ਜਣੇਪੇ ਦੇ 30 ਮਿੰਟ ਬਾਅਦ ਹੀ ਮਾਂ ਨੂੰ ਦੇ ਦਿੱਤੀ ਛੁੱਟੀ! ਘਰ ਜਾ ਕੇ ਤਬੀਅਤ ਵਿਗੜਣ ਮਗਰੋਂ ਹੋਈ ਮੌਤ

ਲੁਧਿਆਣਾ (ਰਾਜ): ਡਾਕਟਰ ਦੀ ਲਾਪਰਵਾਹੀ ਕਾਰਨ ਇਕ ਮਹਿਲਾ ਮਰੀਜ਼ ਦੀ ਮੌਤ ਹੋ ਗਈ। ਪਤੀ ਦੀ ਸ਼ਿਕਾਇਤ ਦੇ ਆਧਾਰ 'ਤੇ, ਟਿੱਬਾ ਪੁਲਸ ਸਟੇਸ਼ਨ ਨੇ ਹਸਪਤਾਲ ਦੇ ਡਾਕਟਰ ਵਿਰੁੱਧ ਮਾਮਲਾ ਦਰਜ ਕੀਤਾ ਹੈ।

ਸ਼ਿਕਾਇਤਕਰਤਾ ਅਮਰਜੀਤ ਨੇ ਪੁਲਸ ਨੂੰ ਦਿੱਤੇ ਆਪਣੇ ਬਿਆਨ ਵਿਚ ਕਿਹਾ ਕਿ ਉਸ ਨੇ ਆਪਣੀ ਪਤਨੀ ਰੰਜਨਾ ਨੂੰ 8 ਦਸੰਬਰ, 2025 ਨੂੰ ਰਾਧਾ ਸਾਈਂ ਕਲੀਨਿਕ, ਗਲੀ ਨੰਬਰ 02, ਸਟਾਰ ਸਿਟੀ ਕਲੋਨੀ, ਟਿੱਬਾ ਰੋਡ, ਲੁਧਿਆਣਾ ਵਿਚ ਆਪਣੇ ਦੂਜੇ ਬੱਚੇ ਦੇ ਜਨਮ ਲਈ ਦਾਖਲ ਕਰਵਾਇਆ ਸੀ। ਅਗਲੇ ਦਿਨ, 9 ਦਸੰਬਰ, 2025 ਨੂੰ, ਉਸ ਦੀ ਪਤਨੀ ਨੇ ਇਕ ਬੱਚੀ ਨੂੰ ਜਨਮ ਦਿੱਤਾ। ਦੋਸ਼ ਹੈ ਕਿ ਜਣੇਪੇ ਤੋਂ ਲਗਭਗ ਅੱਧੇ ਘੰਟੇ ਬਾਅਦ ਹੀ ਡਾਕਟਰ ਇੰਦੂ ਬਾਲਾ ਦੇ ਕਹਿਣ 'ਤੇ ਸ਼ਿਕਾਇਤਕਰਤਾ ਆਪਣੀ ਪਤਨੀ ਨੂੰ ਘਰ ਲੈ ਆਇਆ। ਘਰ ਪਹੁੰਚਣ 'ਤੇ ਰੰਜਨਾ ਦੇ ਪੇਟ ਦੇ ਟਾਂਕਿਆਂ ਤੋਂ ਬਹੁਤ ਜ਼ਿਆਦਾ ਖੂਨ ਵਹਿ ਰਿਹਾ ਸੀ। ਜ਼ਿਆਦਾ ਖੂਨ ਵਹਿਣ ਕਾਰਨ, ਰੰਜਨਾ ਦੀ ਹਾਲਤ ਵਿਗੜ ਗਈ ਅਤੇ ਉਸ ਦੀ ਮੌਤ ਹੋ ਗਈ।

ਸ਼ਿਕਾਇਤਕਰਤਾ ਨੇ ਦੋਸ਼ ਲਗਾਇਆ ਕਿ ਡਾਕਟਰ ਇੰਦੂ ਬਾਲਾ, ਉਸ ਦਾ ਪਤੀ ਨੀਤੂ ਪ੍ਰਧਾਨ ਅਤੇ ਬਬਲੀ ਪ੍ਰਧਾਨ ਉਸ ਦੀ ਪਤਨੀ ਦੀ ਮੌਤ ਲਈ ਜ਼ਿੰਮੇਵਾਰ ਸਨ। ਸ਼ਿਕਾਇਤ ਦੇ ਆਧਾਰ 'ਤੇ ਪੁਲਸ ਨੇ ਸਾਰਿਆਂ ਵਿਰੁੱਧ ਮਾਮਲਾ ਦਰਜ ਕਰਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।