ਕੈਂਡੀਡੇਟਸ ਸ਼ਤਰੰਜ : ਪ੍ਰਗਿਆਨੰਦਾ ਨੇ ਵਿਦਿਤ ਨੂੰ ਹਰਾਇਆ

ਟੋਰਾਂਟੋ, (ਭਾਸ਼ਾ) ਭਾਰਤੀ ਗ੍ਰੈਂਡਮਾਸਟਰ ਆਰ ਪ੍ਰਗਿਆਨੰਦਾ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਇੱਥੇ ਕੈਂਡੀਡੇਟਸ ਸ਼ਤਰੰਜ ਟੂਰਨਾਮੈਂਟ ਦੇ ਤੀਜੇ ਦੌਰ ਵਿਚ ਹਮਵਤਨ ਵਿਦਿਤ ਗੁਜਰਾਤੀ ਨੂੰ ਹਰਾਇਆ। ਟੂਰਨਾਮੈਂਟ ਵਿੱਚ ਭਾਗ ਲੈਣ ਵਾਲੀ ਭੈਣ-ਭਰਾ ਦੀ ਪਹਿਲੀ ਜੋੜੀ ਲਈ ਇਹ ਚੰਗਾ ਦਿਨ ਰਿਹਾ ਕਿਉਂਕਿ ਪ੍ਰਗਿਆਨੰਦਾ ਦੀ ਵੱਡੀ ਭੈਣ ਆਰ ਵੈਸ਼ਾਲੀ ਨੇ ਵੀ ਬੁਲਗਾਰੀਆ ਦੀ ਨੂਰਗਿਉਲ ਸੇਲੀਮੋਵਾ ਨੂੰ ਹਰਾ ਕੇ ਆਪਣੀ ਪਹਿਲੀ ਜਿੱਤ ਦਰਜ ਕੀਤੀ। ਮਹਿਲਾ ਵਰਗ ਵਿੱਚ ਸਿਰਫ਼ ਇਸ ਮੈਚ ਦਾ ਹੀ ਨਤੀਜਾ ਨਿਕਲਿਆ। ਪੁਰਸ਼ ਵਰਗ 'ਚ ਡੀ'ਗੁਕੇਸ਼ ਰੂਸ ਦੇ ਇਆਨ ਨੇਪੋਮਨੀਆਚਚੀ ਦੇ ਮਜ਼ਬੂਤ ਡਿਫੈਂਸ ਨੂੰ ਤੋੜਨ 'ਚ ਅਸਫਲ ਰਹੇ ਜਦਕਿ ਫਰਾਂਸ ਦੇ ਅਲੀਰੇਜ਼ਾ ਫਿਰੋਜ਼ਾ ਨੇ ਅਮਰੀਕਾ ਦੇ ਚੋਟੀ ਦਾ ਦਰਜਾ ਪ੍ਰਾਪਤ ਫੈਬੀਆਨੋ ਕਾਰੂਆਨਾ ਨਾਲ ਡਰਾਅ ਖੇਡਿਆ। 

ਟੂਰਨਾਮੈਂਟ ਵਿਚ ਹਿੱਸਾ ਲੈਣ ਵਾਲੇ ਇਕ ਹੋਰ ਅਮਰੀਕੀ, ਹਿਕਾਰੂ ਨਾਕਾਮੁਰਾ ਨੂੰ ਜ਼ਿਆਦਾ ਸੰਘਰਸ਼ ਨਹੀਂ ਕਰਨਾ ਪਿਆ ਕਿਉਂਕਿ ਉਸ ਨੇ ਅਜ਼ਰਬਾਈਜਾਨ ਦੇ ਨਿਜ਼ਾਤ ਅੱਬਾਸੋਵ ਨਾਲ ਡਰਾਅ ਖੇਡਿਆ। ਮਹਿਲਾ ਵਰਗ ਵਿੱਚ ਭਾਰਤ ਦੀ ਕੋਨੇਰੂ ਹੰਪੀ ਨੇ ਸਫ਼ੈਦ ਪੀਸ ਨਾਲ ਖੇਡਦੇ ਹੋਏ ਚੀਨ ਦੀ ਤਾਨ ਝੋਂਗਈ ਨੂੰ ਡਰਾਅ ’ਤੇ ਰੋਕਿਆ। ਚੀਨ ਦੀ ਟਿੰਗਜੀ ਲੇਈ ਨੇ ਰੂਸ ਦੀ ਅਲੈਗਜ਼ੈਂਡਰਾ ਗੋਰਿਆਚਕੀਨਾ ਨਾਲ ਅੰਕ ਸਾਂਝੇ ਕੀਤੇ। ਰੂਸ ਦੀ ਕੈਟੇਰੀਨਾ ਲੇਗਨੋ ਅਤੇ ਯੂਕਰੇਨ ਦੀ ਅੰਨਾ ਮੁਜਿਚੁਕ ਵਿਚਾਲੇ ਖੇਡਿਆ ਗਿਆ ਮੈਚ ਵੀ ਡਰਾਅ 'ਤੇ ਖਤਮ ਹੋਇਆ। ਪੁਰਸ਼ ਅਤੇ ਮਹਿਲਾ ਦੋਵਾਂ ਵਰਗਾਂ ਵਿੱਚ ਅੱਠ-8 ਖਿਡਾਰੀ ਭਾਗ ਲੈ ਰਹੇ ਹਨ ਅਤੇ ਇਸ ਡਬਲ ਰਾਊਂਡ ਰੌਬਿਨ ਟੂਰਨਾਮੈਂਟ ਵਿੱਚ ਅਜੇ 11 ਰਾਊਂਡ ਖੇਡਣੇ ਬਾਕੀ ਹਨ। ਪੁਰਸ਼ ਵਰਗ ਵਿੱਚ ਕਾਰੂਆਨਾ, ਗੁਕੇਸ਼ ਅਤੇ ਨੇਪੋਮਨੀਆਚੀ ਦੋ ਅੰਕਾਂ ਨਾਲ ਸਾਂਝੇ ਤੌਰ ’ਤੇ ਅੱਗੇ ਹਨ।

