ਨੇਸ਼ਨ ਲੀਗ : ਪੁਰਤਗਾਲ ਦੀ ਜਿੱਤ ''ਚ ਰੋਨਾਲਡੋ ਨੇ ਫਿਰ ਦਾਗਿਆ ਗੋਲ, ਪੋਲੈਂਡ ''ਤੇ 3-1 ਨਾਲ ਦਰਜ ਕੀਤੀ ਜਿੱਤ

ਬਾਰਸੀਲੋਨਾ : ਕ੍ਰਿਸਟੀਆਨੋ ਰੋਨਾਲਡੋ ਨੇ ਆਪਣੇ ਰਿਕਾਰਡ 133ਵੇਂ ਅੰਤਰਰਾਸ਼ਟਰੀ ਗੋਲ ਦੀ ਬਦੌਲਤ ਪੁਰਤਗਾਲ ਨੇ ਨੇਸ਼ਨਜ਼ ਲੀਗ ਫੁੱਟਬਾਲ ਟੂਰਨਾਮੈਂਟ 'ਚ ਪੋਲੈਂਡ 'ਤੇ 3-1 ਨਾਲ ਜਿੱਤ ਦਰਜ ਕੀਤੀ, ਜਦਕਿ ਇਕ ਹੋਰ ਮੈਚ 'ਚ ਸਪੇਨ ਨੇ ਡੈਨਮਾਰਕ ਨੂੰ 1-0 ਨਾਲ ਹਰਾਇਆ। ਰੋਨਾਲਡੋ ਨੇ 37ਵੇਂ ਮਿੰਟ ਵਿੱਚ ਰਾਫੇਲ ਲੀਓ ਦਾ ਸ਼ਾਟ ਪੋਸਟ 'ਤੇ ਲੱਗਣ ਤੋਂ ਬਾਅਦ ਰੀਬਾਉਂਡ 'ਤੇ ਗੋਲ ਕੀਤਾ।

ਇਸ ਤੋਂ ਪਹਿਲਾਂ ਬਰਨਾਰਡੋ ਸਿਲਵਾ ਨੇ 26ਵੇਂ ਮਿੰਟ ਵਿੱਚ ਪੁਰਤਗਾਲ ਲਈ ਪਹਿਲਾ ਗੋਲ ਕੀਤਾ ਸੀ। ਰੋਨਾਲਡੋ ਇਸ ਸਾਲ ਦੇ ਸ਼ੁਰੂ ਵਿੱਚ ਯੂਰਪੀਅਨ ਚੈਂਪੀਅਨਸ਼ਿਪ ਵਿੱਚ ਪੁਰਤਗਾਲ ਲਈ ਪੰਜ ਮੈਚਾਂ ਵਿੱਚ ਇੱਕ ਵੀ ਗੋਲ ਨਹੀਂ ਕਰ ਸਕਿਆ ਸੀ, ਪਰ ਉਹ ਨੇਸ਼ਨਜ਼ ਲੀਗ ਵਿੱਚ ਹੁਣ ਤੱਕ ਖੇਡੇ ਸਾਰੇ ਤਿੰਨ ਮੈਚਾਂ ਵਿੱਚ ਗੋਲ ਕਰਨ ਵਿੱਚ ਸਫਲ ਰਿਹਾ ਸੀ। ਇਨ੍ਹਾਂ ਵਿੱਚ ਕ੍ਰੋਏਸ਼ੀਆ ਖ਼ਿਲਾਫ਼ ਕੀਤਾ ਗੋਲ ਵੀ ਸ਼ਾਮਲ ਹੈ ਜੋ ਉਸ ਦੇ ਕਰੀਅਰ ਦਾ 900ਵਾਂ ਗੋਲ ਸੀ।

ਪੋਲੈਂਡ ਦਾ ਇਕਮਾਤਰ ਗੋਲ ਮਿਡਫੀਲਡਰ ਪਿਓਟਰ ਜ਼ੀਲਿਨਸਕੀ ਨੇ 78ਵੇਂ ਮਿੰਟ 'ਚ ਕੀਤਾ ਪਰ ਡਿਫੈਂਡਰ ਜਾਨ ਬੇਡਨਾਰੇਕ ਨੇ ਖੇਡ ਖਤਮ ਹੋਣ ਤੋਂ ਦੋ ਮਿੰਟ ਪਹਿਲਾਂ ਖੁਦ 'ਤੇ ਗੋਲ ਕਰਕੇ ਪੁਰਤਗਾਲ ਦੀ ਵੱਡੀ ਜਿੱਤ ਯਕੀਨੀ ਬਣਾਈ। ਪੁਰਤਗਾਲ ਤਿੰਨ ਮੈਚਾਂ ਵਿੱਚ 9 ਅੰਕਾਂ ਨਾਲ ਗਰੁੱਪ ਏ 1 ਵਿੱਚ ਸਿਖਰ 'ਤੇ ਹੈ। ਕ੍ਰੋਏਸ਼ੀਆ ਦੇ ਛੇ ਅੰਕ ਹਨ ਅਤੇ ਉਹ ਦੂਜੇ ਸਥਾਨ 'ਤੇ ਹੈ। ਉਨ੍ਹਾਂ ਨੇ ਜ਼ਗਰੇਬ ਵਿੱਚ ਖੇਡੇ ਗਏ ਮੈਚ ਵਿੱਚ ਸਕਾਟਲੈਂਡ ਨੂੰ 2-1 ਨਾਲ ਹਰਾਇਆ।

ਨੇਸ਼ਨਜ਼ ਲੀਗ ਦੇ ਇੱਕ ਹੋਰ ਮੈਚ ਵਿੱਚ ਮਾਰਟਿਨ ਜ਼ੁਬੀਮੈਂਡੀ ਦੇ 79ਵੇਂ ਮਿੰਟ ਵਿੱਚ ਕੀਤੇ ਗੋਲ ਦੀ ਮਦਦ ਨਾਲ ਸਪੇਨ ਨੇ ਡੈਨਮਾਰਕ ਨੂੰ 1-0 ਨਾਲ ਹਰਾਇਆ। ਇਸ ਜਿੱਤ ਨਾਲ ਮੌਜੂਦਾ ਚੈਂਪੀਅਨ ਸਪੇਨ ਦੇ ਗਰੁੱਪ ਏ 4 ਵਿੱਚ ਤਿੰਨ ਮੈਚਾਂ ਮਗਰੋਂ ਸੱਤ ਅੰਕ ਹੋ ਗਏ ਹਨ। ਡੈਨਮਾਰਕ ਛੇ ਅੰਕਾਂ ਨਾਲ ਦੂਜੇ ਸਥਾਨ 'ਤੇ ਹੈ। ਸਰਬੀਆ ਦੇ ਚਾਰ ਅੰਕ ਹਨ। ਉਸ ਨੇ ਇੱਕ ਹੋਰ ਮੈਚ ਵਿੱਚ ਇਸੇ ਲੀਗ ਸੀ ਵਿੱਚ ਸਵਿਟਜ਼ਰਲੈਂਡ ਨੂੰ 2-0 ਨਾਲ ਹਰਾਇਆ, ਕੋਸੋਵਾ ਨੇ ਲਿਥੁਆਨੀਆ ਨੂੰ 2-1 ਨਾਲ ਹਰਾਇਆ, ਜਦਕਿ ਰੋਮਾਨੀਆ ਨੇ ਸਾਈਪ੍ਰਸ ਨੂੰ 3-0 ਨਾਲ ਹਰਾਇਆ।