ਵਿਦੇਸ਼ ਭੇਜਣ ਦਾ ਝਾਂਸਾ ਦੇ ਕੇ 59 ਲੱਖ ਦੀ ਠੱਗੀ, ਦੋ ਭਰਾਵਾਂ ਸਮੇਤ 6 ਵਿਰੁੱਧ ਮਾਮਲਾ ਦਰਜ

ਫਰੀਦਕੋਟ (ਜਗਦੀਸ਼) : ਸਥਾਨਕ ਸਿਟੀ ਕਪੂਰਾ ਦੀ ਪੁਲਸ ਨੇ ਵਿਦੇਸ਼ ਭੇਜਣ ਦਾ ਝਾਂਸਾ ਦੇ ਕੇ 59 ਲੱਖ ਰੁਪਏ ਦੀ ਠੱਗੀ ਮਾਰਨ ਦੇ ਦੋਸ਼ ਹੇਠ ਤਿੰਨ ਭਰਾਵਾਂ ਸਮੇਤ ਚਾਰ ਵਿਅਕਤੀਆਂ ਨੂੰ ਨਾਮਜ਼ਦ ਕਰਕੇ ਕੁੱਲ 6 ਖਿਲਾਫ ਧੋਖਾਧੜੀ ਦਾ ਮਾਮਲਾ ਦਰਜ ਕੀਤਾ ਹੈ। ਪੁਲਸ ਨੂੰ ਦਿੱਤੇ ਬਿਆਨਾਂ ਵਿਚ ਲਵਲੀ ਜਿੰਦਲ ਪੁੱਤਰ ਰਾਜ ਕੁਮਾਰ ਵਾਸੀ ਪ੍ਰੇਮ ਨਗਰ ਕੋਟਕਪੂਰਾ ਨੇ ਦੱਸਿਆ ਕਿ ਉਸ ਦੇ ਦੀਪਕ ਕਟਾਰੀਆ ਨਾਲ ਭਰਾਵਾਂ ਵਰਗੇ ਸਬੰਧ ਸਨ। ਦੀਪਕ ਕਟਾਰੀਆ ਨੇ ਉਸ ਦੀ ਵਿਦੇਸ਼ ਜਾਣ ਦੀ ਇੱਛਾ ਦਾ ਨਜਾਇਜ਼ ਫਾਇਦਾ ਉਠਾ ਕੇ ਠੱਗੀ ਮਾਰਨ ਦੀ ਨੀਅਤ ਨਾਲ ਆਖਿਆ ਕਿ ਉਸ ਦੇ ਭਰਾ ਵਿਜੈ ਕੁਮਾਰ ਨੇ ਪਰਿਵਾਰਕ ਵੀਜ਼ਾ ਅਤੇ ਪੀ. ਆਰ. ਦੀ ਫਾਈਲ ਲਵਾਈ ਹੈ , ਜਿਸ ਉਪਰ ਕਰੀਬ 40 ਤੋ 45 ਲੱਖ ਰੁਪਏ ਖਰਚ ਆਇਆ। ਜੇਕਰ ਉਹ ਆਪਣੇ ਭਰਾ ਸਮੇਤ ਵਿਦੇਸ਼ ਜਾਣ ਦੀ ਇੱਛੁਕ ਹੈ ਤਾ 60 ਲੱਖ ਰੁਪਏ ਦਾ ਇੰਤਜਾਮ ਕਰ ਲਵੇ। 
ਕੁਝ ਦਿਨਾਂ ਬਾਅਦ ਦੀਪਕ ਕਟਾਰੀਆ ਤੇ ਉਸਦੇ ਭਰਾ ਵਿਜੈ ਕੁਮਾਰ ਵਿਦੇਸ਼ ਭੇਜਣ ਵਾਲੇ ਏਜੰਟ ਅਮਨਦੀਪ ਸਿੰਘ ਨੂੰ ਮਿਲਵਾਇਆ ਤਾਂ ਉਸ ਨੇ 60 ਲੱਖ ਰੁਪਏ ਵਿਚ ਸ਼ਿਕਾਇਤ ਕਰਤਾ ਅਤੇ ਉਸ ਦੇ ਭਰਾ ਨੂੰ ਵਿਦੇਸ਼ ਭੇਜਣ ਦਾ ਭਰੋਸਾ ਦਿਵਾਇਆ। ਸ਼ਿਕਾਇਤ ਕਰਤਾ ਅਨੁਸਾਰ ਉਸ ਨੇ ਦੀਪਕ ਕਟਾਰੀਆ ਤੇ ਉਸ ਦੇ ਭਰਾ ਵਿਜੈ ਕੁਮਾਰ ਨੂੰ 9 ਲੱਖ ਰੁਪਏ ਨਗਦ, ਅਸਲ ਸਾਰਟੀਫਿਕੇਟ, ਪਾਸਪੋਰਟ, ਫੋਟੋਆਂ ਅਤੇ ਹੋਰ ਦਸਤਾਵੇਜ਼ ਦੀ ਮੁਕੰਮਲ ਫਾਈਲ ਸੌਂਪ ਦਿੱਤੀ। ਉਸ ਸਮੇਂ ਉਨ੍ਹਾਂ ਨਾਲ ਦੋ ਹੋਰ ਅਣਪਛਾਤੇ ਵਿਅਕਤੀ ਵੀ ਸਨ। ਇਸ ਸਮੇਂ ਦੌਰਾਨ ਉਨਾ 9-9 ਲੱਖ ਰੁਪਿਆ ਚਾਰ ਵਾਰ , ਇੱਕ ਵਾਰ 22 ਲੱਖ ਰੁਪਿਆਂ ਤੇ ਇਕ ਵਾਰ ਡੇਢ ਲੱਖ ਰੁਪਿਆ ਵਸੂਲਿਆ, ਜਿਸ ਦੀ ਉਸ ਕੋਲ ਸੀਸੀਟੀਵੀ ਕੈਮਰਿਆਂ ਦੀ ਰਿਕਾਰਡਿੰਗ ਵੀ ਮੌਜੂਦ ਹੈ। ਥਾਣਾ ਮੁਖੀ ਖੇਮ ਪਰਾਸ਼ਰ ਨੇ ਦੱਸਿਆ ਕਿ ਉਕਤ ਧੋਖਾਧੜੀ ਦਾ ਮਾਮਲਾ ਪੁਲਸ ਮੁਖੀ ਫਰੀਦਕੋਟ ਨੂੰ ਸੋਪੀ ਸ਼ਿਕਾਇਤ ਦੀ ਪੜਤਾਲ ਤੋਂ ਬਾਅਦ ਦਰਜ ਕੀਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਮਾਮਲੇ ਵਿਚ ਦੀਪਕ ਕਟਾਰੀਆ, ਵਿਜੈ ਕੁਮਾਰ ਸੋਨੂੰ, ਮਨੋਜ ਕੁਮਾਰ ਵਾਸੀ ਪ੍ਰਤਾਪ ਨਗਰ, ਅਮਨਦੀਪ ਸਿੰਘ ਪੁੱਤਰ ਸੋਮਨਾਥ ਵਾਸੀ ਕੋਟਕਪੂਰਾ ਅਤੇ ਉਨ੍ਹਾਂ ਦੇ ਦੋ ਅਣਪਛਾਤੇ ਸਾਥੀਆਂ ਖਿਲਾਫ 59 ਲੱਖ ਰੁਪਏ ਦੀ ਠੱਗੀ ਮਾਰਨ ਦੇ ਦੋਸ਼ਾਂ ਵਿਚ ਧੋਖਾਧੜੀ ਦਾ ਮਾਮਲਾ ਦਰਜ ਕਰਕੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ।