਾ ਸਮੂਹਿਕ ਵਿੱਤੀ ਪ੍ਰਭਾਵ ਮਹੱਤਵਪੂਰਨ ਹੋ ਸਕਦਾ ਹੈ। ਕੰਪਨੀ ਨੇ ਨਿਵੇਸ਼ਕਾਂ ਨੂੰ ਚਿਤਾਵਨੀ ਦਿੱਤੀ ਕਿ ਨਿਊ ਮੈਕਸੀਕੋ ਦੇ ਮਾਮਲੇ ’ਚ ਇਕੱਲੇ ਮੁਕੱਦਮੇ ਦਾ ਦੂਜਾ ਪੜਾਅ ਖਤਮ ਹੋਣ ’ਤੇ 3.7 ਅਰਬ ਤੱਕ ਦਾ ਨੁਕਸਾਨ ਹੋ ਸਕਦਾ ਹੈ।

ਸਮਾਂ ਮੈਟਾ ਲਈ ਆਦਰਸ਼ ਤੋਂ ਬਹੁਤ ਦੂਰ ਹੈ, ਜੋ ਲੰਮੇ ਸਮੇਂ ਤੱਕ ਸੋਸ਼ਲ-ਨੈੱਟਵਰਕਿੰਗ ਸੇਵਾਵਾਂ ਦੇ ਬਾਜ਼ਾਰ ’ਤੇ ਹਾਵੀ ਰਹਿਣ ਤੋਂ ਬਾਅਦ, ਆਪਣੇ ਕਾਰੋਬਾਰ ਨੂੰ ਇਕ ਅਜਿਹੀ ਦੁਨੀਆ ਦੇ ਅਨੁਕੂਲ ਢਾਲਣ ਦੀ ਦੌੜ ’ਚ ਹੈ, ਜਿੱਥੇ ਏ.ਆਈ. ਤੇਜ਼ੀ ਨਾਲ ਮੁਕਾਬਲੇ ਦਾ ਕੇਂਦਰ ਬਣ ਰਿਹਾ ਹੈ। ਮੈਟਾ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਮਾਰਕ ਜ਼ੁਕਰਬਰਗ ਨੇ ਕਿਹਾ ਹੈ ਕਿ ਇਸ ਨਵੇਂ ਯੁੱਗ ’ਚ ਸਫ਼ਲਤਾ ‘ਤੈਅ ਨਹੀਂ ਹੈ’।

ਮੈਟਾ ਦੀ ਇਕ ਬੁਲਾਰਨ ਨੇ ਇਕ ਬਿਆਨ ’ਚ ਕਿਹਾ ਕਿ ਕੰਪਨੀ ‘ਆਪਣੇ ਅੱਲ੍ਹੜਾਂ ਲਈ ਸੁਰੱਖਿਅਤ, ਉਮਰ-ਅਨੁਕੂਲ ਅਨੁਭਵ ਪ੍ਰਦਾਨ ਕਰਨ ’ਤੇ ਧਿਆਨ ਕੇਂਦਰਿਤ ਕਰਨਾ ਜਾਰੀ ਰੱਖੇਗੀ।’ ਬੁਲਾਰਨ ਨੇ ਕਿਹਾ, ‘‘ਹਰ ਮਾਮਲਾ ਵੱਖਰਾ ਹੈ ਅਤੇ ਇਕ ਦਾ ਨਤੀਜਾ ਦੂਜੇ ਦਾ ਨਤੀਜਾ ਤੈਅ ਨਹੀਂ ਕਰਦਾ।’’

