ਕੋਰੋਨਾ ਪਾਜ਼ੇਟਿਵ ਗਰਭਵਤੀ ਜਨਾਨੀ ਦੀ ਡਾਕਟਰਾਂ ਨੇ ਕਰਵਾਈ ਸੁਰੱਖਿਅਤ ਡਿਲਿਵਰੀ

ਅਗਰਤਲਾ (ਵਾਰਤਾ)— ਤ੍ਰਿਪੁਰਾ ਵਿਚ ਅਗਰਤਲਾ ਮੈਡੀਕਲ ਕਾਲਜ ਹਸਪਤਾਲ (ਏ. ਜੀ. ਐੱਮ. ਸੀ.) ਦੇ ਡਾਕਟਰਾਂ ਨੇ ਬੁੱਧਵਾਰ ਰਾਤ ਇਕ ਕੋਰੋਨਾ ਪਾਜ਼ੇਟਿਵ ਗਰਭਵਤੀ ਜਨਾਨੀ ਦੀ ਸੁਰੱਖਿਅਤ ਡਿਲਿਵਰੀ ਕਰਵਾਈ। ਡਾਕਟਰਾਂ ਨੇ ਕਿਹਾ ਹੈ ਕਿ ਮਾਂ ਅਤੇ ਬੱਚਾ ਦੋਵੇਂ ਸਿਹਤਮੰਦ ਹਨ ਅਤੇ ਬੱਚੇ ਨੂੰ ਕੋਰੋਨਾ ਵਾਇਰਸ ਦਾ ਲਾਗ ਨਹੀਂ ਹੈ। ਪਿਛਲੇ ਇਕ ਮਹੀਨੇ ਦੌਰਾਨ ਇਸ ਮੈਡੀਕਲ ਕਾਲਜ ਹਸਪਤਾਲ ਵਿਚ ਕੋਰੋਨਾ ਪਾਜ਼ੇਟਿਵ ਜਨਾਨੀਆਂ ਦੀ ਇਹ ਚੌਥੀ ਡਿਲਿਵਰੀ ਹੈ ਅਤੇ ਦੋ ਹੋਰ ਜਨਾਨੀਆਂ ਦੀ ਡਿਲਿਵਰੀ ਦੀ ਸੰਭਾਵਨਾ ਹੈ।

ਜਨਾਨੀ ਰੋਗ ਮਹਿਕਮੇ ਦੇ ਇਕ ਸੀਨੀਅਰ ਡਾਕਟਰ ਨੇ ਕਿਹਾ ਕਿ ਕੱਲ ਦੀ ਡਿਲਿਵਰੀ ਆਪਰੇਸ਼ਨ ਜ਼ਰੀਏ ਹੋਈ, ਜਿਸ ਕਾਰਨ ਹਸਪਤਾਲ ਦੀਆਂ ਸੇਵਾਵਾਂ ਸੀਮਤ ਹੋ ਗਈਆਂ ਹਨ। ਉਨ੍ਹਾਂ ਨੇ ਕਿਹਾ ਕਿ ਅਸੀਂ ਕੋਰੋਨਾ ਪਾਜ਼ੇਟਿਵ ਜਨਾਨੀ ਦੀ ਸੁਰੱਖਿਅਤ ਡਿਲਿਵਰੀ ਅਤੇ ਬੱਚੇ ਦੇ ਜਨਮ ਤੋਂ ਖੁਸ਼ ਹਾਂ। ਦੂਜੇ ਪਾਸੇ ਡਿਲਿਵਰੀ ਦੇ ਕੰਮ ਵਿਚ ਸ਼ਾਮਲ ਡਾਕਟਰਾਂ ਅਤੇ ਹੋਰ ਕਾਮਿਆਂ ਦੇ ਕੁਆਰੰਟੀਨ 'ਤੇ ਜਾਣ ਨਾਲ ਸਾਡੀਆਂ ਸੇਵਾਵਾਂ ਸੀਮਤ ਹੋ ਗਈਆਂ ਹਨ। ਪੂਰੇ ਆਪਰੇਸ਼ਨ ਥੀਏਟਰ ਅਤੇ ਹੋਰ ਇਕਾਈਆਂ ਨੂੰ ਸੈਨੇਟਾਈਜ਼ ਕੀਤੇ ਜਾਣ ਦੀ ਲੋੜ ਹੈ।