ਇੰਗਲੈਂਡ ਦੇ ਸਾਬਕਾ ਕਪਤਾਨ ਨਾਸਿਰ ਹੁਸੈਨ ਨੇ ਅੰਤਰਰਾਸ਼ਟਰੀ ਕ੍ਰਿਕਟ ਪ੍ਰੋਗਰਾਮ ਨੂੰ ''ਮਜ਼ਾਕ'' ਕਰਾਰ ਦਿੱਤਾ

ਲੰਡਨ (ਏਜੰਸੀ)- ਇੰਗਲੈਂਡ ਦੇ ਸਾਬਕਾ ਕਪਤਾਨ ਨਾਸਿਰ ਹੁਸੈਨ ਨੇ ਅੰਤਰਰਾਸ਼ਟਰੀ ਕ੍ਰਿਕਟ ਦੇ ਰੁਝੇਵਿਆਂ ਭਰੇ ਕਾਰਜਕ੍ਰਮ ਦੀ ਆਲੋਚਨਾ ਕਰਦਿਆਂ ਇਸ ਨੂੰ ਖਿਡਾਰੀਆਂ ਲਈ ਬਹੁਤ ਥਕਾ ਦੇਣ ਵਾਲਾ ਕਰਾਰ ਦਿੱਤਾ ਹੈ। ਹੁਸੈਨ ਦੀ ਇਹ ਪ੍ਰਤੀਕਿਰਿਆ ਇੰਗਲੈਂਡ ਨੂੰ 2019 ਵਿਸ਼ਵ ਕੱਪ ਖ਼ਿਤਾਬ ਦਿਵਾਉਣ 'ਚ ਅਹਿਮ ਭੂਮਿਕਾ ਨਿਭਾਉਣ ਵਾਲੇ ਆਲਰਾਊਂਡਰ ਬੇਨ ਸਟੋਕਸ ਦੇ ਵਨਡੇ ਫਾਰਮੈਟ ਤੋਂ ਸੰਨਿਆਸ ਲੈਣ ਦੇ ਐਲਾਨ ਤੋਂ ਬਾਅਦ ਆਈ ਹੈ। 31 ਸਾਲਾ ਟੈਸਟ ਕਪਤਾਨ ਸਟੋਕਸ ਨੇ ਵਨਡੇ ਫਾਰਮੈਟ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰਦੇ ਹੋਏ ਕਿਹਾ ਕਿ ਉਨ੍ਹਾਂ ਲਈ ਤਿੰਨੋਂ ਫਾਰਮੈਟਾਂ 'ਚ ਖੇਡਣਾ 'ਸੰਭਵ ਨਹੀਂ' ਹੈ।

