ਕੰਢੀ ਨਹਿਰ ਤੋਂ ਪਾਣੀ ਦੀ ਸਪਲਾਈ ਹੋ ਸਕਦੀ ਐ ਠੱਪ!
Wednesday, Jan 17, 2018 - 12:39 AM (IST)
ਗੜ੍ਹਸ਼ੰਕਰ, (ਸ਼ੋਰੀ)- ਤਲਵਾੜਾ-ਹੁਸ਼ਿਆਰਪੁਰ-ਬਲਾਚੌਰ ਤੱਕ ਵਹਿਣ ਵਾਲੀ ਕੰਢੀ ਨਹਿਰ ਦਾ ਜੋ ਹਿੱਸਾ ਕਾਫੀ ਉਚਾਈ 'ਤੇ ਹੈ, ਉੱਥੋਂ ਹੇਠਲੇ ਭਾਗਾਂ 'ਚ ਸਿੰਜਾਈ ਨੂੰ ਮੁੱਖ ਰੱਖਦਿਆਂ ਅੰਡਰ ਗਰਾਊਂਡ ਪਾਈਪ ਲਾਈਨ ਵਿਛਾਈ ਗਈ ਹੈ। ਗੜ੍ਹਸ਼ੰਕਰ ਦੇ ਸ਼ਾਹਪੁਰ, ਚੱਕਰੌਤਾ ਅਤੇ ਕੁਨੈਲ ਪਿੰਡਾਂ ਵਿਚੋਂ ਲੰਘਣ ਵਾਲੀ ਇਸ ਨਹਿਰ ਵਿਚੋਂ ਕਈ ਸਥਾਨਾਂ 'ਤੇ ਅੰਡਰ ਗਰਾਊਂਡ ਪਾਈਪ ਲਾਈਨ ਰਾਹੀਂ ਖੇਤਾਂ 'ਚ ਮੋਘੇ ਰੱਖੇ ਗਏ ਹਨ।
ਇਨ੍ਹਾਂ ਮੋਘਿਆਂ ਰਾਹੀਂ ਪਾਣੀ ਖੇਤਾਂ ਨੂੰ ਲੱਗੇਗਾ, ਜੋ ਪਾਈਪ ਲਾਈਨ ਰਾਹੀਂ ਆਵੇਗਾ। ਜਿੱਥੋਂ ਪਾਈਪ ਲਾਈਨ ਸ਼ੁਰੂ ਹੁੰਦੀ ਹੈ, ਉੱਥੇ ਜੋ ਹੋ ਰਿਹਾ ਹੈ, ਉਸ ਨੂੰ ਵੇਖਦਿਆਂ ਅਜਿਹਾ ਡਰ ਬਣਿਆ ਹੋਇਆ ਹੈ ਕਿ ਕਿਤੇ ਇਹ ਬੰਦ ਹੀ ਨਾ ਹੋ ਜਾਵੇ। ਲੋਕਾਂ ਵੱਲੋਂ ਸਮੱਗਰੀ ਅਤੇ ਨਾ ਵਰਤੋਂ-ਯੋਗ ਚੀਜ਼ਾਂ ਨਹਿਰ ਵਿਚ ਵਹਾਉਣ ਕਾਰਨ ਪਾਈਪ ਲਾਈਨ ਬੰਦ ਹੋਣ ਦਾ ਖਦਸ਼ਾ ਹੈ। ਲੋਕਾਂ ਵੱਲੋਂ ਨਹਿਰ 'ਚ ਵੱਡੀ ਮਾਤਰਾ 'ਚ ਜੋ ਸਮੱਗਰੀ ਵਹਾਈ ਜਾ ਰਹੀ ਹੈ, ਉਹ ਧਾਰਮਿਕ ਅਸਥਾਨਾਂ ਨਾਲ ਸਬੰਧਤ ਹੈ।
