ਫੀਫਾ 2022 : ਅਰਜਨਟੀਨਾ ਨੇ ਮੈਕਸੀਕੋ ਨੂੰ ਹਰਾ ਕੇ ਨਾਕਆਊਟ ਦੀਆਂ ਉਮੀਦਾਂ ਨੂੰ ਰੱਖਿਆ ਬਰਕਰਾਰ

ਸਪੋਰਟਸ ਡੈਸਕ : ਫੀਫਾ ਵਿਸ਼ਵ ਕੱਪ ਦੇ ਗਰੁੱਪ-ਸੀ ਮੈਚ ’ਚ ਐਤਵਾਰ ਨੂੰ ਅਰਜਨਟੀਨਾ ਨੇ ਮੈਕਸੀਕੋ ਨੂੰ 2-0 ਨਾਲ ਹਰਾ ਦਿੱਤਾ। ਇਸ ਨਾਲ ਅਰਜਨਟੀਨਾ ਨੇ ਨਾਕਆਊਟ ਪੜਾਅ ਲਈ ਆਪਣਾ ਦਾਅਵਾ ਬਰਕਰਾਰ ਰੱਖਿਆ। ਮੈਕਸੀਕੋ ਪਿਛਲੇ 11 ਮੈਚਾਂ ’ਚ ਅਰਜਨਟੀਨਾ ਤੋਂ ਹਾਰਦਾ ਰਿਹਾ ਹੈ ਅਤੇ ਇਸ ਮੈਚ ’ਚ ਵੀ ਉਹ ਅਰਜਨਟੀਨਾ ਖ਼ਿਲਾਫ਼ ਹਾਰ ਦਾ ਸਿਲਸਿਲਾ ਨਹੀਂ ਤੋੜ ਸਕਿਆ। ਮੈਚ ਦੇ ਪਹਿਲੇ ਅੱਧ ’ਚ ਦੋਵਾਂ ਟੀਮਾਂ ਨੂੰ ਮੌਕੇ ਮਿਲੇ ਪਰ ਕੋਈ ਵੀ ਟੀਮ ਇਨ੍ਹਾਂ ਮੌਕਿਆਂ ਦਾ ਫਾਇਦਾ ਨਹੀਂ ਉਠਾ ਸਕੀ। ਮੈਕਸੀਕੋ ਟੀਮ ਦੇ ਡਿਫੈਂਡਰਾਂ ਨੇ ਅਰਜਨਟੀਨਾ ਦੇ ਸਟਾਰ ਸਟ੍ਰਾਈਕਰ ਲਿਓਨਿਲ ਮੇਸੀ ਨੂੰ ਪਹਿਲੇ ਹਾਫ ’ਚ ਗੋਲ ਕਰਨ ਦਾ ਇਕ ਵੀ ਮੌਕਾ ਨਹੀਂ ਦਿੱਤਾ।

ਇਹ ਖ਼ਬਰ ਵੀ ਪੜ੍ਹੋ : ਐਮਬਾਪੇ ਦੇ ਦੋ ਸ਼ਾਨਦਾਰ ਗੋਲ, ਫਰਾਂਸ ਨਾਕਆਊਟ ’ਚ ਪਹੁੰਚਣ ਵਾਲੀ ਪਹਿਲੀ ਟੀਮ ਬਣੀ

ਹਾਲਾਂਕਿ ਦੂਜੇ ਹਾਫ 'ਚ ਮੈਕਸੀਕੋ ਅਰਜਨਟੀਨਾ ਨੂੰ ਜ਼ਿਆਦਾ ਦੇਰ ਤੱਕ ਨਹੀਂ ਰੋਕ ਸਕਿਆ। ਮੈਚ ਦੇ 64ਵੇਂ ਮਿੰਟ ’ਚ ਮੇਸੀ ਨੇ ਮੈਕਸੀਕੋ ਦੇ ਡਿਫੈਂਡਰਾਂ ਨੂੰ ਚਕਮਾ ਦੇ ਕੇ ਪਹਿਲਾ ਗੋਲ ਕੀਤਾ ਅਤੇ ਅਰਜਨਟੀਨਾ ਦਾ ਸਕੋਰ 1-0 ਕਰ ਦਿੱਤਾ। ਇਸ ਦੇ ਨਾਲ ਹੀ ਐਨਜ਼ੋ ਫਰਨਾਂਡੀਜ਼ ਨੇ ਮੈਚ ਦੇ 87ਵੇਂ ਮਿੰਟ ’ਚ ਇੱਕ ਹੋਰ ਗੋਲ ਕਰਕੇ ਲੀਡ ਨੂੰ ਦੁੱਗਣਾ ਕਰ ਦਿੱਤਾ। ਮੈਚ ਦੇ ਅੰਤ ਤੱਕ ਮੈਕਸੀਕੋ ਕੋਈ ਗੋਲ ਨਹੀਂ ਕਰ ਸਕਿਆ ਅਤੇ ਅਰਜਨਟੀਨਾ ਨੇ ਇਹ ਮੈਚ 2-0 ਨਾਲ ਜਿੱਤ ਲਿਆ।

ਇਹ ਖ਼ਬਰ ਵੀ ਪੜ੍ਹੋ : ਗੁਜਰਾਤ ’ਚ ਚੋਣ ਡਿਊਟੀ ’ਤੇ ਤਾਇਨਾਤ ਜਵਾਨ ਨੇ ਆਪਣੇ ਸਾਥੀਆਂ ’ਤੇ ਕੀਤੀ ਫਾਇਰਿੰਗ, ਦੋ ਦੀ ਮੌਤ

ਸਾਊਦੀ ਅਰਬ ਤੋਂ ਹਾਰਨ ਤੋਂ ਬਾਅਦ ਅਰਜਨਟੀਨਾ ਹੁਣ ਇਸ ਜਿੱਤ ਨਾਲ 3 ਅੰਕਾਂ ਨਾਲ ਗਰੁੱਪ-ਸੀ ’ਚ ਦੂਜੇ ਸਥਾਨ ’ਤੇ ਪਹੁੰਚ ਗਿਆ ਹੈ। ਪੋਲੈਂਡ 4 ਅੰਕਾਂ ਨਾਲ ਗਰੁੱਪ ’ਚ ਪਹਿਲੇ ਸਥਾਨ ’ਤੇ ਹੈ ਅਤੇ ਅਰਜਨਟੀਨਾ ਨੇ ਆਪਣਾ ਅਗਲਾ ਮੈਚ ਪੋਲੈਂਡ ਨਾਲ ਖੇਡਣਾ ਹੈ। ਅਰਜਨਟੀਨਾ ਲਈ ਇਹ ਮੈਚ ਬਹੁਤ ਅਹਿਮ ਹੋਣ ਵਾਲਾ ਹੈ।