ਹੁਸੈਨ ਨੇ ਆਪਣੇ ਕਾਲਮ 'ਚ ਸਟੋਕਸ ਦਾ ਜ਼ਿਕਰ ਕਰਦੇ ਹੋਏ ਲਿਖਿਆ, 'ਇਹ ਨਿਰਾਸ਼ਾਜਨਕ ਹੈ। ਇਸ ਤੋਂ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਇਸ ਸਮੇਂ ਕ੍ਰਿਕਟ ਦਾ ਸ਼ਡਿਊਲ ਕਿਵੇਂ ਹੈ। ਇਹ ਖਿਡਾਰੀਆਂ ਨੂੰ ਥਕਾ ਦੇਣ ਵਾਲਾ ਹੈ।' ਉਨ੍ਹਾਂ ਕਿਹਾ, 'ਜੇਕਰ ਆਈ.ਸੀ.ਸੀ. ਆਪਣਾ ਕ੍ਰਿਕੇਟ ਸ਼ਡਿਊਲ ਬਣਾਉਂਦਾ ਹੈ ਅਤੇ ਵੱਖ-ਵੱਖ ਕ੍ਰਿਕੇਟ ਬੋਰਡ ਬਾਕੀ ਰਹਿੰਦੇ ਸਮੇਂ ਵਿੱਚ ਆਪਣੇ ਟੂਰਨਾਮੈਂਟ ਆਯੋਜਿਤ ਕਰਦੇ ਹਨ, ਤਾਂ ਖਿਡਾਰੀ ਜ਼ਿਆਦਾ ਦੇਰ ਤੱਕ ਨਹੀਂ ਖੇਡ ਸਕਣਗੇ।' ਉਨ੍ਹਾਂ ਕਿਹਾ, 'ਸਟੋਕਸ ਨੇ ਸਿਰਫ਼ 31 ਸਾਲ ਦੀ ਉਮਰ 'ਚ ਫਾਰਮੈਟ ਨੂੰ ਅਲਵਿਦਾ ਕਹਿ ਦਿੱਤਾ, ਇਹ ਸਹੀ ਨਹੀਂ ਹੋ ਸਕਦਾ। ਕ੍ਰਿਕਟ ਸ਼ਡਿਊਲ 'ਤੇ ਨਜ਼ਰ ਰੱਖਣ ਦੀ ਲੋੜ ਹੈ। ਮੌਜੂਦਾ ਸਮੇਂ ਵਿੱਚ ਇਹ ਇੱਕ 'ਮਜ਼ਾਕ' ਵਾਂਗ ਹੈ।' ਹੁਸੈਨ ਨੇ ਕਿਹਾ ਕਿ ਉਨ੍ਹਾਂ ਦੇ ਸੰਨਿਆਸ ਬਾਰੇ ਸੁਣਨਾ ਮੇਰੇ ਲਈ ਹੈਰਾਨੀਜਨਕ ਸੀ। ਉਨ੍ਹਾਂ ਨੇ 2019 ਵਿੱਚ ਟੀਮ ਨੂੰ ਸਭ ਤੋਂ ਵੱਡੀ ਸਫ਼ਲਤਾ ਦਿਵਾਈ। ਜੇਕਰ ਤੁਸੀਂ ਮੈਨੂੰ ਇਸ ਟੀਮ ਵਿੱਚੋਂ ਇੱਕ ਖਿਡਾਰੀ ਨੂੰ ਚੁਣਨ ਲਈ ਕਹਿੰਦੇ ਹੋ, ਤਾਂ ਸਟੋਕਸ ਸਭ ਤੋਂ ਵੱਡਾ ਮੈਚ ਜੇਤੂ ਹੈ।

ਸਟੋਕਸ ਨੇ ਹਾਲਾਂਕਿ 2019 ਵਿਸ਼ਵ ਕੱਪ ਤੋਂ ਬਾਅਦ ਸਿਰਫ਼ 9 ਵਨਡੇ ਖੇਡੇ ਹਨ। ਉਹ ਸੱਟ ਲੱਗਣ, ਮਾਨਸਿਕ ਸਿਹਤ 'ਚ ਖ਼ਰਾਬੀ ਅਤੇ ਕੰਮ ਦੇ ਬੋਝ ਦੇ ਪ੍ਰਬੰਧਨ ਕਾਰਨ ਲੰਬੇ ਸਮੇਂ ਤੋਂ ਟੀਮ ਤੋਂ ਬਾਹਰ ਰਹੇ। ਇੰਗਲੈਂਡ ਦੇ ਇਕ ਹੋਰ ਸਾਬਕਾ ਕਪਤਾਨ ਮਾਈਕਲ ਵਾਨ ਨੇ ਕਿਹਾ ਕਿ ਖਿਡਾਰੀਆਂ ਦਾ ਬੋਝ ਘੱਟ ਕਰਨ ਲਈ ਟੀਮਾਂ ਨੂੰ ਦੁਵੱਲੀ ਸੀਰੀਜ਼ 'ਚ ਕਟੌਤੀ ਕਰਨੀ ਪਵੇਗੀ। ਉਨ੍ਹਾਂ ਕਿਹਾ ਕਿ ਜੇਕਰ ਦੁਨੀਆ ਭਰ ਦੇ ਕ੍ਰਿਕਟ ਬੋਰਡ ਆਪਣੀ ਲੀਗ ਕ੍ਰਿਕਟ ਦਾ ਆਯੋਜਨ ਕਰਦੇ ਹਨ, ਤਾਂ ਦੁਵੱਲੀ ਵਨਡੇ ਅਤੇ ਟੀ-20 ਸੀਰੀਜ਼ ਨੂੰ ਖ਼ਤਮ ਕਰਨਾ ਹੋਵੇਗਾ।