''ਇਹ ਹੈ ਭਾਰਤ ਦੇਸ਼ ਅਸਾਡਾ''

ਸਾਡੀ ਹਜ਼ਾਰਾਂ ਵਰ੍ਹੇ ਪੁਰਾਣੀ ਉੱਨਤ ਸੱਭਿਅਤਾ 'ਤੇ ਜਿੰਨਾ ਵੀ ਮਾਣ ਕੀਤਾ ਜਾਵੇ, ਘੱਟ ਹੈ। ਇਸੇ ਕਾਰਨ ਪ੍ਰਾਚੀਨਕਾਲ 'ਚ ਮਾਰਗਦਰਸ਼ਨ ਲੈਣ ਲਈ ਸਾਰੀ ਦੁਨੀਆ ਤੋਂ ਆਮ ਤੇ ਖਾਸ ਲੋਕ ਭਾਰਤ ਆਉਂਦੇ ਰਹੇ ਹਨ ਪਰ ਹੁਣ ਸਾਡੇ ਉੱਚ ਆਦਰਸ਼ ਅਤੇ ਸੰਸਕਾਰ ਕਿਤੇ ਅਲੋਪ ਹੁੰਦੇ ਜਾ ਰਹੇ ਹਨ ਤੇ ਦੇਸ਼ ਨੈਤਿਕ ਪਤਨ ਵੱਲ ਵਧ ਰਿਹਾ ਹੈ, ਜੋ ਹੇਠ ਲਿਖੀਆਂ ਚੰਦ ਤਾਜ਼ਾ ਮਿਸਾਲਾਂ ਤੋਂ ਸਪੱਸ਼ਟ ਹੈ :
* 10 ਫਰਵਰੀ ਨੂੰ ਬਿਹਾਰ ਦੇ ਸਾਸਾਰਾਮ 'ਚ ਇਕ ਵਿਅਕਤੀ ਵਲੋਂ ਸ਼ਰਾਬ ਦੇ ਨਸ਼ੇ 'ਚ ਆਪਣੀ ਨੂੰਹ ਨਾਲ ਬਲਾਤਕਾਰ ਕਰਨ 'ਤੇ ਉਸ ਦੇ ਬੇਟੇ ਨੇ ਉਸ ਦੀ ਹੱਤਿਆ ਕਰ ਦਿੱਤੀ। 
* 12 ਫਰਵਰੀ ਨੂੰ ਨਵੀ ਮੁੰਬਈ 'ਚ ਇਕ ਵਿਅਕਤੀ ਨੇ ਆਪਣੀ ਪਤਨੀ ਨਾਲ ਹੋਏ ਝਗੜੇ ਤੋਂ ਬਾਅਦ ਉਸ ਦੇ ਸਿਰ 'ਤੇ ਚੱਕੀ ਦਾ ਪੁੜ ਮਾਰ ਕੇ ਉਸ ਨੂੰ ਮਾਰ ਦਿੱਤਾ।
* 13 ਫਰਵਰੀ ਨੂੰ ਮੱਧ ਪ੍ਰਦੇਸ਼ 'ਚ ਜਬਲਪੁਰ ਜ਼ਿਲੇ ਦੇ ਬਿਜੌਰੀ ਪਿੰਡ 'ਚ ਇਕ ਬੇਟੇ ਨੇ ਆਪਣੀ ਮਾਂ 'ਤੇ ਮਿੱਟੀ ਦਾ ਤੇਲ ਛਿੜਕ ਕੇ ਉਸ ਨੂੰ ਸਾੜ ਕੇ ਮਾਰ ਦਿੱਤਾ ਕਿਉਂਕਿ ਉਸ ਨੂੰ ਖਾਣਾ ਦੇਣ 'ਚ ਮਾਂ ਨੇ ਥੋੜ੍ਹੀ ਦੇਰ ਕਰ ਦਿੱਤੀ ਸੀ। 
* 16 ਫਰਵਰੀ ਨੂੰ ਪਾਲਘਰ ਦੇ ਸਫਾਲੇ ਪਿੰਡ 'ਚ ਇਕ 45 ਸਾਲਾ ਵਿਅਕਤੀ ਨੂੰ ਆਪਣੀ 8 ਸਾਲਾ ਧੀ ਨਾਲ ਬਲਾਤਕਾਰ ਕਰਨ ਦੇ ਦੋਸ਼ ਹੇਠ ਗ੍ਰਿਫਤਾਰ ਕੀਤਾ ਗਿਆ।
* 19 ਫਰਵਰੀ ਨੂੰ ਯੂ. ਪੀ. ਦੇ ਬਲਰਾਮਪੁਰ 'ਚ ਬੇਟੇ ਦੇ ਚਾਹਵਾਨ ਇਕ ਨੌਜਵਾਨ ਨੂੰ ਆਪਣੀ ਬੇਟੀ ਦੇ ਜਨਮ 'ਤੇ ਇੰਨਾ ਗੁੱਸਾ ਆਇਆ ਕਿ ਇਕ ਮਹੀਨੇ ਦੀ ਬੇਟੀ ਦੀ ਹੱਤਿਆ ਕਰਨ ਤੋਂ ਬਾਅਦ ਉਸ ਨੇ ਆਪਣੀ ਪਤਨੀ ਨੂੰ ਬੁਰੀ ਤਰ੍ਹਾਂ ਕੁੱਟ ਦਿੱਤਾ। 
* 20 ਫਰਵਰੀ ਨੂੰ ਮੁੰਬਈ 'ਚ ਟੀ. ਵੀ. ਦੇਖਣ ਤੋਂ ਰੋਕਣ 'ਤੇ ਨਾਰਾਜ਼ ਛੋਟੇ ਭਰਾ ਨੇ ਆਪਣੇ ਵੱਡੇ ਭਰਾ ਨੂੰ ਚਾਕੂ ਮਾਰ ਕੇ ਗੰਭੀਰ ਜ਼ਖ਼ਮੀ ਕਰ ਦਿੱਤਾ।
* 21 ਫਰਵਰੀ ਨੂੰ ਕਰਨਾਟਕ ਦੇ ਮੈਸੁਰੂ ਜ਼ਿਲੇ ਦੇ ਗੋਲਾਨਾ ਬਿਦੂ ਪਿੰਡ 'ਚ ਮਾਂ-ਪਿਓ ਨੇ ਦੂਜੀ ਜਾਤ ਦੇ ਲੜਕੇ ਨਾਲ ਪਿਆਰ ਕਰਨ ਕਰ ਕੇ ਆਪਣੀ 20 ਸਾਲਾ ਧੀ ਨੂੰ ਜ਼ਹਿਰ ਦੇ ਕੇ ਮਾਰਨ ਤੋਂ ਬਾਅਦ ਉਸ ਦੀ ਲਾਸ਼ ਵੀ ਸਾੜ ਦਿੱਤੀ।
* 24 ਫਰਵਰੀ ਨੂੰ ਯੂ. ਪੀ. 'ਚ ਬਸਤੀ ਦੇ ਸੋਨਹਾ 'ਚ ਇਕ ਨੌਜਵਾਨ ਨੇ ਆਪਣੇ ਪਿਤਾ ਦਾ ਗਲਾ ਤੇਜ਼ਧਾਰ ਹਥਿਆਰ ਨਾਲ ਵੱਢ ਦਿੱਤਾ। ਉਸ ਦੀਆਂ ਚੀਕਾਂ ਦਬਾਉਣ ਲਈ ਟੀ. ਵੀ. ਦੀ ਆਵਾਜ਼ ਉੱਚੀ ਕਰ ਦਿੱਤੀ ਤੇ ਫਿਰ ਉਸ ਨੂੰ ਘਰ 'ਚ ਬੰਦ ਕਰ ਕੇ ਭੱਜ ਗਿਆ।
* 26 ਫਰਵਰੀ ਨੂੰ ਨਵੀਂ ਦਿੱਲੀ ਦੇ ਕਾਲੀਬਾੜੀ ਇਲਾਕੇ 'ਚ ਘਰ ਦਾ ਕਲੇਸ਼ ਦੂਰ ਕਰਨ ਲਈ ਤਾਂਤਰਿਕ ਦੀ ਸਲਾਹ 'ਤੇ ਇਕ ਔਰਤ ਨੇ ਆਪਣੇ ਪਤੀ ਨੂੰ ਜ਼ਹਿਰ ਦੇ ਦਿੱਤਾ, ਜਿਸ ਨਾਲ ਉਸ ਦੀ ਮੌਤ ਹੋ ਗਈ। 
