ਮੈਸੀ ਦੇ ਦੋ ਗੋਲ ਨਾਲ ਇੰਟਰ ਮਿਆਮੀ ਕੇ ਦਰਜ ਕੀਤੀ ਸ਼ਾਨਦਾਰ ਜਿੱਤ

ਓਰਲੈਂਡੋ : ਫੁੱਟਬਾਲ ਜਗਤ ਦੇ ਸੁਪਰਸਟਾਰ ਲਿਓਨਲ ਮੈਸੀ ਦੇ ਦੋ ਸ਼ਾਨਦਾਰ ਗੋਲਾਂ ਦੀ ਬਦੌਲਤ ਮੌਜੂਦਾ ਚੈਂਪੀਅਨ ਇੰਟਰ ਮਿਆਮੀ ਨੇ ਮੇਜਰ ਲੀਗ ਸੌਕਰ (MLS) ਵਿੱਚ ਅਰਲੈਂਡੋ ਸਿਟੀ ਨੂੰ 4-2 ਨਾਲ ਹਰਾ ਕੇ ਇਤਿਹਾਸਕ ਜਿੱਤ ਹਾਸਲ ਕੀਤੀ ਹੈ। ਇੰਟਰ ਐਂਡ ਕੰਪਨੀ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੁਕਾਬਲੇ ਵਿੱਚ ਮਿਆਮੀ ਨੇ ਪਹਿਲੇ ਹਾਫ ਵਿੱਚ ਦੋ ਗੋਲਾਂ ਨਾਲ ਪੱਛੜਨ ਦੇ ਬਾਵਜੂਦ ਦੂਜੇ ਹਾਫ ਵਿੱਚ ਜ਼ਬਰਦਸਤ ਵਾਪਸੀ ਕੀਤੀ।

ਪਹਿਲੇ ਹਾਫ 'ਚ ਅਰਲੈਂਡੋ ਦਾ ਦਬਦਬਾ 
ਮੈਚ ਦੀ ਸ਼ੁਰੂਆਤ ਅਰਲੈਂਡੋ ਸਿਟੀ ਲਈ ਬਹੁਤ ਵਧੀਆ ਰਹੀ। 18ਵੇਂ ਮਿੰਟ ਵਿੱਚ ਮਾਰਕੋ ਪਾਸਲਿਚ ਨੇ ਇਵਾਨ ਐਂਗੁਲੋ ਦੇ ਪਾਸ 'ਤੇ ਗੋਲ ਕਰਕੇ ਟੀਮ ਨੂੰ 1-0 ਦੀ ਬੜ੍ਹਤ ਦਿਵਾਈ। ਇਸ ਦੇ ਛੇ ਮਿੰਟ ਬਾਅਦ ਹੀ ਮਾਰਟਿਨ ਓਜੇਡਾ ਨੇ ਦੂਜਾ ਗੋਲ ਕਰਕੇ ਅਰਲੈਂਡੋ ਦੀ ਬੜ੍ਹਤ ਨੂੰ 2-0 ਕਰ ਦਿੱਤਾ, ਜੋ ਹਾਫ ਟਾਈਮ ਤੱਕ ਬਰਕਰਾਰ ਰਹੀ।