ਜੇਕਰ ਨਹਿਰ ਵਿਚ ਸਮੱਗਰੀ ਅਤੇ ਕਬਾੜ ਦਾ ਸਾਮਾਨ ਵਹਾਉਣ ਦਾ ਰੁਝਾਨ ਨਾ ਰੁਕਿਆ ਤਾਂ ਇਹ ਤੈਅ ਹੈ ਕਿ ਇਕ ਦਿਨ ਇਥੇ ਸਿੰਜਾਈ ਵਿਵਸਥਾ ਠੱਪ ਹੋ ਜਾਵੇਗੀ, ਜਿਸ ਕਾਰਨ ਜ਼ਮੀਨ ਫਿਰ ਬੰਜਰ ਹੋ ਜਾਵੇਗੀ ਜਿਵੇਂ ਕਿ ਪਹਿਲਾਂ ਪਈ ਸੀ। ਲੋੜ ਹੈ ਕਿ ਲੋਕ ਇਸ ਗੱਲ ਨੂੰ ਸਮਝਣ ਅਤੇ ਨਹਿਰ ਨੂੰ ਸਾਫ਼ ਰੱਖਣ। ਕੰਢੀ ਨਹਿਰ 'ਚ ਪਾਣੀ ਆਉਣ ਨਾਲ ਵੱਡੀ ਗਿਣਤੀ ਕਿਸਾਨਾਂ ਦੇ ਚਿਹਰੇ ਖਿੜੇ ਸਨ ਕਿਉਂਕਿ ਇਲਾਕੇ ਦੀ ਜ਼ਮੀਨ ਪਥਰੀਲੀ ਹੋਣ ਕਾਰਨ ਟਿਊਬਵੈੱਲ ਲੁਆਉੁਣਾ ਹਰੇਕ ਦੇ ਵੱਸ ਦੀ ਗੱਲ ਨਹੀਂ ਸੀ। ਹੁਣ ਦੁਬਾਰਾ ਜੇਕਰ ਪਾਣੀ ਦੀ ਸਪਲਾਈ ਰੁਕ ਗਈ ਤਾਂ ਇਲਾਕੇ ਦੇ ਕਿਸਾਨਾਂ ਨੂੰ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪਵੇਗਾ।
ਆਮ ਨਾਲੋਂ ਛੋਟੀ ਹੈ ਕੰਢੀ ਨਹਿਰ
ਕੰਢੀ ਨਹਿਰ ਦਾ ਦੂਜਾ ਫੇਜ਼ ਪੰਜਾਬ ਦੀਆਂ ਆਮ ਨਹਿਰਾਂ ਤੋਂ ਕਾਫੀ ਛੋਟਾ ਹੈ, ਜਿਸ ਦੀ ਸਮਰੱਥਾ 250 ਕਿਊਸਿਕ ਹੈ। ਜੋ ਮੋਘੇ (ਆਊਟਲੈੱਟ) ਹਨ, ਉਹ ਵੀ ਔਸਤਨ 10 ਇੰਚ ਦੇ ਹਨ, ਜਿਨ੍ਹਾਂ 'ਚ ਜੇਕਰ ਸਮੱਗਰੀ ਫਸ ਗਈ ਤਾਂ ਕੱਢ ਪਾਉਣਾ ਮੁਸ਼ਕਲ ਹੋਵੇਗਾ।
ਧਾਰਮਿਕ ਸਮੱਗਰੀ ਤੇ ਪਲਾਸਟਿਕ ਦੇ ਲਿਫਾਫੇ ਸੁੱਟ ਰਹੇ ਨੇ ਲੋਕ
ਕੰਢੀ ਨਹਿਰ 'ਚ ਪਾਣੀ ਵਹਿੰਦਾ ਵੇਖ ਲੋਕ ਅਕਸਰ ਧਾਰਮਿਕ ਸਮੱਗਰੀ ਇਸ 'ਚ ਵਹਾ ਦਿੰਦੇ ਹਨ ਪਰ ਬਜਾਏ ਸਮੱਗਰੀ ਇਕੱਲੀ ਪ੍ਰਵਾਹਿਤ ਕਰਨ ਦੇ ਪਲਾਸਟਿਕ ਦੇ ਲਿਫਾਫੇ ਸਮੇਤ ਨਹਿਰ 'ਚ ਸੁੱਟ ਦਿੰਦੇ ਹਨ, ਜਿਨ੍ਹਾਂ ਕਾਰਨ ਪਾਈਪ ਲਾਈਨ ਬੰਦ ਹੋ ਸਕਦੀ ਹੈ।
