ਹਿਮਾਚਲ ਪ੍ਰਦੇਸ਼ ਦੇ ਸੀਨੀਅਰ ਕਾਂਗਰਸ ਨੇਤਾ ਸੁਜਾਨ ਸਿੰਘ ਪਠਾਨੀਆ ਦਾ ਦਿਹਾਂਤ

ਸ਼ਿਮਲਾ- ਹਿਮਾਚਲ ਪ੍ਰਦੇਸ਼ 'ਚ ਕਾਂਗਰਸ ਦੇ ਸੀਨੀਅਰ ਨੇਤਾ ਅਤੇ ਮੌਜੂਦਾ ਵਿਧਾਇਕ ਸੁਜਾਨ ਸਿੰਘ ਪਠਾਨੀਆਂ ਦਾ ਸ਼ੁੱਕਰਵਾਰ ਸਵੇਰੇ ਦਿਹਾਂਤ ਹੋ ਗਿਆ। ਉਹ 77 ਸਾਲ ਦੇ ਸਨ। ਪਾਰਟੀ ਦੇ ਇਕ ਨੇਤਾ ਨੇ ਇਸ ਬਾਰੇ ਦੱਸਿਆ। ਉਹ ਸਾਬਕਾ ਮੰਤਰੀ ਅਤੇ ਕਾਂਗੜਾ ਜ਼ਿਲ੍ਹੇ 'ਚ ਫਤਿਹਪੁਰ ਵਿਧਾਨ ਸਭਾ ਖੇਤਰ ਤੋਂ ਮੌਜੂਦਾ ਵਿਧਾਇਕ ਸਨ। ਲੰਬੇ ਸਮੇਂ ਤੋਂ ਬੀਮਾਰ ਚੱਲ ਰਹੇ ਪਠਾਨੀਆ ਦਾ ਸ਼ੁੱਕਰਵਾਰ ਨੂੰ ਦਿਹਾਂਤ ਹੋ ਗਿਆ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਸ਼ਨੀਵਾਰ ਨੂੰ ਹੋਵੇਗਾ। ਪਾਕਿਸਤਾਨ ਦੇ ਲਾਹੌਰ 'ਚ 22 ਸਤੰਬਰ 1943 ਨੂੰ ਜਨਮੇ ਪਠਾਨੀਆ 7 ਵਾਰ ਵਿਧਾਇਕ ਚੁਣੇ ਗਏ। ਹਿਮਾਚਲ ਪ੍ਰਦੇਸ਼ ਜੰਗਲਾਤ ਵਿਭਾਗ 'ਚ ਰੇਂਜ ਅਧਿਕਾਰੀ ਦੇ ਤੌਰ 'ਤੇ ਸੇਵਾ ਦੇ ਚੁਕੇ ਪਠਾਨੀਆ ਅਸਤੀਫ਼ਾ ਦੇ ਕੇ 1977 'ਚ ਜਨਤਾ ਪਾਰਟੀ ਨਾਲ ਜੁੜੇ ਅਤੇ ਬਾਅਦ 'ਚ 1980 'ਚ ਉਹ ਕਾਂਗਰਸ ਦੇ ਮੈਂਬਰ ਬਣ ਗਏ।

ਪਠਾਨੀਆ 1977 'ਚ ਰਾਜ ਵਿਧਾਨ ਸਭਾ ਲਈ ਚੁਣੇ ਗਏ। ਇਸ ਤੋਂ ਬਾਅਦ ਉਹ 1990, 1993, ਨਵੰਬਰ 2003, 2009 'ਚ ਜਵਾਲੀ ਵਿਧਾਨ ਸਭਾ ਖੇਤਰ 'ਚ ਜ਼ਿਮਨੀ ਚੋਣਾਂ ਅਤੇ 2012 ਅਤੇ 2017 'ਚ ਫਤਿਹਪੁਰ ਵਿਧਾਨ ਸਭਾ ਖੇਤਰ ਤੋਂ ਚੋਣ ਜਿੱਤੇ। ਸਾਲ 2007 'ਚ ਹੱਦਬੰਦੀ ਤੋਂ ਪਹਿਲਾਂ ਫਤਿਹਪੁਰ ਵਿਧਾਨ ਸਭਾ ਖੇਤਰ ਜਵਾਲੀ ਦੇ ਨਾਮ ਨਾਲ ਜਾਣਿਆ ਜਾਂਦਾ ਸੀ। ਪਠਾਨੀਆ ਦਸੰਬਰ 2012 ਤੋਂ 20 ਦਸੰਬਰ 2017 ਤੱਕ ਸੂਬੇ 'ਚ ਗੈਰ-ਰਵਾਇਤੀ ਊਰਜਾ ਸੋਰਤਾਂ ਦੇ ਐਡੀਸ਼ਨਲ ਚਾਰਜ ਨਾਲ ਊਰਜਾ ਮੰਤਰੀ ਅਤੇ ਖੇਤੀਬਾੜੀ ਮੰਤਰੀ ਵੀ ਰਹੇ।