ਨਤਾਸ਼ਾ ਨਾਲ ਤਲਾਕ ਤੋਂ ਬਾਅਦ ਪਹਿਲੀ ਵਾਰ ਬੋਲੇ ਹਾਰਦਿਕ, ਆਖੀ ਇਹ ਗੱਲ

ਮੁੰਬਈ—ਭਾਰਤ ਦੇ ਆਲਰਾਊਂਡਰ ਹਾਰਦਿਕ ਪੰਡਯਾ ਨੇ ਸ਼ਨੀਵਾਰ ਨੂੰ ਫਿਟਨੈੱਸ ਨੂੰ ਛੱਡ ਕੇ ਸੁਰਖੀਆਂ 'ਚ ਰਹਿਣ ਵਾਲੇ ਮੁੱਦਿਆਂ 'ਤੇ ਚੁੱਪੀ ਬਣਾਈ ਰੱਖੀ। ਪੰਡਯਾ ਇਸ ਸਮੇਂ ਮੈਦਾਨ ਦੇ ਅੰਦਰ ਅਤੇ ਬਾਹਰ ਕਈ ਚੁਣੌਤੀਆਂ ਦਾ ਸਾਹਮਣਾ ਕਰ ਰਹੇ ਹਨ ਪਰ ਤੁਸੀਂ ਉਨ੍ਹਾਂ ਦੇ ਚਿਹਰੇ 'ਤੇ ਚੁਣੌਤੀਆਂ ਦੀ ਸ਼ਿਕਨ ਨਹੀਂ ਦੇਖ ਸਕਦੇ ਜਿਸ ਨੂੰ ਉਨ੍ਹਾਂ ਨੇ ਚੰਗੀ ਤਰ੍ਹਾਂ ਛੁਪਾਇਆ ਹੋਇਆ ਹੈ। ਹਾਲ ਹੀ ਵਿੱਚ ਵਾਪਰੀਆਂ ਇਨ੍ਹਾਂ ਘਟਨਾਵਾਂ ਕਾਰਨ ਉਹ ਚਰਚਾ ਦਾ ਵਿਸ਼ਾ ਬਣੇ ਰਹੇ। ਪਰ ਉਨ੍ਹਾਂ ਨੇ ਆਪਣੇ 'ਸਪੋਰਟਸ ਐਪਰਲ ਬ੍ਰਾਂਡ' ਦੇ ਲਾਂਚ ਦੇ ਮੌਕੇ 'ਤੇ ਆਪਣੀਆਂ ਸਾਰੀਆਂ ਭਾਵਨਾਵਾਂ ਨੂੰ ਛੁਪਾਉਂਦੇ ਹੋਏ ਫਿਟਨੈੱਸ 'ਤੇ ਲੰਮੀ ਗੱਲਬਾਤ ਕੀਤੀ। 2 ਦਿਨ ਪਹਿਲਾਂ ਪੰਡਯਾ ਅਤੇ ਨਤਾਸ਼ਾ ਨੇ ਵਿਆਹ ਦੇ ਚਾਰ ਸਾਲ ਬਾਅਦ ਅਧਿਕਾਰਤ ਤੌਰ 'ਤੇ ਵੱਖ ਹੋਣ ਦਾ ਐਲਾਨ ਕੀਤਾ ਸੀ। ਇਸ ਤੋਂ ਠੀਕ ਪਹਿਲਾਂ ਉਹ ਸ਼੍ਰੀਲੰਕਾ ਦੇ ਆਗਾਮੀ ਦੌਰੇ ਲਈ ਭਾਰਤੀ ਟੀ-20 ਟੀਮ ਦਾ ਕਪਤਾਨ ਬਣਨ ਦੀ ਦੌੜ ਵਿੱਚ ਸੂਰਿਆਕੁਮਾਰ ਯਾਦਵ ਤੋਂ ਪਿੱਛੇ ਰਹਿ ਗਏ ਸੀ। ਹਾਲਾਂਕਿ ਸ਼ਨੀਵਾਰ ਨੂੰ ਉਨ੍ਹਾਂ ਨੇ ਸਿਰਫ ਫਿਟਨੈੱਸ ਨੂੰ ਲੈ ਕੇ ਗੱਲ ਕੀਤੀ।