* 26 ਫਰਵਰੀ ਨੂੰ ਹੀ ਅੰਮ੍ਰਿਤਸਰ ਨੇੜੇ ਛੇਹਰਟਾ 'ਚ ਨਸ਼ੇੜੀ ਸਹੁਰਾ ਨੂੰਹ ਦੇ ਕਮਰੇ 'ਚ ਵੜ ਕੇ ਉਸ ਨਾਲ ਅਸ਼ਲੀਲ ਹਰਕਤਾਂ ਕਰਨ ਲੱਗਾ, ਜਿਸ ਵਿਰੁੱਧ ਨੂੰਹ ਨੇ ਪੁਲਸ ਕੋਲ ਰਿਪੋਰਟ ਦਰਜ ਕਰਵਾਈ।
* 27 ਫਰਵਰੀ ਨੂੰ ਫਗਵਾੜਾ ਦੀ ਪਰਮਾਰ ਕਾਲੋਨੀ 'ਚ ਇਕ ਕਲਯੁੱਗੀ ਪਿਤਾ ਨੇ ਆਪਣੀ 6 ਸਾਲਾ ਧੀ ਨਾਲ ਬਲਾਤਕਾਰ ਕੀਤਾ।
* 01 ਮਾਰਚ ਨੂੰ ਝਾਰਖੰਡ ਦੇ ਪੂਰਬੀ ਸਿੰਘਭੂਮ 'ਚ ਇਕ ਵਿਅਕਤੀ ਨੇ ਆਪਣੀ ਪਤਨੀ ਨਾਲ ਤਣਾਅ ਭਰੇ ਸਬੰਧਾਂ ਕਾਰਨ ਆਪਣੇ 10 ਸਾਲਾ ਬੇਟੇ ਨੂੰ ਮਾਰ ਦਿੱਤਾ।
* 01 ਮਾਰਚ ਨੂੰ ਹੀ ਨਵੀਂ ਦਿੱਲੀ 'ਚ ਇਕ ਵਿਅਕਤੀ ਨੇ ਜਾਇਦਾਦ ਦੇ ਝਗੜੇ ਕਾਰਨ ਆਪਣੀ ਮਾਂ ਦੀ ਹੱਤਿਆ ਕਰਨ ਤੋਂ ਬਾਅਦ ਲਾਸ਼ ਜੰਗਲ 'ਚ ਲਿਜਾ ਕੇ ਸਾੜ ਦਿੱਤੀ।
* 02 ਮਾਰਚ ਨੂੰ ਕਪੂਰਥਲਾ ਦੇ ਪਿੰਡ ਤਲਵੰਡੀ ਚੌਧਰੀਆਂ 'ਚ ਇਕ ਔਰਤ ਨੇ ਭੇਤ ਖੁੱਲ੍ਹ ਜਾਣ ਦੇ ਡਰੋਂ ਆਪਣੇ ਪ੍ਰੇਮੀ ਨਾਲ ਮਿਲ ਕੇ ਆਪਣਾ 4 ਵਰ੍ਹਿਆਂ ਦਾ ਪੁੱਤ ਮਾਰ ਦਿੱਤਾ।
* 03 ਮਾਰਚ ਨੂੰ ਉੱਤਰ ਪ੍ਰਦੇਸ਼ ਦੇ ਪੀਲੀਭੀਤ 'ਚ ਇਕ ਵਿਅਕਤੀ ਵਲੋਂ ਆਪਣੀ ਨੂੰਹ ਨਾਲ ਦੋ ਵਾਰ ਬਲਾਤਕਾਰ ਕਰਨ 'ਤੇ ਗੁੱਸੇ 'ਚ ਆਏ ਨੂੰਹ ਤੇ ਪੁੱਤ ਨੇ ਲਾਠੀ ਨਾਲ ਕੁੱਟ-ਕੁੱਟ ਕੇ ਉਸ ਦੀ ਜੀਵਨ ਲੀਲਾ ਖਤਮ ਕਰ ਦਿੱਤੀ।
* 03 ਮਾਰਚ ਨੂੰ ਹੀ ਓਡਿਸ਼ਾ ਦੇ ਜਾਜਪੁਰ ਜ਼ਿਲੇ 'ਚ ਇਕ 26 ਸਾਲਾ ਔਰਤ ਨੇ ਪਤੀ ਨਾਲ ਝਗੜੇ ਤੋਂ ਬਾਅਦ ਆਪਣੀ ਤਿੰਨ ਸਾਲਾ ਧੀ ਨੂੰ ਤਲਾਬ 'ਚ ਡੁਬੋ ਕੇ ਮਾਰ ਦਿੱਤਾ।
* 03 ਮਾਰਚ ਨੂੰ ਹੀ ਹਰਿਆਣਾ ਦੇ ਮੰਡੀ ਆਦਮਪੁਰ 'ਚ ਇਕ ਵਿਅਕਤੀ ਨੇ ਆਪਣੀ ਪਤਨੀ ਨਾਲ ਝਗੜੇ ਤੋਂ ਬਾਅਦ ਉਸ ਦੀ ਤੇਜ਼ਧਾਰ ਹਥਿਆਰ ਨਾਲ ਹੱਤਿਆ ਕਰ ਦਿੱਤੀ।
* 04 ਮਾਰਚ ਨੂੰ ਦਿੱਲੀ ਦੇ ਸਵਰੂਪ ਨਗਰ 'ਚ ਇਕ ਔਰਤ ਵਲੋਂ ਆਪਣੀ ਨਨਾਣ ਨੂੰ ਵਾਰ-ਵਾਰ ਉਸ ਦਾ ਵਿਆਹ ਨਾ ਹੋਣ ਦਾ ਤਾਅਨਾ ਦੇਣ 'ਤੇ ਭੜਕੀ ਮੁਟਿਆਰ ਨੇ ਭਾਬੀ ਨੂੰ ਜ਼ਬਰਦਸਤੀ ਫਿਨਾਇਲ ਪਿਆਉਣ ਤੋਂ ਬਾਅਦ ਗਲਾ ਘੁੱਟ ਕੇ ਮਾਰ ਦਿੱਤਾ।
* 04 ਮਾਰਚ ਨੂੰ ਮੋਗਾ ਸ਼ਹਿਰ 'ਚ ਇਕ 12 ਸਾਲਾ ਬੱਚੀ ਨਾਲ ਉਸ ਦਾ ਪਿਤਾ ਨਸ਼ੇ ਦੀ ਹਾਲਤ 'ਚ ਤਿੰਨ ਵਾਰ ਬਲਾਤਕਾਰ ਕਰਨ ਤੋਂ ਬਾਅਦ ਫਰਾਰ ਹੋ ਗਿਆ।
ਇਹ ਨੈਤਿਕ ਪਤਨ ਅਤੇ ਗਿਰਾਵਟ ਬਹੁਤ ਅਫਸੋਸਨਾਕ ਹੈ ਅਤੇ ਹਾਲਾਤ ਦੀ ਮੰਗ ਹੈ ਕਿ ਅੱਜ ਸਾਡੀਆਂ ਧਾਰਮਿਕ ਤੇ ਸਮਾਜਿਕ ਸੰਸਥਾਵਾਂ ਅਜਿਹੀਆਂ ਘਟਨਾਵਾਂ ਦੀ ਡੂੰਘਾਈ 'ਚ ਜਾ ਕੇ ਲੋਕਾਂ ਨੂੰ ਸਿੱਖਿਅਤ ਕਰਨ ਤਾਂ ਕਿ ਅਸੀਂ ਆਪਣੇ ਪ੍ਰਾਚੀਨ ਗੌਰਵ ਤੇ ਉੱਚ ਆਦਰਸ਼ਾਂ ਨੂੰ ਹਾਸਲ ਕਰ ਸਕੀਏ।          
—ਵਿਜੇ ਕੁਮਾਰ