ਯਮੁਨਾ ਵਿਚਕਾਰ ਜ਼ੋਰਦਾਰ ਧਮਾਕੇ ਨਾਲ ਫਟੀ ਗੈਸ ਪਾਈਪ ਲਾਈਨ, ਯੂ. ਪੀ. ਤੇ ਪਾਣੀਪਤ ਦੀ ਸਪਲਾਈ ’ਚ ਪਿਆ ਵਿਘਨ

ਗਨੌਰ, (ਦਲਬੀਰ)- ਗੰਨੌਰ ਦੇ ਪਿੰਡ ਘਸੌਲੀ-ਚੰਦੌਲੀ ਨੇੜੇ ਯਮੁਨਾ ’ਚੋਂ ਲੰਘਦੀ ਪਾਣੀਪਤ ਰਿਫਾਇਨਰੀ ਦੀ ਤਰਲ ਕੁਦਰਤੀ ਗੈਸ (ਆਰ. ਐੱਲ. ਐੱਨ. ਜੀ.) ਪਾਈਪ ਲਾਈਨ ਬੁੱਧਵਾਰ ਤੜਕੇ 4 ਵਜੇ ਦੇ ਕਰੀਬ ਜ਼ੋਰਦਾਰ ਧਮਾਕੇ ਨਾਲ ਫਟ ਗਈ। ਗੈਸ ਦੇ ਜ਼ਿਆਦਾ ਦਬਾਅ ਕਾਰਨ ਯਮੁਨਾ ਦੇ ਪਾਣੀ ’ਚ ਕਰੀਬ 40-50 ਫੁੱਟ ਉਛਾਲ ਆਉਣ ਲੱਗਾ।

#WATCH | Baghpat, Uttar Pradesh: Indian Oil's gas pipeline bursts in the middle of Yamuna in the Jagos village of Baghpat district. pic.twitter.com/33wwVSm54Y

— ANI UP/Uttarakhand (@ANINewsUP) July 26, 2023

ਪਿੰਡ ਨਿਵਾਸੀਆਂ ਨੇ ਡਾਇਲ 112 ’ਤੇ ਇਸਦੀ ਸੂਚਨਾ ਦਿੱਤੀ। ਡਾਇਲ 112 ਨੇ ਮੌਕੇ ’ਤੇ ਪਹੁੰਚ ਕੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਇਸਦੀ ਸੂਚਨਾ ਦਿੱਤੀ ਜਿਸ ਤੋਂ ਬਾਅਦ ਪਾਣੀਪਤ ਰਿਫਾਈਨਰੀ ਦੇ ਅਧਿਕਾਰੀ ਮੌਕੇ ’ਤੇ ਪਹੁੰਚੇ। ਪਹਿਲਾਂ ਅਧਿਕਾਰੀਆਂ ਨੇ ਪਾਣੀਪਤ ਰਿਫਾਈਨਰੀ ਤੋਂ ਪ੍ਰੈਸ਼ਰ ਘੱਟ ਕਰਵਾਇਆ ਪਰ ਪਾਣੀ ਦਾ ਉੱਛਲਣਾ ਲਗਾਤਾਰ ਜਾਰੀ ਰਿਹਾ। ਯਮੁਨਾ ਵਿਚ ਪਾਣੀ ਦੇ ਤੇਜ਼ ਵਹਾਅ ਕਾਰਨ ਲੀਕੇਜ਼ ਠੀਕ ਨਾ ਕੀਤੇ ਜਾ ਸਕਣ ਕਾਰਨ ਅਧਿਕਾਰੀਆਂ ਨੇ ਗੈਸ ਦੀ ਸਪਲਾਈ ਪੂਰੀ ਤਰ੍ਹਾਂ ਨਾਲ ਬੰਦ ਕਰ ਦਿੱਤੀ। ਇਸ ਪਾਈਪ ਲਾਈਨ ਰਾਹੀਂ ਰਿਫਾਈਨਰੀ ਤੋਂ ਪਾਣੀਪਤ ਅਤੇ ਉੱਤਰ ਪ੍ਰਦੇਸ਼ ਵਿਚ ਗੈਸ ਸਪਲਾਈ ਹੁੰਦੀ ਹੈ।

ਫਿਲਹਾਲ ਪਾਣੀਪਤ ਵਿਚ ਸੀ. ਐੱਨ. ਜੀ. ਦੀ ਸਪਲਾਈ ਕਿਸੇ ਹੋਰ ਪਾਈਪ ਲਾਈਨ ਨਾਲ ਜੋੜਨ ’ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ।