ਰੁਬਲੇਵ ਨੇ ਮੋਂਟੇ ਕਾਰਲੋ ਮਾਸਟਰਜ਼ ਖ਼ਿਤਾਬ ਕੀਤਾ ਆਪਣੇ ਨਾਂ

ਮੋਂਟੇ ਕਾਰਲੋ : ਰੂਸ ਦੇ ਆਂਦਰੇ ਰੁਬਲੇਵ ਨੇ ਮੋਂਟੇ ਕਾਰਲੋ ਮਾਸਟਰਸ ਦੇ ਫਾਈਨਲ ਵਿੱਚ ਡੈਨਮਾਰਕ ਦੇ ਹੋਲਗਰ ਰੂਨੇ ਨੂੰ ਹਰਾ ਕੇ ਆਪਣੇ ਕਰੀਅਰ ਦਾ ਪਹਿਲਾ ਮਾਸਟਰਜ਼ 1000 ਖਿਤਾਬ ਜਿੱਤ ਲਿਆ ਹੈ। ਪੰਜਵਾਂ ਦਰਜਾ ਪ੍ਰਾਪਤ ਰੂਬਲੇਵ ਨੇ ਐਤਵਾਰ ਨੂੰ ਇਕ ਘੰਟਾ 34 ਮਿੰਟ ਤੱਕ ਚੱਲੇ ਮੈਚ ਵਿੱਚ ਰੂਏਨ ਨੂੰ 5-7, 6-2, 7-5 ਨਾਲ ਹਰਾਇਆ। ਰੂਬਲੇਵ ਨਿਰਣਾਇਕ ਸੈੱਟ ਵਿੱਚ ਵੀ 1-4 ਨਾਲ ਪਿੱਛੇ ਸੀ, ਪਰ ਉਸ ਨੇ ਆਪਣੇ ਕਰੀਅਰ ਦੀ ਸਭ ਤੋਂ ਵੱਡੀ ਜਿੱਤ ਦਰਜ ਕਰਨ ਲਈ ਵਾਪਸੀ ਕੀਤੀ। 

ਇਸ ਜਿੱਤ ਤੋਂ ਬਾਅਦ ਰੁਬਲੇਵ ਨੇ ਕਿਹਾ, 'ਮੈਨੂੰ ਨਹੀਂ ਪਤਾ ਕਿ ਕੀ ਕਹਿਣਾ ਹੈ। (ਨਿਰਣਾਇਕ ਸੈੱਟ ਵਿੱਚ) 1-4, 0/30 ਤੋਂ ਪਿੱਛੇ ਚਲ ਰਿਹਾ ਸੀ, ਬਰੇਕ ਪੁਆਇੰਟ ਬਚਾਉਂਦੇ ਹੋਏ, ਇਹ ਸੋਚ ਰਿਹਾ ਸੀ ਕਿ ਜਿੱਤਣ ਦਾ ਕੋਈ ਮੌਕਾ ਨਹੀਂ ਸੀ। ਪਰ ਕਿਸੇ ਤਰ੍ਹਾਂ ਮੈਂ ਇਹ ਕਰ ਲਿਆ। ਰੁਬਲੇਵ ਨੇ 2021 ਵਿੱਚ ਮੋਂਟੇ ਕਾਰਲੋ ਮਾਸਟਰਜ਼ ਵਿੱਚ ਵੀ ਜਗ੍ਹਾ ਬਣਾਈ ਪਰ ਫਿਰ ਉਹ ਸਟੀਫਾਨੋਸ ਸਿਟਸਿਪਾਸ ਤੋਂ ਹਾਰ ਗਿਆ।

ਉਸ ਨੇ ਕਿਹਾ, 'ਮੈਂ ਅੰਦਰੋਂ ਉਮੀਦ ਕਰ ਰਿਹਾ ਸੀ ਕਿ ਮੈਨੂੰ ਮੌਕਾ ਮਿਲੇਗਾ ਤੇ ਮੈਂ ਇਸ ਲਈ ਅੰਤ ਤੱਕ ਖੇਡਦਾ ਰਹਾਂਗਾ। ਮੈਨੂੰ ਪਿਛਲਾ ਫਾਈਨਲ ਯਾਦ ਹੈ, ਅਤੇ ਜਦੋਂ ਮੈਂ ਹਾਰ ਰਿਹਾ ਸੀ, ਮੈਂ ਮਹਿਸੂਸ ਕੀਤਾ ਕਿ ਮੇਰੇ ਕੋਲ ਕੋਈ ਮੌਕਾ ਨਹੀਂ ਸੀ। ਪਰ ਅੱਜ ਮੈਂ ਸੋਚਿਆ, 'ਬੱਸ ਅੰਤ ਤੱਕ ਵਿਸ਼ਵਾਸ ਰੱਖੋ', ਅਤੇ ਇਹੀ ਮੈਂ ਤੀਜੇ ਸੈੱਟ ਵਿੱਚ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ। 25 ਸਾਲਾ ਰੁਬਲੇਵ, ਜੋ ਕਿ ਯੂਕਰੇਨ 'ਤੇ ਰੂਸੀ ਹਮਲੇ ਤੋਂ ਬਾਅਦ ਆਪਣੇ ਰਾਸ਼ਟਰੀ ਝੰਡਾ ਤੋਂ ਬਿਨਾ ਖੇਡ ਰਿਹਾ ਸੀ ਨੇ ਉਸ ਦੇ ਸਮਰਥਨ ਲਈ ਹਾਜ਼ਰੀਨ ਦਾ ਧੰਨਵਾਦ ਕੀਤਾ। ਉਸ ਨੇ ਕਿਹਾ, 'ਮੈਂ ਜਿਸ ਦੇਸ਼ ਤੋਂ ਆਇਆ ਹਾਂ, ਉਸ ਦੇਸ਼ ਤੋਂ ਆ ਕੇ ਇਸ ਤਰ੍ਹਾਂ ਦਾ ਅੰਤਰਰਾਸ਼ਟਰੀ ਸਮਰਥਨ ਪ੍ਰਾਪਤ ਕਰਨਾ ਬਹੁਤ ਵੱਡੀ ਗੱਲ ਹੈ।'