ਦੂਜੇ ਹਾਫ 'ਚ ਮਿਆਮੀ ਦੀ 'ਚੈਂਪੀਅਨ' ਵਾਪਸੀ 
ਦੂਜੇ ਹਾਫ ਦੇ ਸ਼ੁਰੂ ਹੁੰਦਿਆਂ ਹੀ ਇੰਟਰ ਮਿਆਮੀ ਨੇ ਹਮਲਾਵਰ ਰੁਖ਼ ਅਪਣਾਇਆ। 49ਵੇਂ ਮਿੰਟ ਵਿੱਚ ਮਾਟੇਓ ਸਿਲਵੇਟੀ ਨੇ ਗੋਲ ਕਰਕੇ ਸਕੋਰ 2-1 ਕਰ ਦਿੱਤਾ। ਇਸ ਤੋਂ ਬਾਅਦ ਮੈਸੀ ਦਾ ਜਲਵਾ ਦੇਖਣ ਨੂੰ ਮਿਲਿਆ। 57ਵੇਂ ਮਿੰਟ ਵਿੱਚ ਮੈਸੀ ਨੇ ਡਿਫੈਂਡਰ ਟੇਲਾਸਕੋ ਸੇਗੋਵੀਆ ਤੋਂ ਪਾਸ ਲੈ ਕੇ ਸ਼ਾਨਦਾਰ ਗੋਲ ਕੀਤਾ ਅਤੇ ਮੁਕਾਬਲੇ ਨੂੰ 2-2 ਦੀ ਬਰਾਬਰੀ 'ਤੇ ਲਿਆ ਦਿੱਤਾ।

ਸੇਗੋਵੀਆ ਅਤੇ ਮੈਸੀ ਨੇ ਪੱਕੀ ਕੀਤੀ ਜਿੱਤ 
ਮੈਚ ਦੇ ਅੰਤਿਮ ਪਲਾਂ ਵਿੱਚ ਮਿਆਮੀ ਨੇ ਆਪਣਾ ਦਬਾਅ ਹੋਰ ਵਧਾ ਦਿੱਤਾ। 85ਵੇਂ ਮਿੰਟ ਵਿੱਚ ਸੇਗੋਵੀਆ ਨੇ ਖੁਦ ਗੋਲ ਕਰਕੇ ਆਪਣੀ ਟੀਮ ਨੂੰ ਪਹਿਲੀ ਵਾਰ ਮੈਚ ਵਿੱਚ ਬੜ੍ਹਤ ਦਿਵਾਈ। ਸੇਗੋਵੀਆ ਨੇ ਇਸ ਮੈਚ ਵਿੱਚ ਇੱਕ ਗੋਲ ਕਰਨ ਤੋਂ ਇਲਾਵਾ ਦੋ ਗੋਲ ਕਰਨ ਵਿੱਚ ਮਦਦ (Assists) ਵੀ ਕੀਤੀ। ਮੈਚ ਦੇ ਬਿਲਕੁਲ ਅਖੀਰ ਵਿੱਚ, 90ਵੇਂ ਮਿੰਟ ਵਿੱਚ ਮੈਸੀ ਨੇ ਇੱਕ ਬਿਹਤਰੀਨ ਫ੍ਰੀ-ਕਿਕ ਰਾਹੀਂ ਆਪਣਾ ਦੂਜਾ ਗੋਲ ਕਰਕੇ ਮਿਆਮੀ ਦੀ 4-2 ਨਾਲ ਜਿੱਤ ਯਕੀਨੀ ਬਣਾਈ।

ਮੈਸੀ ਦੇ ਨਾਮ ਇੱਕ ਹੋਰ ਮੀਲ ਪੱਥਰ ਅਰਜਨਟੀਨਾ ਦੇ ਇਸ ਦਿੱਗਜ ਖਿਡਾਰੀ ਨੇ ਇਸ ਪ੍ਰਦਰਸ਼ਨ ਨਾਲ MLS ਵਿੱਚ ਆਪਣੇ ਗੋਲਾਂ ਦੀ ਗਿਣਤੀ 52 ਤੱਕ ਪਹੁੰਚਾ ਦਿੱਤੀ ਹੈ। ਇੰਟਰ ਮਿਆਮੀ ਦੀ ਇਸ ਜਿੱਤ ਨੇ ਪ੍ਰਸ਼ੰਸਕਾਂ ਵਿੱਚ ਭਾਰੀ ਉਤਸ਼ਾਹ ਪੈਦਾ ਕਰ ਦਿੱਤਾ ਹੈ।