ਸੋਸ਼ਲ ਮੀਡੀਆ ਕੰਪਨੀਆਂ ਨੂੰ ਲੰਮੇ ਸਮੇਂ ਤੋਂ ਕਾਨੂੰਨੀ ਖ਼ਤਰਿਆਂ ਤੋਂ ਬਚਾਇਆ ਗਿਆ ਹੈ ਕਿਉਂਕਿ ਇਕ ਸੰਘੀ ਕਾਨੂੰਨ, ‘ਕਮਿਊਨੀਕੇਸ਼ਨਜ਼ ਡਿਸੈਂਸੀ ਐਕਟ ਦੀ ਧਾਰਾ 230’, ਉਨ੍ਹਾਂ ਨੂੰ ਉਨ੍ਹਾਂ ਦੇ ਪਲੇਟਫਾਰਮ ’ਤੇ ਵਰਤੋਂਕਾਰਾਂ ਦੀ ਸਮੱਗਰੀ ਦੀ ਜਵਾਬਦੇਹੀ ਤੋਂ ਢਾਲ ਬਣਾਉਂਦਾ ਹੈ। ਹਾਲਾਂਕਿ, ਦੇਸ਼ ਭਰ ਦੇ ਜੱਜ ਕਈ ਮਾਮਲਿਆਂ ਨੂੰ ਸੁਣਵਾਈ ਲਈ ਜਾਣ ਦੀ ਇਜਾਜ਼ਤ ਦੇ ਰਹੇ ਹਨ, ਜੋ ਕਹਿੰਦੇ ਹਨ ਕਿ ਉਨ੍ਹਾਂ ਦੇ ਪ੍ਰੋਡਕਟ ਜਾਣਬੁੱਝ ਕੇ ਲੋਕਾਂ ਨੂੰ ਆਦੀ ਬਣਾਉਣ ਲਈ ਡਿਜ਼ਾਈਨ ਕੀਤੇ ਗਏ ਹਨ।

ਮੈਟਾ ਨੇ ਮੁਕੱਦਮਿਆਂ ਦੇ ਜਵਾਬ ਵਿਚ ਲਗਾਤਾਰ ਗਲਤ ਕੰਮ ਕਰਨ ਤੋਂ ਇਨਕਾਰ ਕੀਤਾ ਹੈ ਅਤੇ ਅਦਾਲਤ ’ਚ ਅੱਲ੍ਹੜਾਂ ਦੇ ਖਾਤਿਆਂ ਲਈ ਨਵੀਆਂ ਸੁਰੱਖਿਆ ਸੁਵਿਧਾਵਾਂ ਅਤੇ ਪ੍ਰੋਡਕਟ ਬਦਲਾਅ ਵੱਲ ਇਸ਼ਾਰਾ ਕੀਤਾ ਹੈ, ਜੋ ਉਸ ਨੇ ਪਹਿਲਾਂ ਹੀ ਸਬੂਤ ਦੇ ਰੂਪ ’ਚ ਕੀਤੇ ਹਨ ਕਿ ਇਹ ਗ੍ਰੋਥ ਦੀ ਥਾਂ ਸੁਰੱਖਿਆ ਨੂੰ ਪਹਿਲ ਦੇ ਰਿਹਾ ਹੈ।

ਮੈਟਾ ਨੇ ਕਿਹਾ ਹੈ ਕਿ ਮੁਕੱਦਮੇਬਾਜ਼ੀ ਇਕ ਵਿਆਪਕ ਸਮਾਜਿਕ ਮੁੱਦੇ ਨੂੰ ਠੀਕ ਕਰਨ ਦਾ ਯਤਨ ਕਰ ਰਹੀ ਹੈ, ਜੋ ਜੇਕਰ ਸਫ਼ਲ ਹੁੰਦੀ ਹੈ, ਤਾਂ ਵੀ ਨੌਜਵਾਨਾਂ ਨੂੰ ਹੋਰ ਕਿਸਮਾਂ ਦੇ ਸੋਸ਼ਲ ਮੀਡੀਆ ਦੀ ਵਰਤੋਂ ਕਰਨ ਤੋਂ ਨਹੀਂ ਰੋਕੇਗੀ। ਇਸ ਨੇ ਕਿਹਾ ਕਿ ਇਹ ਪੂਰੇ ਉਦਯੋਗ ’ਤੇ ਲਾਗੂ ਹੋਣ ਵਾਲੇ ਸੰਘੀ ਕਾਨੂੰਨ ਨਾਲ ਸਮੱਗਰੀ ਅਤੇ ਡਿਜ਼ਾਈਨ ਨਾਲ ਜੁੜੇ ਮੁੱਦਿਆਂ ਦਾ ਹੱਲ ਕਰਨਾ ਪਸੰਦ ਕਰੇਗਾ। ਕੰਪਨੀ ਲਾਸ ਏਂਜਲਸ ਅਤੇ ਨਿਊ ਮੈਕਸੀਕੋ ’ਚ ਫੈਸਲਿਆਂ ਦੇ ਖ਼ਿਲਾਫ਼ ਅਪੀਲ ਕਰਨ ਦੀ ਯੋਜਨਾ ਬਣਾ ਰਹੀ ਹੈ।

