...ਤਾਂ ਕ੍ਰਿਕਟ ''ਚ ਹੁਣ ਨਹੀਂ ਉਛਾਲਿਆ ਜਾਵੇਗਾ ਟਾਸ ਦਾ ਸਿੱਕਾ!
Tuesday, Dec 11, 2018 - 03:52 PM (IST)
ਨਵੀਂ ਦਿੱਲੀ— ਟੈਸਟ ਕ੍ਰਿਕਟ 'ਚ ਟਾਸ ਨੂੰ ਖਤਮ ਕਰਨ ਨੂੰ ਲੈ ਕੇ ਬੀਤੇ ਕੁਝ ਸਮੇਂ ਤੋਂ ਬਹਿਸ ਚਲ ਰਹੀ ਹੈ ਪਰ ਹੁਣ ਟੀ-20 ਕ੍ਰਿਕਟ 'ਚ ਟਾਸ ਉਛਾਲਣ ਵਾਲਾ ਸਿੱਕਾ ਬੀਤੇ ਦਿਨਾਂ ਦੀ ਗੱਲ ਹੋਣ ਵਾਲੀ ਹੈ। ਆਈ.ਪੀ.ਐੱਲ. ਦੇ ਬਾਅਦ ਦੁਨੀਆ ਦੀ ਸਭ ਤੋਂ ਹਿੱਟ ਟੀ-20 ਲੀਗ ਭਾਵ ਬਿਗ ਬੈਸ਼ ਲੀਗ 'ਚ ਹੁਣ ਸਿੱਕੇ ਨੂੰ ਟਾਸ ਲਈ ਉਛਾਲਣ ਦੀ ਰਵਾਇਤ ਖਤਮ ਹੋਣ ਜਾ ਰਹੀ ਹੈ। ਅਜਿਹਾ ਨਹੀਂ ਹੈ ਕਿ ਇਸ ਲੀਗ 'ਚ ਟਾਸ ਖਤਮ ਕੀਤਾ ਜਾ ਰਿਹਾ ਹੈ। ਟਾਸ ਤਾਂ ਹੋਵੇਗਾ ਪਰ ਇਸ ਲਈ ਸਿੱਕਾ ਨਹੀਂ ਸਗੋਂ ਬੱਲਾ ਉਛਾਲਿਆ ਜਾਵੇਗਾ। ਮੇਜ਼ਬਾਨ ਕਪਤਾਨ ਬੱਲੇ ਨੂੰ ਉਛਾਲੇਗਾ ਅਤੇ ਮਹਿਮਾਨ ਟੀਮ ਦਾ ਕਪਤਾਨ ਹੈਡਸ ਅਤੇ ਟੇਲਸ ਬੋਲਣ ਦੀ ਬਜਾਏ 'ਹਿਲਸ' ਅਤੇ 'ਫਲੈਟ' ਕਹੇਗਾ ਜਿਸ ਤੋਂ ਬਾਅਦ ਹੀ ਬੱਲੇ ਦੀ ਪੋਜ਼ੀਸ਼ਨ ਨਾਲ ਟਾਸ ਦਾ ਫੈਸਲਾ ਹੋਵੇਗਾ।
ਇਸ ਵੱਡੇ ਫੈਸਲੇ ਦੇ ਬਾਅਦ ਕ੍ਰਿਕਟ ਆਸਟਰੇਲੀਆ ਦੇ ਬਿਗ ਬੈਸ਼ ਲੀਗ ਦੇ ਹੈੱਡ ਕਿਮ ਮੈਕਕੋਨੀ ਦਾ ਕਹਿਣਾ ਹੈ ਕਿ ਇਹ ਉਨ੍ਹਾਂ ਦੇ ਜੀਵਨ ਦਾ ਬਹੁਤ ਖਾਸ ਸਮਾਂ ਹੈ। ਉਨ੍ਹਾਂ ਦਾ ਕਹਿਣਾ ਹੈ, ''ਕੁਝ ਲੋਕ ਜ਼ਰੂਰ ਇਸ ਗੱਲ ਦਾ ਵਿਰੋਧ ਕਰਨਗੇ ਪਰ ਮੈਂ ਉਨ੍ਹਾਂ ਨੂੰ ਇਹ ਪੁੱਛਣਾ ਚਾਹਾਂਗਾ ਕਿ ਆਖ਼ਰੀ ਵਾਰ ਉਨ੍ਹਾਂ ਨੇ ਕਦੋਂ ਟਾਸ ਲਈ ਸਿੱਕੇ ਨੂੰ ਗੌਰ ਨਾਲ ਵੇਖਿਆ ਸੀ।'' ਅੱਠ ਸਾਲ ਪਹਿਲਾਂ ਲਾਂਚ ਹੋਈ ਬਿਗ ਬੈਸ਼ ਲੀਗ ਨੇ ਪਿਛਲੇ ਕੁਝ ਸਮੇਂ 'ਚ ਸ਼ਾਨਦਾਰ ਕਾਮਯਾਬੀ ਹਾਸਲ ਕੀਤੀ ਹੈ ਅਤੇ ਸਟੇਡੀਅਮ 'ਚ ਕਾਫੀ ਦਰਸ਼ਕ ਇਸ ਨੁੰ ਵੇਖਣ ਵੀ ਆਉਂਦੇ ਹਨ। ਮੈਕਕੋਨੀ ਨੇ ਇਸ ਖਦਸ਼ੇ ਨੂੰ ਵੀ ਖਾਰਜ ਕਰ ਦਿੱਤਾ ਹੈ ਕਿ ਬੈਟ ਨੂੰ ਟਾਸ ਲਈ ਉਛਾਲੇ ਜਾਣ ਨਾਲ ਟਾਸ ਦੇ ਫੈਸਲੇ 'ਚ ਕੋਈ ਗਲਤਫਹਿਮੀ ਪੈਦਾ ਹੋ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਬੈਟ ਨਿਰਮਾਤਾ ਕੰਪਨੀ ਕੂਕਾਬੁਰਾ ਨੇ ਇਸ ਮਸਲੇ 'ਤੇ ਪੂਰਾ ਟ੍ਰਾਇਲ ਕਰ ਲਿਆ ਹੈ।
