ਕੋਠੀ ਦਾ ਤਾਲਾ ਤੋੜ ਕੇ 4 ਲੱਖ ਨਕਦੀ ਤੇ ਗਹਿਣੇ ਚੋਰੀ

ਚੰਡੀਗੜ੍ਹ (ਸੁਸ਼ੀਲ) : ਸੈਕਟਰ-28 ਸਥਿਤ ਬੰਦ ਕੋਠੀ ਦਾ ਤਾਲਾ ਤੋੜ ਕੇ ਚੋਰਾਂ ਨੇ 4 ਲੱਖ ਦੀ ਨਕਦੀ ਅਤੇ ਸੋਨੇ ਦੇ ਗਹਿਣੇ ਚੋਰੀ ਕਰ ਲਏ ਗਏ। ਸੈਕਟਰ-26 ਥਾਣਾ ਪੁਲਸ ਨੇ ਅਣਪਛਾਤੇ ’ਤੇ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਸ ਚੋਰਾਂ ਦੀ ਪਛਾਣ ਲਈ ਸੀ. ਸੀ. ਟੀ. ਵੀ. ਕੈਮਰੇ ਖੰਗਾਲ ਰਹੀ ਹੈ। ਸੈਕਟਰ-40 ਨਿਵਾਸੀ ਮੋਹਿੰਦਪਾਲ ਸਿੰਘ ਨੇ ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਦੱਸਿਆ ਕਿ ਸੈਕਟਰ-28 ਸਥਿਤ ਕੋਠੀ ਨੰਬਰ-91 ਵਿਚ ਰਹਿਣ ਵਾਲੀ ਆਂਟੀ ਕਿਸੇ ਕੰਮ ਲਈ ਸ਼ਹਿਰ ਤੋਂ ਬਾਹਰ ਗਈ ਹੈ।

ਉਹ 20 ਜੁਲਾਈ ਨੂੰ ਉਨ੍ਹਾਂ ਦੀ ਕੋਠੀ ਵਿਚ ਗਿਆ ਤਾਂ ਤਾਲਾ ਟੁੱਟਿਆ ਅਤੇ ਸਮਾਨ ਖਿੱਲਰਿਆ ਪਿਆ ਸੀ। ਉਨ੍ਹਾਂ ਨੇ ਮਾਮਲੇ ਦੀ ਸ਼ਿਕਾਇਤ ਪੁਲਸ ਨੂੰ ਦਿੱਤੀ। ਪੁਲਸ ਨੇ ਮੌਕੇ ’ਤੇ ਪਹੁੰਚ ਕੇ ਘਟਨਾ ਸਥਾਨ ਦੀ ਜਾਂਚ ਕੀਤੀ। ਮੋਹਿੰਦਪਾਲ ਨੇ ਪੁਲਸ ਨੂੰ ਦੱਸਿਆ ਕਿ ਕੋਠੀ ਵਿਚੋਂ 2 ਸੋਨੇ ਦੇ ਸੈੱਟ, 6 ਚੂੜੀਆਂ, 6 ਕੰਨਾਂ ਦੀਆਂ ਵਾਲੀਆਂ, 2 ਸੋਨੇ ਦੇ ਕੜੇ, 4 ਲੱਖ ਦੀ ਨਕਦੀ, ਪੰਜ ਘੜੀਆਂ ਅਤੇ ਤਿੰਨ ਪਸ਼ਮੀਨੇ ਦੇ ਸ਼ਾਲ ਚੋਰੀ ਹੋਏ ਹਨ।