ਇਨ੍ਹਾਂ ਤੋਂ ਬਾਅਦ ਵਿਦਿਤ ਅਤੇ ਪ੍ਰਗਿਆਨੰਦਾ ਆਉਂਦੇ ਹਨ। ਦੋਵਾਂ ਦੇ ਬਰਾਬਰ ਡੇਢ ਅੰਕ ਹਨ। ਨਾਕਾਮੁਰਾ, ਅਲੀਰੇਜ਼ਾ ਅਤੇ ਅੱਬਾਸੋਵ ਇਨ੍ਹਾਂ ਦੋਵਾਂ ਤੋਂ ਅੱਧਾ ਅੰਕ ਪਿੱਛੇ ਹਨ। ਮਹਿਲਾ ਵਰਗ ਵਿੱਚ ਝੋਂਗੀ ਢਾਈ ਅੰਕਾਂ ਨਾਲ ਅੱਗੇ ਚੱਲ ਰਹੀ ਹੈ। ਉਸ ਕੋਲ ਗੋਰਿਆਚਕੀਨਾ 'ਤੇ ਅੱਧੇ ਅੰਕ ਦੀ ਬੜ੍ਹਤ ਹੈ। ਹੰਪੀ, ਵੈਸ਼ਾਲੀ ਅਤੇ ਲੇਗਨੋ ਬਰਾਬਰ ਡੇਢ ਅੰਕਾਂ ਨਾਲ ਤੀਜੇ ਸਥਾਨ 'ਤੇ ਹਨ। ਲੇਈ, ਮੁਜ਼ੀਚੁਕ ਅਤੇ ਸੇਲੀਮੋਵਾ ਇਕ-ਇਕ ਅੰਕ ਨਾਲ ਛੇਵੇਂ ਸਥਾਨ 'ਤੇ ਹਨ। 45 ਚਾਲਾਂ 'ਚ ਪ੍ਰਗਿਆਨੰਦਾ ਤੋਂ ਹਾਰਨ ਵਾਲੇ ਗੁਜਰਾਤੀ ਨੇ ਮੈਚ ਤੋਂ ਬਾਅਦ ਕਿਹਾ, 'ਮੈਂ ਡਰਾਅ ਕਰ ਸਕਦਾ ਸੀ ਪਰ ਮੈਨੂੰ ਲੱਗਾ ਕਿ ਮੈਂ ਬਿਹਤਰ ਸਥਿਤੀ 'ਚ ਹਾਂ।' ਪ੍ਰਗਿਆਨੰਦਾ  ਨੇ ਕਿਹਾ, "ਸ਼ੁਰੂ ਵਿੱਚ ਮੈਨੂੰ ਬਹੁਤ ਯਕੀਨ ਨਹੀਂ ਸੀ ਪਰ ਮੈਨੂੰ ਲੱਗਦਾ ਹੈ ਕਿ ਤੁਹਾਨੂੰ ਕਾਲੇ ਮੋਹਰਿਆਂ ਨਾਲ ਖੇਡਣ ਵਿੱਚ ਕੋਈ ਮੁਸ਼ਕਲ ਨਹੀਂ ਆਈ।"