SIA ਦੀ ਵੱਡੀ ਕਾਰਵਾਈ ! 'ਕਸ਼ਮੀਰ ਟਾਈਮਜ਼' ਦੇ ਜੰਮੂ ਦਫ਼ਤਰ 'ਤੇ ਛਾਪਾ, ਏਕੇ ਰਾਈਫਲ ਦੇ ਕਾਰਤੂਸ ਬਰਾਮਦ

ਨੈਸ਼ਨਲ ਡੈਸਕ : ਜੰਮੂ-ਕਸ਼ਮੀਰ ਪੁਲਸ ਦੀ ਸਟੇਟ ਇਨਵੈਸਟੀਗੇਸ਼ਨ ਏਜੰਸੀ (SIA) ਨੇ ਵੀਰਵਾਰ ਸਵੇਰੇ ਵੱਡੀ ਕਾਰਵਾਈ ਕਰਦਿਆਂ ਪ੍ਰਮੁੱਖ ਅਖਬਾਰ 'ਕਸ਼ਮੀਰ ਟਾਈਮਜ਼' ਦੇ ਜੰਮੂ ਸਥਿਤ ਦਫ਼ਤਰ 'ਤੇ ਛਾਪੇਮਾਰੀ ਕੀਤੀ ਹੈ। ਰੈਜ਼ੀਡੈਂਸੀ ਰੋਡ ਸਥਿਤ ਦਫ਼ਤਰ 'ਤੇ ਐੱਸ.ਆਈ.ਏ. ਦੀ ਟੀਮ ਕਈ ਘੰਟਿਆਂ ਤੱਕ ਮੌਜੂਦ ਰਹੀ।  ਛਾਪੇਮਾਰੀ ਦੌਰਾਨ ਐਸਆਈਏ ਨੇ ਏਕੇ ਰਾਈਫਲ ਦੇ ਕਾਰਤੂਸ, ਕੁਝ ਪਿਸਤੌਲ ਦੇ ਕਾਰਤੂਸ ਅਤੇ ਹੈਂਡ ਗ੍ਰਨੇਡ ਪਿੰਨ ਸਮੇਤ ਹੋਰ ਸਮਾਨ ਜ਼ਬਤ ਕੀਤਾ।

ਕਿਉਂ ਹੋਈ ਕਾਰਵਾਈ?
ਐੱਸ.ਆਈ.ਏ. ਦੇ ਅਧਿਕਾਰੀਆਂ ਅਨੁਸਾਰ ਇਹ ਕਾਰਵਾਈ ਉਨ੍ਹਾਂ ਦੋਸ਼ਾਂ ਦੇ ਆਧਾਰ 'ਤੇ ਕੀਤੀ ਗਈ ਹੈ, ਜਿਨ੍ਹਾਂ ਵਿੱਚ ਅਖਬਾਰ 'ਤੇ ਰਾਸ਼ਟਰ ਵਿਰੋਧੀ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋਣ ਤੇ ਦੇਸ਼ ਦੇ ਖਿਲਾਫ ਅਸੰਤੋਸ਼ ਫੈਲਾਉਣ ਦਾ ਦੋਸ਼ ਲਗਾਇਆ ਗਿਆ ਹੈ।
ਸੂਤਰਾਂ ਨੇ ਦੱਸਿਆ ਕਿ ਏਜੰਸੀ ਨੇ ਇਸ ਸਬੰਧ ਵਿੱਚ ਅਖਬਾਰ ਦੀ ਸੰਪਾਦਕ ਅਨੁਰਾਧਾ ਭਸੀਨ ਖਿਲਾਫ਼ ਐੱਫ.ਆਈ.ਆਰ. ਨੰਬਰ 02/2025 ਤਹਿਤ ਗੈਰ-ਕਾਨੂੰਨੀ ਗਤੀਵਿਧੀਆਂ ਨਾਲ ਸਬੰਧਤ ਧਾਰਾ 13 ਤਹਿਤ ਮਾਮਲਾ ਦਰਜ ਕੀਤਾ ਹੈ। ਜਾਂਚ ਇਸ ਗੱਲ 'ਤੇ ਕੇਂਦਰਿਤ ਹੈ ਕਿ ਕੀ ਇਹ ਗਤੀਵਿਧੀਆਂ ਭਾਰਤ ਦੀ ਪ੍ਰਭੂਸੱਤਾ ਲਈ ਖ਼ਤਰਾ ਹਨ।
ਜ਼ਿਕਰਯੋਗ ਹੈ ਕਿ 'ਕਸ਼ਮੀਰ ਟਾਈਮਜ਼' ਰਾਜ ਦਾ ਇੱਕ ਪੁਰਾਣਾ ਅੰਗਰੇਜ਼ੀ ਰੋਜ਼ਾਨਾ ਹੈ, ਪਰ ਸਰੋਤਾਂ ਅਨੁਸਾਰ ਇਸ ਦਾ ਸੰਪਾਦਨ ਲੰਬੇ ਸਮੇਂ ਤੋਂ ਬੰਦ ਪਿਆ ਹੈ। ਸੰਸਥਾਪਕ ਵੇਦ ਭਸੀਨ ਦੇ ਦੇਹਾਂਤ ਤੋਂ ਬਾਅਦ ਅਖਬਾਰ ਦੀ ਦੇਖ-ਰੇਖ ਉਨ੍ਹਾਂ ਦੀ ਧੀ ਅਨੁਰਾਧਾ ਭਸੀਨ ਅਤੇ ਜਵਾਈ ਪ੍ਰਮੋਦ ਜੰਮਵਾਲ ਕਰਦੇ ਸਨ। ਦੋਵੇਂ ਇਸ ਸਮੇਂ ਵਿਦੇਸ਼ ਵਿੱਚ ਹਨ, ਜਿਸ ਕਾਰਨ ਦਫ਼ਤਰ ਵੀ ਲੰਬੇ ਸਮੇਂ ਤੋਂ ਬੰਦ ਸੀ। ਐੱਸ.ਆਈ.ਏ. ਨੇ ਕਿਹਾ ਹੈ ਕਿ ਤਲਾਸ਼ੀ ਨਾਲ ਸਬੰਧਤ ਵਿਸਤ੍ਰਿਤ ਜਾਣਕਾਰੀ ਪ੍ਰਕਿਰਿਆ ਪੂਰੀ ਹੋਣ ਤੋਂ ਬਾਅਦ ਸਾਂਝੀ ਕੀਤੀ ਜਾਵੇਗੀ।