ਸ਼ੱਕ ਦੇ ਚੱਲਦਿਆਂ ਪਤਨੀ ਦਾ ਕਤਲ! ਵਾਰਦਾਤ ਨੂੰ ਅੰਜਾਮ ਦੇਣ ਮਗਰੋਂ ਖਾਟੂ ਸ਼ਿਆਮ ਪਹੁੰਚ ਗਿਆ ਪਤੀ

ਕੋਟਪੂਤਲੀ (ਰਾਜਸਥਾਨ): ਰਾਜਸਥਾਨ ਦੇ ਕੋਟਪੂਤਲੀ ਬਹਿਰੋੜ ਜ਼ਿਲ੍ਹੇ ਦੇ ਮਹਤਵਾਸ ਪਿੰਡ ਵਿੱਚ ਇੱਕ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਵਿਅਕਤੀ ਨੇ ਆਪਣੀ ਪਤਨੀ ਦੇ ਚਰਿੱਤਰ 'ਤੇ ਸ਼ੱਕ ਹੋਣ ਕਾਰਨ ਉਸਦਾ ਕੁਹਾੜੀ ਨਾਲ ਕਤਲ ਕਰ ਦਿੱਤਾ। ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਮੁਲਜ਼ਮ ਲਾਸ਼ ਨੂੰ ਘਰ ਦੇ ਅੰਦਰ ਬੰਦ ਕਰਕੇ ਖਾਟੂ ਸ਼ਿਆਮ ਮੰਦਰ ਮੱਥਾ ਟੇਕਣ ਚਲਾ ਗਿਆ।

ਤਿੰਨ ਦਿਨ ਬਾਅਦ ਖੁੱਲ੍ਹਿਆ ਭੇਤ
ਇਸ ਕਤਲ ਦਾ ਖੁਲਾਸਾ ਉਦੋਂ ਹੋਇਆ ਜਦੋਂ 10 ਮਈ ਨੂੰ ਗੁਆਂਢੀਆਂ ਨੂੰ ਘਰ ਵਿੱਚੋਂ ਭਿਆਨਕ ਬਦਬੂ ਆਉਣ ਲੱਗੀ। ਸੂਚਨਾ ਮਿਲਣ 'ਤੇ ਜਦੋਂ ਪੁਲਸ ਟੀਮ ਮੌਕੇ 'ਤੇ ਪਹੁੰਚੀ ਤਾਂ ਅੰਦਰ ਦਾ ਦ੍ਰਿਸ਼ ਬਹੁਤ ਖੌਫਨਾਕ ਸੀ। 36 ਸਾਲਾ ਮੋਨਿਕਾ ਦੀ ਲਾਸ਼ ਬੈੱਡ 'ਤੇ ਖੂਨ ਨਾਲ ਲੱਥਪੱਥ ਪਈ ਸੀ ਅਤੇ ਕੰਧਾਂ 'ਤੇ ਵੀ ਖੂਨ ਦੇ ਨਿਸ਼ਾਨ ਸਨ। ਪੁਲਸ ਅਨੁਸਾਰ ਮੁਲਜ਼ਮ ਕਪਿਲ ਸੇਨ ਨੇ ਆਪਣੀ ਪਤਨੀ 'ਤੇ ਉਸ ਸਮੇਂ ਕੁਹਾੜੀ ਨਾਲ ਵਾਰ ਕੀਤਾ ਜਦੋਂ ਉਹ ਸੌ ਰਹੀ ਸੀ।

ਵਾਪਸ ਪਰਤਦੇ ਹੀ ਗ੍ਰਿਫ਼ਤਾਰੀ
ਨੀਮਰਾਣਾ ਦੇ ਐਡੀਸ਼ਨਲ ਐੱਸ.ਪੀ. ਸੁਰੇਸ਼ ਖੀਂਚੀ ਨੇ ਦੱਸਿਆ ਕਿ ਜਦੋਂ ਮੁਲਜ਼ਮ ਕਪਿਲ 12 ਮਈ ਨੂੰ ਪਿੰਡ ਵਾਪਸ ਆਇਆ ਤਾਂ ਪੁਲਸ ਨੇ ਉਸਨੂੰ ਤੁਰੰਤ ਗ੍ਰਿਫ਼ਤਾਰ ਕਰ ਲਿਆ। ਪੁੱਛਗਿੱਛ ਦੌਰਾਨ ਉਸਨੇ ਆਪਣਾ ਜ਼ੁਰਮ ਕਬੂਲ ਕਰਦਿਆਂ ਦੱਸਿਆ ਕਿ ਉਸਨੂੰ ਆਪਣੀ ਪਤਨੀ 'ਤੇ ਸ਼ੱਕ ਸੀ ਅਤੇ ਉਨ੍ਹਾਂ ਵਿਚਕਾਰ ਲੰਬੇ ਸਮੇਂ ਤੋਂ ਵਿਵਾਦ ਚੱਲ ਰਿਹਾ ਸੀ।

ਮ੍ਰਿਤਕਾ ਦੇ ਭਰਾ ਪਵਨ ਸੈਨ ਨੇ ਦੱਸਿਆ ਕਿ ਮੋਨਿਕਾ ਦਾ ਵਿਆਹ 2009 'ਚ ਕਪਿਲ ਨਾਲ ਹੋਇਆ ਸੀ। ਉਨ੍ਹਾਂ ਦੋਸ਼ ਲਾਇਆ ਕਿ ਵਿਆਹ ਤੋਂ ਬਾਅਦ ਹੀ ਸਹੁਰਾ ਪਰਿਵਾਰ ਦਾਜ ਲਈ ਤੰਗ-ਪ੍ਰੇਸ਼ਾਨ ਕਰਦਾ ਸੀ। ਕਪਿਲ ਸ਼ਰਾਬ ਪੀਣ ਦਾ ਆਦੀ ਸੀ ਅਤੇ ਮੋਨਿਕਾ ਨਾਲ ਅਕਸਰ ਕੁੱਟਮਾਰ ਕਰਦਾ ਸੀ। ਇਸ ਤੋਂ ਪ੍ਰੇਸ਼ਾਨ ਹੋ ਕੇ ਮੋਨਿਕਾ ਆਪਣੀਆਂ ਦੋ ਧੀਆਂ ਨਾਲ ਹਰਿਆਣਾ ਦੇ ਰੇਵਾੜੀ 'ਚ ਰਹਿ ਕੇ ਇੱਕ ਫੈਕਟਰੀ 'ਚ ਕੰਮ ਕਰਦੀ ਸੀ ਤੇ ਸਿਰਫ਼ ਕਦੇ-ਕਦੇ ਹੀ ਪਿੰਡ ਆਉਂਦੀ ਸੀ। ਫਿਲਹਾਲ ਪੁਲਸ ਮੁਲਜ਼ਮ ਤੋਂ ਹੋਰ ਪੁੱਛਗਿੱਛ ਕਰ ਰਹੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e