ਵਿਵਾਦਾਂ ਤੋਂ ਬਾਅਦ ਮੈਰੀ ਕਾਮ ਨੇ ਮੰਗੀ ਜਨਤਕ ਮੁਆਫ਼ੀ; ਸਾਬਕਾ ਪਤੀ 'ਤੇ ਕੀਤੀ ਟਿੱਪਣੀ ਨੂੰ ਦੱਸਿਆ 'ਭਾਵੁਕ ਪਲ'

ਨਵੀਂ ਦਿੱਲੀ : ਓਲੰਪਿਕ ਤਮਗਾ ਜੇਤੂ ਅਤੇ ਦਿੱਗਜ ਭਾਰਤੀ ਮੁੱਕੇਬਾਜ਼ ਮੈਰੀ ਕਾਮ ਨੇ ਹਾਲ ਹੀ ਵਿੱਚ ਇੱਕ ਟਾਕ ਸ਼ੋਅ ਦੌਰਾਨ ਆਪਣੇ ਸਾਬਕਾ ਪਤੀ ਬਾਰੇ ਕੀਤੀਆਂ ਵਿਵਾਦਤ ਟਿੱਪਣੀਆਂ ਲਈ ਜਨਤਕ ਤੌਰ 'ਤੇ ਮੁਆਫ਼ੀ ਮੰਗ ਲਈ ਹੈ। ਐਤਵਾਰ ਨੂੰ ਇੰਸਟਾਗ੍ਰਾਮ 'ਤੇ ਸਾਂਝੀ ਕੀਤੀ ਇੱਕ ਵੀਡੀਓ ਵਿੱਚ ਮੈਰੀ ਕਾਮ ਨੇ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਦੇ ਬਿਆਨਾਂ ਨੂੰ ਗਲਤ ਸਮਝਿਆ ਗਿਆ ਅਤੇ ਉਹ ਗੱਲਾਂ ਬਹੁਤ ਜ਼ਿਆਦਾ ਭਾਵੁਕ ਪਲਾਂ ਵਿੱਚ ਕਹੀਆਂ ਗਈਆਂ ਸਨ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਬਿਆਨਾਂ ਕਾਰਨ ਸੋਸ਼ਲ ਮੀਡੀਆ 'ਤੇ ਕਈ ਲੋਕ ਭਰਮ ਦਾ ਸ਼ਿਕਾਰ ਹੋਏ, ਜਿਸ ਲਈ ਉਹ ਖਾਸ ਕਰਕੇ ਪੁਰਸ਼ ਭਾਈਚਾਰੇ ਤੋਂ ਮੁਆਫ਼ੀ ਮੰਗਦੀ ਹੈ। ਮੈਰੀ ਅਨੁਸਾਰ ਉਨ੍ਹਾਂ ਦਾ ਮਕਸਦ ਕਿਸੇ ਵੀ ਵਿਅਕਤੀ ਨੂੰ ਨੀਵਾਂ ਦਿਖਾਉਣਾ ਜਾਂ ਅਪਮਾਨਿਤ ਕਰਨਾ ਨਹੀਂ ਸੀ।

