ਨਹੀਂ ਰੁੱਕ ਰਹੀਆਂ ਗੁੱਤਾਂ ਦੇ ਕੱਟਣ ਦੀਆਂ ਵਾਰਦਾਤਾਂ, ਕੋਟਕਪੂਰਾ ''ਚ ਵਾਪਰੀ ਇਕ ਹੋਰ ਘਟਨਾ

ਕੋਟਕਪੂਰਾ(ਨਰਿੰਦਰ ਬੈੜ)— ਬੁੱਧੀਜੀਵੀ ਵਰਗ ਅਤੇ ਹੋਰ ਵੱਖ-ਵੱਖ ਸਮਾਜਸੇਵੀ ਸੰਸਥਾਵਾਂ ਦੇ ਆਗੂਆਂ ਵੱਲੋਂ ਕੀਤੀਆਂ ਜਾ ਰਹੀਆਂ ਅਪੀਲਾਂ-ਦਲੀਲਾਂ ਦੇ ਉਲਟ ਕੋਟਕਪੂਰਾ ਇਲਾਕੇ ਅੰਦਰ ਔਰਤਾਂ ਦੇ ਵਾਲ ਕੱਟਣ ਦੀਆਂ ਘਟਨਾਵਾਂ ਵਿੱਚ ਲਗਾਤਾਰ ਵਾਧਾ ਹੋ ਰਿਹਾ ਹੈ। ਬੀਤੇ ਤਿੰਨ ਦਿਨਾਂ ਦੌਰਾਨ ਇਲਾਕੇ ਵਿੱਚ ਵੱਖ-ਵੱਖ ਥਾਵਾਂ 'ਤੇ ਵਾਪਰੀਆਂ ਅਜਿਹੀਆਂ ਘਟਨਾਵਾਂ ਤੋਂ ਬਾਅਦ ਸਥਾਨਕ ਹਰੀ ਨੌ ਰੋਡ 'ਤੇ ਵਾਲ ਕੱਟਣ ਦੀ ਇਕ ਹੋਰ ਘਟਨਾ ਵਾਪਰ ਗਈ। ਸਥਾਨਕ ਹਰੀ ਨੌ ਰੋਡ ਦੀ ਵਸਨੀਕ ਇਸ ਔਰਤ ਦੇ ਘਰ ਵਿੱਚ ਹੀ ਉਸ ਦੇ ਵਾਲ ਕੱਟੇ ਗਏ। ਪਤਾ ਲੱਗਣ 'ਤੇ ਵੱਡੀ ਗਿਣਤੀ ਵਿੱਚ ਲੋਕ ਇੱਕਠੇ ਹੋ ਗਏ। ਥਾਣਾ ਸਿਟੀ ਪੁਲਸ ਕੋਟਕਪੂਰਾ ਵੱਲੋਂ ਅਜਿਹੀਆਂ ਕਾਰਵਾਈਆਂ ਨੂੰ ਲੈ ਕੇ ਤਫਤੀਸ਼ ਕੀਤੀ ਜਾ ਰਹੀ ਹੈ ਪਰ ਅਜੇ ਤੱਕ ਕੋਈ ਨਤੀਜਾ ਸਾਹਮਣੇ ਨਹੀਂ ਆਇਆ। ਇਲਾਕੇ ਅੰਦਰ ਅਜਿਹੀਆਂ ਘਟਨਾਵਾਂ ਨੂੰ ਲੈ ਕੇ ਤਰ੍ਹਾਂ-ਤਰ੍ਹਾਂ ਦੇ ਚਰਚੇ ਸੁਨਣ ਨੂੰ ਮਿਲ ਰਹੇ ਹਨ।