ਵਿਸ਼ੇਸ਼ ਲੋੜਾਂ ਵਾਲੇ ਬੱਚੇ ਬਣਾਉਣਗੇ ''ਗੱਦੀਆਂ'' ਤੇ ''ਟੈਡੀ ਬੈਗ''

ਸਮਰਾਲਾ  (ਗਰਗ, ਬੰਗੜ) - ਵਿਸ਼ੇਸ਼ ਲੋੜਾਂ ਵਾਲੇ ਬੱਚੇ (ਅੰਗਹੀਣ) ਭਵਿੱਖ ਵਿਚ ਆਪਣੀਆਂ ਆਰਥਿਕ ਲੋੜਾਂ ਨੂੰ ਪੂਰਾ ਕਰਨ ਲਈ ਹੁਣ ਕਿਸੇ ਉਪਰ ਨਿਰਭਰ ਨਹੀਂ ਰਹਿਣਗੇ। ਆਪਣੇ ਪੈਰਾਂ 'ਤੇ ਖੜ੍ਹਾ ਕਰਨ ਦੇ ਮਕਸਦ ਨਾਲ ਸਰਕਾਰ ਨੇ ਇਨ੍ਹਾਂ ਬੱਚਿਆਂ ਨੂੰ ਵੋਕੇਸ਼ਨਲ ਕੋਰਸ ਕਰਾਉਣ ਲਈ 'ਉਮੀਦ' ਪ੍ਰਾਜੈਕਟ ਸ਼ੁਰੂ ਕਰਨ ਦਾ ਫੈਸਲਾ ਕੀਤਾ ਹੈ, ਜਿਸ ਤਹਿਤ ਇਨ੍ਹਾਂ ਨੂੰ ਗੱਦੀਆਂ (ਕੁਸ਼ਨ) ਤੇ ਟੈਡੀ ਬੈਗ ਬਣਾਉਣ ਦੀ ਸਿਖਲਾਈ ਦਿੱਤੀ ਜਾਵੇਗੀ।
ਡਿਪਟੀ ਕਮਿਸ਼ਨਰ ਪ੍ਰਦੀਪ ਕੁਮਾਰ ਅਗਰਵਾਲ ਤੇ ਵਧੀਕ ਡਿਪਟੀ ਕਮਿਸ਼ਨਰ (ਵ) ਸੁਰਭੀ ਮਲਿਕ ਨੇ ਦੱਸਿਆ ਕਿ ਜ਼ਿਲਾ ਲੁਧਿਆਣਾ ਵਿਚ ਵੱਖ-ਵੱਖ ਕੈਟਾਗਰੀਆਂ ਦੇ ਵਿਸ਼ੇਸ਼ ਲੋੜਾਂ ਵਾਲੇ ਬੱਚਿਆਂ (ਅੰਗਹੀਣਾਂ) ਲਈ ਵੋਕੇਸ਼ਨਲ ਕੋਰਸ ਕਰਵਾਉਣ ਲਈ 'ਉਮੀਦ' ਪ੍ਰਾਜੈਕਟ ਸ਼ੁਰੂ ਕੀਤਾ ਗਿਆ ਹੈ ।
ਇਹ ਪ੍ਰਾਜੈਕਟ ਆਈ. ਈ. ਡੀ./ਆਈ. ਈ. ਡੀ. ਐੱਸ. ਐੱਸ. (ਇਨਕਲੂਸਿਵ ਐਜੂਕੇਸ਼ਨ ਆਫ ਦਾ ਡਿਸਏਬਲਡ ਐਟ ਸੈਕੰਡਰੀ ਸਟੇਜ) ਦੇ ਬੱਚਿਆਂ ਲਈ ਸ਼ਹੀਦ ਸੁਖਦੇਵ ਥਾਪਰ ਸੀਨੀਅਰ ਸੈਕੰਡਰੀ ਸਕੂਲ (ਲੜਕੀਆਂ) ਭਾਰਤ ਨਗਰ ਵਿਖੇ ਐੱਨ. ਸੀ. ਐੱਸ. ਸੀ. (ਨੈਸ਼ਨਲ ਚਿਲਡਰਨਜ਼ ਸਾਇੰਸ ਕਾਂਗਰਸ), ਇਨ ਸਾਈਡ ਏ. ਟੀ. ਆਈ. ਗਿੱਲ ਰੋਡ, ਲੁਧਿਆਣਾ ਦੇ ਸਹਿਯੋਗ ਨਾਲ ਸ਼ੁਰੂ ਕੀਤਾ ਜਾ ਰਿਹਾ ਹੈ, ਜਿਸ ਵਿਚ 14 ਸਾਲ ਤੋਂ ਵੱਧ ਉਮਰ ਦੇ ਬੱਚਿਆਂ ਨੂੰ ਗੱਦੀਆਂ ਤੇ ਟੈਡੀ ਬੈਗ ਬਣਾਉਣ ਦੀ ਸਿਖਲਾਈ ਬਿਲਕੁਲ ਮੁਫਤ ਦਿੱਤੀ ਜਾਵੇਗੀ । ਤਿੰਨ ਮਹੀਨਿਆਂ ਦੇ ਪਹਿਲੇ ਬੈਚ ਲਈ 12 ਬੱਚੇ ਇਨਰੋਲ ਕਰ ਲਏ ਹਨ।
ਇਹ ਜ਼ਰੂਰੀ ਨਹੀਂ ਕਿ ਭਵਿੱਖ ਵਿਚ ਸਾਰੇ ਬੱਚਿਆਂ ਨੂੰ ਇਹ ਕੋਰਸ ਹੀ ਕਰਵਾਏ ਜਾਣਗੇ, ਇਸ ਤੋਂ ਇਲਾਵਾ ਬੱਚਿਆਂ ਦੀ ਲੋੜ ਤੇ ਸਮਰੱਥਾ ਮੁਤਾਬਿਕ ਹੋਰ ਵੀ ਕੋਰਸ ਕਰਵਾਏ ਜਾਣਗੇ, ਜਿਨ੍ਹਾਂ ਵਿਚ ਕੰਪਿਊਟਰ ਕੋਰਸ, ਬਿਊਟੀਸ਼ੀਅਨ ਕੋਰਸ, ਹੇਅਰ ਕਟਿੰਗ, ਟਾਈ ਐਂਡ ਡਾਈ, ਮੋਬਾਇਲ ਰਿਪੇਅਰ ਤੇ ਸਕੂਟਰ ਰਿਪੇਅਰ ਆਦਿ ਸ਼ਾਮਲ ਹਨ। ਇਥੋਂ ਤਕ ਕਿ ਮਾਪਿਆਂ ਦੇ ਕੰਮ ਮੁਤਾਬਿਕ ਵੀ ਕੋਰਸ ਕਰਵਾਏ ਜਾਣਗੇ। ਕੋਰਸ ਨੂੰ ਸਫ਼ਲਤਾਪੂਰਵਕ ਕਰਨ ਵਾਲੇ ਬੱਚਿਆਂ ਨੂੰ ਸਰਟੀਫਿਕੇਟ ਦਿੱਤੇ ਜਾਣਗੇ, ਜਿਨ੍ਹਾਂ ਦੇ ਸਿਰ 'ਤੇ ਉਹ ਸਰਕਾਰੀ ਜਾਂ ਨਿੱਜੀ ਖੇਤਰ ਵਿਚ ਨੌਕਰੀ ਵੀ ਲੈ ਸਕਦੇ ਹਨ।  ਜੇਕਰ ਬੱਚਾ ਲੁਧਿਆਣਾ ਤਕ ਚੱਲ ਕੇ ਨਹੀਂ ਆ ਸਕਦਾ ਤਾਂ ਉਸਦੇ ਘਰ ਨੇੜਲੀਆਂ ਥਾਵਾਂ 'ਤੇ ਵੀ ਸਿਖਲਾਈ ਦਿੱਤੀ ਜਾਵੇਗੀ।