ਰੂਪਨਗਰ 'ਚ ਪਾਬੰਦੀ ਦੇ ਬਾਵਜੂਦ ਪਲਾਸਟਿਕ ਦੇ ਲਿਫਾਫਿਆਂ ਦਾ ਹੋ ਰਿਹਾ ਇਸਤੇਮਾਲ

ਰੂਪਨਗਰ(ਵਿਜੇ) - ਜ਼ਿਲਾ ਪ੍ਰਸ਼ਾਸਨ ਦੁਆਰਾ ਜ਼ਿਲੇ 'ਚ ਧਾਰਾ 144 ਦੇ ਅੰਤਰਗਤ ਜਾਰੀ ਆਦੇਸ਼ਾਂ ਦੀ ਕੋਈ ਪ੍ਰਵਾਹ ਨਹੀ ਕਰਦਾ ਅਤੇ ਉਸਦੀ ਸ਼ਰੇਆਮ ਉਲੰਘਣਾਂ ਹੋ ਰਹੀ ਹੈ। ਜ਼ਿਲਾ ਪ੍ਰਸ਼ਾਸਨ ਦੁਆਰਾ ਸਮੇਂ-ਸਮੇਂ ਤੇ ਧਾਰਾ 144 ਦੇ ਅੰਤਰਗਤ ਆਦੇਸ਼ ਜਾਰੀ ਕਰਕੇ ਪਲਾਸਟਿਕ ਦੇ ਲਿਫਾਫਿਆਂ ਤੇ ਪਾਬੰਦੀ ਲਗਾਈ ਜਾਂਦੀ ਹੈ। ਇਸਦੇ ਇਲਾਵਾ ਜ਼ਿਲੇ 'ਚ ਹਥਿਆਰ ਲੈ ਕੇ ਪੰਜ ਜਾਂ ਪੰਜ ਤੋਂ ਵੱਧ ਵਿਅਕਤੀਆਂ ਦੇ ਇਕੱਠੇ ਹੋਣ, ਕਿਰਾਏਦਾਰਾਂ ਦੀ ਪੁਲਸ ਨੂੰ ਸੂਚਨਾ ਦੇਣ ਸਬੰਧੀ ਆਦੇਸ਼ ਜਾਰੀ ਹੁੰਦੇ ਹਨ ਪਰ ਕੋਈ ਉਸਦੀ ਪ੍ਰਵਾਹ ਨਹੀ ਕਰਦਾ ਅਤੇ ਇਹ ਕੇਵਲ ਖਾਨਾਪੂਰਤੀ ਤੱਕ ਹੀ ਸੀਮਤ ਰਹਿ ਜਾਂਦੇ ਹਨ।
ਸ਼ਹਿਰ 'ਚ ਪਲਾਸਟਿਕ ਦੇ ਲਿਫਾਫੇ ਕਾਨੂੰਨੀ ਰੋਕ ਦੇ ਬਾਵਜੂਦ ਧੜੱਲੇ ਨਾਲ ਪ੍ਰਯੋਗ 'ਚ ਲਿਆਂਦੇ ਜਾ ਰਹੇ ਹਨ ਅਤੇ ਫਿਰ ਪਲਾਸਟਿਕ ਕਚਰਾ ਸ਼ਹਿਰ ਦੇ ਵੱਖ-ਵੱਖ ਕੂੜਾ ਕਰਕਟ ਦੇ ਢੇਰ 'ਚ ਦੇਖਣ ਨੂੰ ਮਿਲਦਾ ਹੈ। ਜਿਸਨੂੰ ਪਸ਼ੂ ਭੋਜਨ ਸਮਝ ਕੇ ਖਾ ਲੈਂਦੇ ਹਨ ਅਤੇ ਬਾਅਦ 'ਚ ਉਨਾਂ ਦੀ ਮੌਤ ਹੋ ਜਾਂਦੀ ਹੈ। ਕਿਉਂਕਿ ਸ਼ਹਿਰ 'ਚ ਕਈ ਗਊਆਂ ਦੀ ਮੌਤ ਪਲਾਸਟਿਕ ਦੇ ਲਿਫਾਫੇ ਨਿਗਲਣ ਦੇ ਕਾਰਨ ਹੋਈ ਸੀ। ਪੋਸਟਮਾਰਟਮ ਦੇ ਬਾਅਦ ਉਨਾਂ ਦੇ ਪੇਟ 'ਚੋਂ ਕਾਫੀ ਮਾਤਰਾ 'ਚ ਪਲਾਸਟਿਕ ਦੇ ਲਿਫਾਫੇ ਨਿਕਲੇ ਸੀ। ਇਥੇ ਹੀ ਬੱਸ ਨਹੀ ਇਹ ਪਲਾਸਟਿਕ ਦੇ ਲਿਫਾਫੇ ਸ਼ਹਿਰ ਦੀਆਂ ਨਾਲੀਆਂ ਤੋਂ ਹੁੰਦੇ ਹੋਏ ਸੀਵਰ ਲਾਇਨ 'ਚ ਫਸ ਜਾਂਦੇ ਹਨ ਅਤੇ ਉਸਦੇ ਕਾਰਨ ਸ਼ਹਿਰ ਦਾ ਸੀਵਰੇਜ ਬਾਲਕ ਹੋ ਜਾਂਦਾ ਹੈ। ਜਦੋ ਕੁਝ ਲੋਕ ਇਸਨੂੰ ਜਲਾਉਣ ਦੀ ਕੋਸ਼ਿਸ਼ ਕਰਦੇ ਹਨ ਤਾਂ ਉਸ ਨਾਲ ਹਵਾ ਪ੍ਰਦੂਸ਼ਣ ਵਧਦਾ ਹੈ। ਇਹ ਲਿਫਾਫੇ ਸ਼ਹਿਰ ਲਈ ਸਿਰਦਰਦ ਸਾਬਤ ਹੋ ਰਹੇ ਹਨ ਅਤੇ ਜ਼ਿਲਾ ਪ੍ਰਸ਼ਾਸਨ ਇਸ 'ਤੇ ਰੋਕ ਲਗਾਉਣ ਦੇ ਬਾਵਜੂਦ ਇਸ ਨੂੰ ਰੋਕਣ 'ਚ ਅਸਫਲ ਹੈ। ਪ੍ਰਸ਼ਾਸਨ ਦੁਆਰਾ ਉਨਾਂ ਦੁਕਾਨਦਾਰਾਂ ਦੇ ਵਿਰੁੱਧ ਕੋਈ ਕਾਰਵਾਈ ਨਹੀਂ ਕੀਤੀ ਜਾਂਦੀ ਜੋ ਆਪਣਾ ਸਮਾਨ ਪਲਾਸਟਿਕ ਦੇ ਲਿਫਾਫਿਆਂ 'ਚ ਗ੍ਰਾਹਕਾਂ ਨੂੰ ਵੇਚਦੇ ਹਨ। ਲੋਕਾਂ ਦਾ ਕਹਿਣਾ ਹੈ ਕਿ ਜ਼ਿਲਾ ਪ੍ਰਸ਼ਾਸਨ ਇੱਕ ਸਮਾਂ ਸੀਮਾਂ ਤਹਿ ਕਰੇ ਕਿ ਇਸਦੇ ਬਾਅਦ ਕੋਈ ਲਿਫਾਫਾ ਨਹੀ ਚੱਲੇਗਾ ਅਤੇ ਇਸਦੀ ਉਲੰਘਣਾਂ ਕਰਨ ਤੇ ਪ੍ਰਸ਼ਾਸਨ ਸਖਤ ਕਾਰਵਾਈ ਕਰੇ।