2 ਲੱਖ ਰੁਪਏ ਦੇ ਕੇ ਫਰਜ਼ੀ IPS ਬਣਿਆ ਨੌਜਵਾਨ, ਹੁਣ ਯੂਟਿਊਬ ''ਤੇ ਕੱਢਿਆ ਗੀਤ

ਨੈਸ਼ਨਲ ਡੈਸਕ : ਬਿਹਾਰ ਦੇ ਲਖੀਸਰਾਏ ਦਾ ਰਹਿਣ ਵਾਲਾ ਮਿਥਿਲੇਸ਼ ਹੁਣ ਮਿਊਜ਼ਿਕ ਐਲਬਮ 'ਚ ਨਜ਼ਰ ਆ ਰਿਹਾ ਹੈ। ਉਹ 2 ਲੱਖ ਰੁਪਏ ਦਾ ਭੁਗਤਾਨ ਕਰਕੇ ਆਈਪੀਐੱਸ ਬਣਨ ਲਈ ਚਰਚਾ 'ਚ ਆਇਆ ਸੀ। ਹੁਣ ਇਸ ਕਹਾਣੀ ਨੂੰ ਹੋਰ ਸੁਰਖੀਆਂ ਵਿਚ ਲਿਆਉਣ ਲਈ ਉਹ ਯੂ-ਟਿਊਬ 'ਤੇ ਗਾਇਕ ਬਣ ਗਿਆ ਹੈ। ਉਨ੍ਹਾਂ ਨੇ ਆਪਣੇ ਯੂਟਿਊਬ ਚੈਨਲ ਦਾ ਨਾਂ ਵੀ 'ਵਾਇਰਲ ਆਈਪੀਐੱਸ ਮਿਥਿਲੇਸ਼' ਰੱਖਿਆ ਹੈ। ਜਮੁਈ 'ਚ ਇਕ ਵਿਅਕਤੀ ਨੇ ਉਸ ਨੂੰ 2 ਲੱਖ ਰੁਪਏ ਲੈ ਕੇ ਆਈਪੀਐੱਸ ਦੀ ਵਰਦੀ ਪਹਿਨਾ ਦਿੱਤੀ ਅਤੇ ਕਿਹਾ ਕਿ ਹੁਣ ਤੁਸੀਂ ਅਫਸਰ ਬਣ ਗਏ ਹੋ। ਇਹ ਮਾਮਲਾ ਕਾਫੀ ਸਮੇਂ ਤੋਂ ਮੀਡੀਆ 'ਚ ਛਾਇਆ ਹੋਇਆ ਸੀ।

ਫਰਜ਼ੀ ਆਈਪੀਐੱਸ ਬਣੇ ਮਿਥਿਲੇਸ਼ ਨੂੰ ਹੁਣ ਯੂਟਿਊਬ 'ਤੇ ਆਪਣੇ ਗੀਤ ਦਾ ਪ੍ਰਚਾਰ ਕਰਦੇ ਸੁਣਿਆ ਜਾ ਸਕਦਾ ਹੈ। ਯੂਟਿਊਬ ਚੈਨਲ ਨੂੰ ਖੋਲ੍ਹਣ ਤੋਂ ਬਾਅਦ ਇਸ ਦੇ 10 ਹਜ਼ਾਰ ਤੋਂ ਵੱਧ ਸਬਸਕ੍ਰਾਈਬਰ ਹੋ ਚੁੱਕੇ ਹਨ। ਨਾਲ ਹੀ, ਉਨ੍ਹਾਂ ਦੀ ਪ੍ਰਮੋਸ਼ਨਲ ਅਪੀਲ ਨੂੰ ਆਪਣੇ ਚੈਨਲ ਦੇ ਜ਼ਰੀਏ 15 ਹਜ਼ਾਰ ਵਾਰ ਦੇਖਿਆ ਜਾ ਚੁੱਕਾ ਹੈ, ਉਹ ਲੋਕਾਂ ਨੂੰ ਆਪਣੇ ਗੀਤ ਨੂੰ ਹਿੱਟ ਕਰਨ ਦੀ ਅਪੀਲ ਕਰਦੇ ਨਜ਼ਰ ਆ ਰਹੇ ਹਨ। ਉਹ ਵੱਧ ਤੋਂ ਵੱਧ ਲੋਕਾਂ ਨੂੰ ਉਸ ਦੇ ਯੂਟਿਊਬ ਚੈਨਲ 'ਤੇ ਆਉਣ ਅਤੇ ਉਸ ਦੇ ਗੀਤਾਂ ਨੂੰ ਦੇਖਣ ਲਈ ਕਹਿ ਰਿਹਾ ਹੈ।

ਫਰਜ਼ੀ ਆਈਪੀਐੱਸ ਬਣਨ ਦੀ ਕਹਾਣੀ 'ਤੇ ਆਧਾਰਿਤ ਹੈ ਗੀਤ
ਤੁਹਾਨੂੰ ਦੱਸ ਦੇਈਏ ਕਿ ਮਿਥਿਲੇਸ਼ ਦੇ ਫਰਜ਼ੀ ਆਈਪੀਐੱਸ ਬਣਨ ਦੀ ਕਹਾਣੀ 'ਤੇ ਕੁਝ ਲੋਕਲ ਗਾਇਕਾਂ ਨੇ ਗੀਤ ਤਿਆਰ ਕੀਤਾ ਹੈ। ਮੰਗਲਵਾਰ ਨੂੰ ਇਹੀ ਗੀਤ ਯੂਟਿਊਬ 'ਤੇ ਰਿਲੀਜ਼ ਕੀਤਾ ਗਿਆ। ਮਿਥਿਲੇਸ਼ ਨੂੰ ਯੂਟਿਊਬ 'ਤੇ ਲੋਕਾਂ ਨੂੰ ਇਸ ਗੀਤ ਨੂੰ ਦੇਖਣ ਦੀ ਅਪੀਲ ਕਰਦੇ ਦੇਖਿਆ ਜਾ ਸਕਦਾ ਹੈ। ਉਹ ਲੋਕਾਂ ਨੂੰ ਉਸ ਦੇ ਗੀਤਾਂ ਨੂੰ ਵੱਧ ਤੋਂ ਵੱਧ ਦੇਖਣ ਦੀ ਅਪੀਲ ਕਰ ਰਿਹਾ ਹੈ।

ਪਹਿਲਾਂ ਡਾਕਟਰ ਬਣਨ ਦੀ ਆਖੀ ਸੀ ਗੱਲ
ਇਹ ਉਹੀ ਮਿਥਿਲੇਸ਼ ਹੈ, ਜਿਸ ਨੇ ਕੁਝ ਦਿਨ ਪਹਿਲਾਂ ਇੱਕ ਵਿਅਕਤੀ ਤੋਂ ਦੋ ਲੱਖ ਰੁਪਏ ਦੇ ਕੇ ਆਈਪੀਐੱਸ ਦੀ ਵਰਦੀ ਖਰੀਦੀ ਸੀ। ਉਸ ਨੂੰ ਵਰਦੀ ਦੇਣ ਵਾਲੇ ਵਿਅਕਤੀ ਨੇ ਕਿਹਾ ਸੀ ਕਿ ਉਹ ਹੁਣ ਆਈ.ਪੀ.ਐੱਸ ਅਫਸਰ ਬਣ ਗਏ ਹੋ। ਇਸ ਤੋਂ ਬਾਅਦ ਉਹ ਨੇੜਲੇ ਥਾਣੇ ਜਾ ਰਿਹਾ ਸੀ। ਇਸ ਦੌਰਾਨ ਪੁਲਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ। ਦੋ ਲੱਖ ਰੁਪਏ ਵਿੱਚ ਆਈਪੀਐੱਸ ਬਣਨ ਦਾ ਇਹ ਮਾਮਲਾ ਚਰਚਾ 'ਚ ਸੀ। ਇਸ ਤੋਂ ਬਾਅਦ ਪੁਲਸ ਨੇ ਉਸ ਨੂੰ ਬਾਂਡ ਭਰਨ ਤੋਂ ਬਾਅਦ ਛੱਡ ਦਿੱਤਾ। ਮਿਥਿਲੇਸ਼ ਜਦੋਂ ਆਪਣੇ ਪਿੰਡ ਪਹੁੰਚਿਆ ਤਾਂ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਉਸ ਨੇ ਦੱਸਿਆ ਕਿ ਹੁਣ ਉਹ ਡਾਕਟਰ ਬਣੇਗਾ।