ਟੈੱਕ ਗੈਂਟ ਨੇ ਸਮਝੌਤਾ ਕਰਨ ਦੀ ਇੱਛਾ ਦੇ ਸੰਕੇਤ ਦਿੱਤੇ ਹਨ। ਜੂਨ ’ਚ, ਇਸ ਨੇ ਇਕ ਮਾਮਲੇ ਨੂੰ ਸੁਲਝਾ ਲਿਆ ਅਤੇ ਨਿਊ ਮੈਕਸੀਕੋ ’ਚ ਦੂਜੇ ਪੜਾਅ ਦੇ ਹਿੱਸੇ ਵਜੋਂ ਆਪਣੀਆਂ ਕੁਝ ਪਲੇਟਫਾਰਮ ਸੁਵਿਧਾਵਾਂ ਨੂੰ ਬਦਲਣ ਦੀ ਸੰਭਾਵਨਾ ਜਤਾਈ।

ਮੈਟਾ ਦੇ ਮੁੱਖ ਪ੍ਰਾਈਵੇਸੀ ਅਤੇ ਅਨੁਪਾਲਨ ਅਧਿਕਾਰੀ, ਮਿਸ਼ੇਲ ਪ੍ਰੋਟੀ ਨੇ ਗਵਾਹੀ ਦਿੱਤੀ ਕਿ ਕੰਪਨੀ ਰਾਜ ਵੱਲੋਂ ਬੇਨਤੀ ਕੀਤੇ ਗਏ ਬਦਲਾਅ ’ਤੇ ਵਿਚਾਰ ਕਰਨ ਲਈ ਤਿਆਰ ਹੋਵੇਗੀ, ਜਿਨ੍ਹਾਂ ਵਿਚ 18 ਸਾਲ ਤੋਂ ਘੱਟ ਉਮਰ ਦੇ ਸਾਰੇ ਵਰਤੋਂਕਾਰਾਂ ਨੂੰ ਡਿਫ਼ਾਲਟ ਰੂਪ ’ਚ ਪ੍ਰਾਈਵੇਟ ਬਣਾਉਣਾ ਅਤੇ ਸਕੂਲ ਦੇ ਘੰਟਿਆਂ ਦੌਰਾਨ ਨੋਟੀਫਿਕੇਸ਼ਨਾਂ ਨੂੰ ਬਲਾਕ ਕਰਨਾ ਸ਼ਾਮਲ ਹੈ। ਪ੍ਰੋਟੀ ਨੇ ਗਵਾਹੀ ਦਿੱਤੀ ਕਿ ਕੁਝ ਬੇਨਤੀਆਂ ’ਚ ‘ਸਾਡੇ ਸਾਰੇ ਗਲੋਬਲ ਪ੍ਰੋਡਕਟ ਵਿਕਾਸ ਨੂੰ ਰੋਕਣ ਦੀ ਉੱਚ ਸਮਰੱਥਾ ਸੀ।’

- ਏਰਿਨ ਮੁਲਵੇਨੀ ਅਤੇ ਮੇਘਨ ਬੋਬਰੋਵਸਕੀ

(‘ਡਬਲਯੂ.ਐੱਸ.ਜੇ.’ ਤੋਂ ਧੰਨਵਾਦ ਸਹਿਤ)