ਮੰਦਰ 'ਚ ਆਰਤੀ ਕਰਨ ਗਈਆਂ 3 ਔਰਤਾਂ ਨੂੰ ਟਰੱਕ ਨੇ ਦਰੜਿਆ, ਭਜਨ ਗਾਇਕਾ ਸਮੇਤ ਦੋ ਦੀ ਮੌਤ

ਕਰਨਾਲ- ਹਰਿਆਣਾ ਦੇ ਕਰਨਾਲ ਦੇ ਸੈਕਟਰ-6 'ਚ ਸੈਰ ਕਰਨ ਗਈਆਂ 3 ਔਰਤਾਂ ਦੀ ਦਰਦਨਾਕ ਮੌਤ ਹੋ ਗਈ। ਦਰਅਸਲ ਤਿੰਨਾਂ ਔਰਤਾਂ ਨੂੰ ਤੇਜ਼ ਰਫ਼ਤਾਰ ਟਰੱਕ ਨੇ ਟੱਕਰ ਮਾਰ ਦਿੱਤੀ। ਟੱਕਰ ਲੱਗਣ ਮਗਰੋਂ ਇਕ ਔਰਤ ਨੇ ਮੌਕੇ 'ਤੇ ਹੀ ਦਮ ਤੋੜ ਦਿੱਤਾ। ਜਦਕਿ ਦੂਜੀ ਔਰਤ ਨੂੰ ਗੰਭੀਰ ਹਾਲਤ 'ਚ ਹਸਪਤਾਲ 'ਚ ਦਾਖ਼ਲ ਕਰਵਾਇਆ ਗਿਆ, ਜਿੱਥੇ ਉਸ ਦੀ ਇਲਾਜ ਦੌਰਾਨ ਮੌਤ ਹੋ ਗਈ। ਉੱਥੇ ਹੀ ਤੀਜੀ ਔਰਤ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਪੁਲਸ ਮੌਕੇ 'ਤੇ ਪਹੁੰਚ ਗਈ। ਪੁਲਸ ਨੇ ਦੋਹਾਂ ਲਾਸ਼ਾਂ ਨੂੰ ਆਪਣੇ ਕਬਜ਼ੇ 'ਚ ਲੈ ਕੇ ਪੋਸਟਮਾਰਟਮ ਲਈ ਮੋਰਚੀ ਘਰ ਕਰਨਾਲ ਰਖਵਾ ਦਿੱਤਾ ਹੈ। ਪੁਲਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।

ਜਾਣਕਾਰੀ ਮੁਤਾਬਕ ਤਿੰਨ ਔਰਤਾਂ ਅੰਜੂ, ਸ਼ਸ਼ੀ ਅਤੇ ਇਕ ਹੋਰ ਔਰਤ ਸੈਕਟਰ-6 ਵਿਚ ਸਥਿਤ ਸਾਈਂ ਮੰਦਰ 'ਚ ਆਰਤੀ ਕਰਨ ਮਗਰੋਂ ਸੈਰ 'ਤੇ ਜਾ ਰਹੀਆਂ ਸਨ। ਜਦੋਂ ਸਾਈਂ ਮੰਦਰ ਤੋਂ ਕੁਝ ਹੀ ਦੂਰ ਨਿਕਲੀਆਂ ਤਾਂ ਰਾਹ ਵਿਚ ਤੇਜ਼ ਰਫ਼ਤਾਰ ਟਰੱਕ ਨੇ ਉਨ੍ਹਾਂ ਨੂੰ ਪਿੱਛੋਂ ਟੱਕਰ ਮਾਰ ਦਿੱਤੀ, ਜਿਸ ਵਿਚ ਦੋ ਔਰਤਾਂ ਅੰਜੂ ਅਤੇ ਸ਼ਸ਼ੀ ਦੀ ਮੌਤ ਹੋ ਗਈ, ਜਦਕਿ ਤੀਜੀ ਔਰਤ ਨੂੰ ਮਾਮੂਲੀ ਸੱਟਾਂ ਲੱਗੀਆਂ। 

ਲੋਕਾਂ ਨੇ ਮਾਮਲੇ ਦੀ ਸੂਚਨਾ ਪੁਲਸ ਨੂੰ ਦਿੱਤੀ। ਪੁਲਸ ਮੌਕੇ 'ਤੇ ਪਹੁੰਚੀ ਅਤੇ ਤਿੰਨਾਂ ਔਰਤਾਂ ਨੂੰ ਇਲਾਜ ਲਈ ਚਾਵਲਾ ਮੈਡੀਕਲ ਕਾਲਜ ਵਿਚ ਲਿਆਂਦਾ ਗਿਆ, ਜਿੱਥੇ ਡਾਕਟਰਾਂ ਨੇ ਅੰਜੂ ਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ, ਜਦਕਿ ਸ਼ਸ਼ੀ ਨੇ ਇਲਾਜ ਦੌਰਾਨ ਹਸਪਤਾਲ ਵਿਚ ਦਮ ਤੋੜ ਦਿੱਤਾ। ਦੱਸਿਆ ਜਾ ਰਿਹਾ ਹੈ ਕਿ ਤਿੰਨੋਂ ਔਰਤਾਂ ਰੋਜ਼ਾਨਾ ਮੰਦਰ ਜਾਂਦੀਆਂ ਸਨ ਅਤੇ ਜਿਸ ਔਰਤ ਅੰਜੂ ਦੀ ਮੌਤ ਹੋਈ ਹੈ, ਉਹ ਭਜਨ ਗਾਇਕਾ ਵੀ ਸੀ।