ਤ੍ਰਿਸਾ ਅਤੇ ਗਾਇਤਰੀ ਦੀ ਜੋੜੀ ਨੇ ਸਈਅਦ ਮੋਦੀ ਟੂਰਨਾਮੈਂਟ ਵਿੱਚ ਮਹਿਲਾ ਡਬਲਜ਼ ਦਾ ਖ਼ਿਤਾਬ ਜਿੱਤਿਆ

ਲਖਨਊ- ਭਾਰਤ ਦੀ ਤ੍ਰਿਸਾ ਜੌਲੀ ਅਤੇ ਗਾਇਤਰੀ ਗੋਪੀਚੰਦ ਦੀ ਜੋੜੀ ਨੇ ਐਤਵਾਰ ਨੂੰ ਇੱਥੇ ਸਈਅਦ ਮੋਦੀ ਇੰਟਰਨੈਸ਼ਨਲ ਬੈਡਮਿੰਟਨ ਟੂਰਨਾਮੈਂਟ ਵਿੱਚ ਬਾਓ ਲੀ ਜਿੰਗ ਤੇ ਲੀ ਕਿਆਨ ਦੀ ਚੀਨੀ ਜੋੜੀ ਨੂੰ ਸਿੱਧੇ ਗੇਮਾਂ ਵਿੱਚ ਹਰਾ ਕੇ ਮਹਿਲਾ ਡਬਲਜ਼  ਖਿਤਾਬ ਜਿੱਤਿਆ। ਚੀਨ 'ਚ ਸੀਜ਼ਨ ਖਤਮ ਹੋਣ ਵਾਲੇ ਵਿਸ਼ਵ ਟੂਰ ਫਾਈਨਲ ਲਈ ਕੁਆਲੀਫਾਈ ਕਰ ਚੁੱਕੀ ਤ੍ਰਿਸ਼ਾ ਅਤੇ ਗਾਇਤਰੀ ਨੇ ਸਿਰਫ 40 ਮਿੰਟ 'ਚ ਆਪਣੇ ਚੀਨੀ ਵਿਰੋਧੀ ਨੂੰ 21-18, 21-11 ਨਾਲ ਹਰਾਇਆ। ਰਾਸ਼ਟਰਮੰਡਲ ਖੇਡਾਂ ਦੀ ਕਾਂਸੀ ਤਮਗਾ ਜੇਤੂ ਜੋੜੀ ਲਈ ਇਹ ਜਿੱਤ ਇਤਿਹਾਸਕ ਹੈ ਕਿਉਂਕਿ ਤ੍ਰਿਸਾ ਅਤੇ ਗਾਇਤਰੀ ਇਸ ਟੂਰਨਾਮੈਂਟ ਵਿੱਚ ਖਿਤਾਬ ਜਿੱਤਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਡਬਲਜ਼ ਜੋੜੀ ਬਣ ਗਈ ਹੈ। ਇਹ ਜੋੜੀ 2022 ਦੇ ਐਡੀਸ਼ਨ ਵਿੱਚ ਉਪ ਜੇਤੂ ਰਹੀ ਸੀ। 

ਭਾਰਤੀ ਜੋੜੀ ਨੇ ਜ਼ਬਰਦਸਤ ਸ਼ੁਰੂਆਤ ਕੀਤੀ ਅਤੇ ਸ਼ੁਰੂਆਤੀ ਗੇਮ ਵਿੱਚ 4-0 ਦੀ ਬੜ੍ਹਤ ਬਣਾ ਲਈ। ਹਾਲਾਂਕਿ, ਬਾਓ ਅਤੇ ਲੀ ਨੇ ਵਾਪਸੀ ਕੀਤੀ ਅਤੇ ਮੈਚ 14-14 ਦੇ ਬਰਾਬਰ ਹੋ ਗਿਆ। ਚੀਨੀ ਖਿਡਾਰੀਆਂ ਦੀਆਂ ਗਲਤੀਆਂ ਨੇ ਭਾਰਤ ਨੂੰ 17-15 ਨਾਲ ਅੱਗੇ ਕਰ ਦਿੱਤਾ। ਨੈੱਟ 'ਤੇ ਗਾਇਤਰੀ ਦੇ ਫੁਰਤੀਲੇ ਸ਼ਾਟ ਨੇ ਭਾਰਤੀ ਜੋੜੀ ਨੂੰ ਦੋ ਗੇਮ ਅੰਕ ਹਾਸਲ ਕਰਨ ਅਤੇ ਪਹਿਲੀ ਗੇਮ ਜਿੱਤਣ ਵਿਚ ਮਦਦ ਕੀਤੀ। ਦੂਜੀ ਗੇਮ ਵਿੱਚ ਤ੍ਰਿਸਾ ਅਤੇ ਗਾਇਤਰੀ ਨੇ ਬ੍ਰੇਕ ਤੱਕ 11-5 ਦੀ ਬੜ੍ਹਤ ਬਣਾ ਲਈ। ਭਾਰਤੀਆਂ ਨੇ ਲਗਾਤਾਰ ਸ਼ਾਨਦਾਰ ਰੈਲੀਆਂ ਦੇ ਨਾਲ ਬੜ੍ਹਤ ਨੂੰ 18-7 ਤੱਕ ਵਧਾ ਦਿੱਤਾ। ਗਾਇਤਰੀ ਦੇ ਜ਼ਬਰਦਸਤ ਸਮੈਸ਼ ਨੇ ਉਨ੍ਹਾਂ ਨੂੰ 11 ਮੈਚ ਪੁਆਇੰਟ ਦਿੱਤੇ ਅਤੇ ਭਾਰਤੀ ਜੋੜੀ ਨੇ ਖਿਤਾਬ ਜਿੱਤ ਲਿਆ।