ਪਤਨੀ ਨੇ ਹੀ ਕਰਵਾਇਆ ਲਾਪਤਾ ਡਾਕਟਰ ਨੂੰ ਦਿੱਲੀ ਦੇ ਮਨੋਵਿਗਿਆਨੀ ਮਾਹਿਰਾਂ ਕੋਲ ਦਾਖਲ

ਸੁਲਤਾਨਪੁਰ ਲੋਧੀ (ਸੋਢੀ )— ਪਵਿੱਤਰ ਨਗਰੀ ਸੁਲਤਾਨਪੁਰ ਲੋਧੀ ਦੇ ਪ੍ਰਸਿੱਧ ਮਲਟੀਸਪੈਸ਼ਲਿਟੀ ਹਸਪਤਾਲ ਦੇ ਡਾਕਟਰ ਅਮਨਪ੍ਰੀਤ ਸਿੰਘ ਦੇ ਲਾਪਤਾ ਹੋਣ ਦੀ ਕਹਾਣੀ ਨੇ ਅੱਜ ਉਸ ਸਮੇਂ ਨਵਾਂ ਮੋੜ ਲਿਆ ਜਦ ਇਸ ਕੇਸ ਦੀ ਜਾਂਚ ਕਰਕੇ ਨਵੀਂ ਦਿੱਲੀ ਤੋਂ ਪਰਤੇ ਥਾਣਾ ਸੁਲਤਾਨਪੁਰ ਲੋਧੀ ਦੇ ਐੱਸ. ਐੱਚ. ਓ. ਸਰਬਜੀਤ ਸਿੰਘ ਇੰਸਪੈਕਟਰ ਅਤੇ ਏ. ਐੱਸ. ਆਈ ਗੁਰਦੀਪ ਸਿੰਘ ਨੇ ਦੱਸਿਆ ਕਿ ਡਾਕਟਰ ਅਮਨਪ੍ਰੀਤ ਸਿੰਘ ਨੂੰ ਅਗਵਾ ਕਰਨ ਦੇ ਦੋਸ਼ਾਂ 'ਚ ਕੋਈ ਸਚਾਈ ਨਹੀਂ ਹੈ ਅਤੇ ਡਾਕਟਰ ਅਮਨਪ੍ਰੀਤ ਸਿੰਘ ਨੂੰ ਉਸ ਦੀ ਪਤਨੀ ਸੰਦੀਪ ਕੌਰ ਨੇ ਹੀ ਖੁਦ ਆਪਣੇ ਡਾਕਟਰ ਪਤੀ ਦੇ ਇਲਾਜ ਲਈ ਮਨੋਵਿਗਿਆਨੀ ਮਾਹਿਰ ਡਾਕਟਰਾਂ ਕੋਲ ਨਵੀਂ ਦਿੱਲੀ ਦੇ ਇਕ ਡਰੱਗ ਰੀਹੇਬਿਲੀਟੇਸ਼ਨ ਸੈਂਟਰ ਦਿੱਲੀ ਵਿਖੇ ਦਾਖਲ ਕਰਵਾਇਆ ਸੀ, ਜਿੱਥੇ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਹੈ । ਇੰਸਪੈਕਟਰ ਸਰਬਜੀਤ ਸਿੰਘ ਜੋ ਪੁਲਸ ਪਾਰਟੀ ਨਾਲ ਦਿੱਲੀ ਦੇ ਉਕਤ ਨਸ਼ਾ ਛੁਡਾਊ ਸੈਟਰ ਵਿਖੇ ਗਏ ਸਨ, ਉਨ੍ਹਾਂ ਨੇ ਪਰਤ ਕੇ ਦੱਸਿਆ ਕਿ ਉਹ ਖੁਦ ਦੇਖ ਕੇ ਅਤੇ ਸਬੰਧਤ ਡਾਕਟਰਾਂ ਨੂੰ ਮਿਲ ਕੇ ਆਏ ਹਨ ਕਿ ਡਾਕਟਰ ਅਮਨਪ੍ਰੀਤ ਸਿੰਘ ਦੀ ਪਤਨੀ ਨੇ ਹੀ ਆਪਣੇ ਪਤੀ ਦੇ ਇਲਾਜ ਲਈ ਦਿੱਲੀ ਦੇ ਊਕਤ ਸੈਂਟਰ ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਡਾਕਟਰ ਅਮਨਪ੍ਰੀਤ ਸਿੰਘ ਨਾਲ ਉਨ੍ਹਾਂ ਨੇ ਖੁਦ ਗੱਲਬਾਤ ਵੀ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਸੰਪਰਕ ਫਾਉਂਡੇਸ਼ਨ ਵੱਲੋਂ ਦਿੱਲੀ ਦਾ ਚਲਾਇਆ ਜਾ ਰਿਹਾ ਸਰਕਾਰੀ ਸੈਟਰ ਹੈ, ਜਿੱਥੇ ਮਨੋਵਿਗਿਆਨੀ ਮਾਹਿਰ ਡਾਕਟਰ ਅਤੇ ਹੋਰ ਟੀਮ ਦਾਖਲ ਕਰਵਾਏ ਵਿਅਕਤੀਆਂ ਦਾ ਇਲਾਜ ਅਤੇ ਦੇਖਭਾਲ ਕਰਦੇ ਹਨ ।          
ਇੱਥੇ ਇਹ ਗੱਲ ਵਰਣਨਯੋਗ ਹੈ ਕਿ ਸੁਲਤਾਨਪੁਰ ਲੋਧੀ ਦੇ ਪ੍ਰਸਿੱਧ ਮਲਟੀਸ਼ਪੈਸ਼ਲਿਟੀ ਹਸਪਤਾਲ ਦੇ ਮੁਖੀ ਡਾਕਟਰ ਅਮਨਪ੍ਰੀਤ ਸਿੰਘ ਨੂੰ 26 ਜਨਵਰੀ ਦੀ ਤੜਕਸਾਰ ਆਪਣੀ ਰਿਹਾਇਸ਼ ਤੋਂ ਅਚਨਚੇਤ ਕੋਈ ਗੱਡੀ 'ਚ ਬਿਠਾ ਕੇ ਲੈ ਗਿਆ ਸੀ, ਜਿਸ ਬਾਰੇ ਸਿਰਫ ਉਸ ਦੀ ਪਤਨੀ ਨੂੰ ਹੀ ਜਾਣਕਾਰੀ ਸੀ। ਜਿਸ ਕਾਰਨ ਡਾਕਟਰ ਨੂੰ ਅਗਵਾ ਦੀ ਖਬਰ ਜੰਗਲ ਦੀ ਅੱਗ ਵਾਂਗ ਫੈਲ ਗਈ ਅਤੇ ਕਈ ਤਰ੍ਹਾਂ ਦੀ ਚਰਚਾ ਸ਼ੁਰੂ ਹੋ ਗਈ। ਭਾਵੇ ਡੀ. ਐੱਸ. ਪੀ ਸੁਲਤਾਨਪੁਰ ਲੋਧੀ ਵਰਿਆਮ ਸਿੰਘ ਖਹਿਰਾ ਅਤੇ ਐੱਸ. ਐੱਚ. ਓ. ਸਰਬਜੀਤ ਸਿੰਘ ਨੇ ਉਸ ਸਮੇ ਹੀ ਜਾਂਚ ਕਰਕੇ ਸ਼ਪੱਸ਼ਟ ਕੀਤਾ ਸੀ ਕਿ ਡਾਕਟਰ ਨੂੰ ਕਿਸੇ ਨੇ ਅਗਵਾ ਨਹੀਂ ਕੀਤਾ। ਇਸ ਮਾਮਲੇ ਸਬੰਧੀ ਇੰਸਪੈਕਟਰ ਸਰਬਜੀਤ ਸਿੰਘ ਵੱਲੋਂ ਡਾਕਟਰ ਅਮਨਪ੍ਰੀਤ ਸਿੰਘ ਦੀਆਂ ਦਿੱਲੀ ਦੇ ਉਕਤ ਸੈਂਟਰ ਤੋ ਫੋਟੋਆਂ ਵੀ ਖਿੱਚ ਕੇ ਸਬੂਤ ਵਜੋਂ ਨਾਲ ਲਿਆਂਦੀਆਂ ।