ਪੰਡਯਾ ਨੇ ਕਿਹਾ ਕਿ ਜਦੋਂ ਸਾਡਾ ਸਰੀਰ ਨਹੀਂ ਥੱਕਦਾ ਤਾਂ ਸਾਡਾ ਦਿਮਾਗ ਥੱਕ ਜਾਂਦਾ ਹੈ। ਇਸ ਲਈ ਜ਼ਿੰਦਗੀ ਵਿੱਚ ਕਈ ਵਾਰ ਜਦੋਂ ਮੈਂ ਆਪਣੀਆਂ ਸੀਮਾਵਾਂ ਨੂੰ ਅੱਗੇ ਵਧਾਉਣ ਦੇ ਯੋਗ ਸੀ ਤਾਂ ਅਜਿਹਾ ਉਦੋਂ ਹੋਇਆ ਜਦੋਂ ਮੇਰਾ ਦਿਮਾਗ ਥੱਕ ਜਾਂਦਾ ਸੀ ਪਰ ਮੈਂ ਆਪਣੇ ਸਰੀਰ ਨੂੰ ਅੱਗੇ ਵਧਣ ਲਈ ਕਹਿੰਦਾ ਰਹਿੰਦਾ। ਪੰਡਯਾ ਨੇ ਕਿਹਾ ਕਿ ਜੇਕਰ ਤੁਸੀਂ ਅਤੇ ਮੈਂ 20-20 ਕੋਸ਼ਿਸ਼ ਕਰਦੇ ਹਾਂ ਤਾਂ ਦੋਵਾਂ ਦੇ ਵਿਚਕਾਰ ਦਾ ਅੰਤਰ ਨਹੀਂ ਰਹਿੰਦਾ। ਪਰ ਜੇਕਰ ਮੈਂ 25 ਕੋਸ਼ਿਸ਼ਾਂ ਕਰਦਾ ਹਾਂ ਅਤੇ ਆਪਣੇ ਆਪ ਨੂੰ ਚੁਣੌਤੀ ਦਿੰਦਾ ਹਾਂ ਤਾਂ ਅਗਲੀ ਵਾਰ ਮੈਂ 25 ਕੋਸ਼ਿਸ਼ਾਂ ਕਰਾਂਗਾ। ਫਿਰ ਮੈਂ ਅਗਲੀ ਵਾਰ 30 ਕੋਸ਼ਿਸ਼ਾਂ ਕਰਾਂਗਾ। ਪਰ ਵਿਡੰਬਨਾ ਇਹ ਹੈ ਕਿ ਫਿਟਨੈੱਸ ਨੂੰ ਲੈ ਕੇ ਚਿੰਤਾ ਕਾਰਨ ਉਨ੍ਹਾਂ ਦੇ ਕਪਤਾਨ ਬਣਨ ਦੀ ਸੰਭਾਵਨਾ ਘੱਟ ਗਈ। ਫਿਟਨੈੱਸ ਦੇ ਕਾਰਨ, ਉਹ ਖੇਡ ਦੇ ਤਿੰਨੋਂ ਫਾਰਮੈਟਾਂ ਵਿੱਚ ਨਹੀਂ ਖੇਡ ਪਾਏ ਅਤੇ ਸੀਮਤ ਓਵਰਾਂ ਦੀਆਂ ਖੇਡਾਂ ਵਿੱਚ, ਖਾਸ ਕਰਕੇ ਵਨਡੇ ਵਿੱਚ ਜ਼ਿਆਦਾ ਗੇਂਦਬਾਜ਼ੀ ਨਹੀਂ ਕਰ ਪਾਏ। ਇਸ ਮਹੀਨੇ ਦੀ ਸ਼ੁਰੂਆਤ 'ਚ ਪੰਡਯਾ ਨੇ ਟੀ-20 ਵਿਸ਼ਵ ਕੱਪ ਜੇਤੂ ਟੀਮ ਨਾਲ ਖੁੱਲ੍ਹੀ ਬੱਸ 'ਚ ਜਸ਼ਨ ਮਨਾਇਆ ਸੀ। ਪਰ ਇਸ ਦੇ ਕੁਝ ਹਫ਼ਤਿਆਂ ਵਿੱਚ ਪੰਡਯਾ ਨੇ ਕੁਝ ਮਹੱਤਵਪੂਰਨ ਚੀਜ਼ਾਂ ਗੁਆ ਦਿੱਤੀਆਂ।
ਭਾਰਤ ਦੇ ਟੀ-20 ਵਿਸ਼ਵ ਕੱਪ ਦੇ ਉਪ-ਕਪਤਾਨ ਪੰਡਯਾ ਨੂੰ ਰੋਹਿਤ ਸ਼ਰਮਾ ਦੇ ਬਦਲ ਵਜੋਂ ਦੇਖਿਆ ਜਾ ਰਿਹਾ ਸੀ। ਪਰ ਕਪਤਾਨੀ ਦੀ ਭੂਮਿਕਾ ਤੋਂ ਉਨ੍ਹਾਂ ਦੇ ਹਟਾਏ ਜਾਣ ਦੀ ਖ਼ਬਰ ਉਨ੍ਹਾਂ ਦੇ ਤਲਾਕ ਦੇ ਐਲਾਨ ਦੇ ਨਾਲ ਹੀ ਆਈ। ਪਰ ਪੰਡਯਾ 'ਤੇ ਇਸ ਸਭ ਦਾ ਕੋਈ ਅਸਰ ਨਹੀਂ ਹੋਇਆ। ਆਪਣੇ ਸਪੋਰਟਸ ਐਪਰਲ ਬ੍ਰਾਂਡ ਲਾਂਚ ਕਰਨ ਲਈ ਉਹ ਇਨ੍ਹਾਂ ਦੇ ਬਾਅਦ ਪਹਿਲੀ ਵਾਰ ਜਨਤਕ ਤੌਰ 'ਤੇ ਦਿਖੇ ਜਿਸ ਵਿੱਚ ਉਨ੍ਹਾਂ ਨੇ ਆਪਣੀ ਫਿਟਨੈੱਸ ਬਾਰੇ ਜਾਣਕਾਰੀ ਸਾਂਝੀ ਕੀਤੀ। 30 ਸਾਲਾ ਪੰਡਯਾ ਨੇ ਕਿਹਾ ਕਿ ਕਈ ਵਾਰ ਆਪਣੇ ਦਿਮਾਗ ਨੂੰ ਵਿਚਾਰਾਂ ਤੋਂ ਬਿਨਾਂ ਰੱਖਣਾ ਬਹੁਤ ਜ਼ਰੂਰੀ ਹੁੰਦਾ ਹੈ। ਜਦੋਂ ਮੇਰਾ ਟ੍ਰੇਨਰ ਮੈਨੂੰ 10 ਪੁਸ਼ ਅੱਪ ਕਰਨ ਲਈ ਕਹਿੰਦਾ ਹੈ ਤਾਂ ਮੈਂ ਹਮੇਸ਼ਾ 15 ਪੁਸ਼ ਅੱਪ ਕਰਦਾ ਹਾਂ। ਉਨ੍ਹਾਂ ਨੇ ਕਿਹਾ ਕਿ ਇਸ ਨਾਲ ਮੇਰਾ ਸਟੈਮਿਨਾ ਵਧਿਆ ਹੈ ਅਤੇ ਮੈਨੂੰ ਲੱਗਦਾ ਹੈ ਕਿ ਜੋ ਵੀ ਫਿਟਨੈੱਸ ਸਫਰ ਸ਼ੁਰੂ ਕਰਨਾ ਚਾਹੁੰਦਾ ਹੈ, ਉਨ੍ਹਾਂ ਨੂੰ ਇਸ 'ਤੇ ਧਿਆਨ ਦੇਣਾ ਚਾਹੀਦਾ ਹੈ।