ਧੋਖੇ ਅਤੇ ਮਾਨਸਿਕ ਪਰੇਸ਼ਾਨੀ ਦਾ ਦਰਦ 
ਛੇ ਵਾਰ ਦੀ ਵਿਸ਼ਵ ਚੈਂਪੀਅਨ ਨੇ ਦੱਸਿਆ ਕਿ ਉਨ੍ਹਾਂ ਦੀਆਂ ਟਿੱਪਣੀਆਂ ਨਿੱਜੀ ਮੁੱਦਿਆਂ ਅਤੇ ਸਾਲਾਂ ਤੋਂ ਮਨ ਵਿੱਚ ਦਬੀ ਹੋਈ ਭਾਵੁਕ ਪਰੇਸ਼ਾਨੀ ਦਾ ਨਤੀਜਾ ਸਨ। ਉਨ੍ਹਾਂ ਨੇ ਸਾਂਝਾ ਕੀਤਾ ਕਿ ਉਸ ਸਮੇਂ ਦਰਦ, ਅਵਸਾਦ (depression) ਅਤੇ ਇਸਤੇਮਾਲ ਕੀਤੇ ਜਾਣ ਤੇ ਧੋਖਾ ਮਿਲਣ ਦਾ ਅਹਿਸਾਸ ਇੱਕੋ ਵੇਲੇ ਸਾਹਮਣੇ ਆ ਗਿਆ ਸੀ। ਜ਼ਿਕਰਯੋਗ ਹੈ ਕਿ ਇੱਕ ਟਾਕ ਸ਼ੋਅ ਦੌਰਾਨ ਮੈਰੀ ਕਾਮ ਨੇ ਆਪਣੇ ਸਾਬਕਾ ਪਤੀ ਬਾਰੇ ਕਿਹਾ ਸੀ ਕਿ ਉਸ ਨੇ "ਇੱਕ ਰੁਪਿਆ ਵੀ ਨਹੀਂ ਕਮਾਇਆ", ਜਿਸ ਤੋਂ ਬਾਅਦ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਨੂੰ ਕਾਫ਼ੀ ਟ੍ਰੋਲ ਕੀਤਾ ਗਿਆ ਅਤੇ ਪਤੀ ਨੂੰ ਘੱਟ ਮਹੱਤਵ ਦੇਣ ਦੇ ਦੋਸ਼ ਲੱਗੇ।

ਫੁੱਟਬਾਲ ਅਤੇ ਕਰੀਅਰ ਸਬੰਧੀ ਦਾਅਵਿਆਂ ਦਾ ਖੰਡਨ
ਮੈਰੀ ਕਾਮ ਨੇ ਇਨ੍ਹਾਂ ਦਾਅਵਿਆਂ ਨੂੰ ਵੀ ਗਲਤ ਦੱਸਿਆ ਕਿ ਉਨ੍ਹਾਂ ਦੀਆਂ ਗੱਲਾਂ ਫੁੱਟਬਾਲ ਜਾਂ ਖੇਡ ਜਗਤ ਦੇ ਖਿਲਾਫ਼ ਸਨ। ਉਨ੍ਹਾਂ ਕਿਹਾ ਕਿ ਉਹ ਸੁਨੀਲ ਛੇਤਰੀ ਅਤੇ ਬਾਈਚੁੰਗ ਭੂਟੀਆ ਵਰਗੇ ਖਿਡਾਰੀਆਂ ਦਾ ਬਹੁਤ ਸਨਮਾਨ ਕਰਦੀ ਹੈ। ਸਾਬਕਾ ਪਤੀ ਦੇ ਇਸ ਦਾਅਵੇ 'ਤੇ ਕਿ ਉਸ ਨੇ ਵਿਆਹ ਲਈ ਆਪਣਾ ਫੁੱਟਬਾਲ ਕਰੀਅਰ ਕੁਰਬਾਨ ਕੀਤਾ, ਮੈਰੀ ਨੇ ਸਪੱਸ਼ਟ ਕੀਤਾ ਕਿ ਜਦੋਂ ਉਹ ਦਿੱਲੀ ਵਿੱਚ ਮਿਲੇ ਸਨ, ਉਦੋਂ ਤੱਕ ਉਹ ਫੁੱਟਬਾਲ ਛੱਡ ਚੁੱਕਾ ਸੀ। ਮੈਰੀ ਅਨੁਸਾਰ ਉਨ੍ਹਾਂ ਦਾ ਵਿਆਹ ਸ਼ੁਰੂਆਤੀ ਸਾਲਾਂ ਵਿੱਚ ਠੀਕ ਸੀ, ਪਰ ਭਰੋਸਾ ਟੁੱਟਣ ਤੋਂ ਬਾਅਦ ਚੀਜ਼ਾਂ ਬਦਲ ਗਈਆਂ ਅਤੇ ਅਪ੍ਰੈਲ 2025 ਵਿੱਚ ਉਨ੍ਹਾਂ ਦਾ ਤਲਾਕ ਹੋ ਗਿਆ।